HEADLINES

Umapela ang Malacañang sa US government na imbestigahan at panagutin ang salarin sa pagpaslang sa isang Pinay nurse sa New York City, kamakailan.

Binigyang diin ni Presidential Spokesman Harry Roque, na lahat ng biktima ng human rights violation ay dapat lamang na mabigyan ng agarang hustisya.

Kinilala ang biktima na si Maria Ambrocio, 58-anyos, isang nurse sa Bayonne, New Jersey.

Naiulat na naglalakad noon si Ambrocio kasama ang kaibigan nito nang atakihin siya ng isang palaboy sa may Times Square, New York.—sa panulat ni Hya Ludivico

Nagsorry si Philippine National Police (PNP) Chief General Guillermo Eleazarsa grab rider na tinamaan ng ligaw na bala sa Cuenca incident sa bahagi ng Mandaluyong City.

Matatandaang pinaputukan ng baril ang gulong ng sasakyan ng aktor na si Jake Cuenca matapos niyang takbuhan ang mga pulis sa isang checkpoint sa nabanggit na lugar nito lamang sabado.

Dito na tinamaan ng ligaw na bala ang grab rider na ngayon ay nagpapagaling pa sa ospital.

Nabatid na nagkaroon ng habulan sa pagitan ng mga pulis at mga suspek kung saan, napagkamalan na kabilang ang aktor sa mga hinahabol na suspek dahil sa tinted na salamin ng sasakyan nito.

Nangako naman si Eleazar na kaniyang tutulungan ang grab rider na naapektuhan sa ikinasang operasyon ng mga tauhan ng PNP.

Sinabi pa ni Eleazar na kanilang igagalang ang magiging desisyon ng biktima sakaling maghain ito ng kaso laban sa mga pulis. —sa ulat ni Jaymark Dagala (Patrol 9), sa panulat ni Angelica Doctolero

Nanindigan ang Philippine National Police (PNP) na sila’y apolitical o walang dapat kilingan ngayong panahon ng halalan.

Ito’y ayon kay PNP Chief P/Gen. Guillermo Eleazar kasabay ng pagpapaalala nito sa mga pulis na iwasan ang mga post sa social media na magbibigay bahid sa kanilang pangalan bilang ogranisasyon.

Nakasaad aniya sa umiiral na PNP Memorandum Circular, na dapat walang kinikilingan ang sinumang pulis at hindi rin dapat sila mangampaniya sa sinumang kandidato maging ito man ay social media account ng PNP o kahit sa personal nilang account.

Sakaling mapatunayang nakikisawsaw ang mga pulis sa pulitika ay kakastiguhin ng PNP at mahaharap sa kaukulang parusa.

Aabot sa 24 na bahay ang napinsala sa San Isidro at Governor Generoso sa Davao Oriental dahil sa malakas na alon at hangin dahil sa bagyong Maring.

Ayon sa ng pamahalaang panlalawigan ng Davao Oriental, nasa 769 mga pamilya inilikas ngunit bumalik din ang mga ito sa kanilang mga tahanan.

Maliban dito, isang malaking fishing vessel rin ang sumasad sa dalampasigan sa barangay Tibanban sa Governor Generoso.

Base sa imbestigasyon ng Provincial Disaster Risk Reduction and Management Office, hindi naman nasira ang Barkong FB Leeward.

Agad namang rumesponde ang Philippine Coast Guard kaugnay sa pagkaroon ng oil spill, ngunit patuloy pa ang imbestigasyon hinggil dito. —sa panulat ni Hya Ludivico

Halos 1.2-M doses ng COVID-19 vaccine na Pfizer-Biontech ang dumating sa bansa kahapon.

Unang dumating ang 924,300 doses ng naturang bakuna na donasyon ng Estados Unidos sa pamamagitan ng Covax facility.

Sinabi ni Office of the Presidential Adviser on the Peace Process Assistant Secretary Wilben Mayor na lahat ng rehiyon ay makatatanggap ng suplay ng Pfizer.

Aniya, nakalaan rin ito para sa pagbabakuna sa mga batang may edad 12 hanggang 17 taon.

Bandang alas-9 ng gabi naman nang dumating ang  272,610 doses ng Pfizer vaccines na binili ng pamahalaan.

Hinimok naman ni Mayor ang mga lokal na pamahalaan na paigtingin ang kanilang pagbabakuna kontra COVID-19 upang maabot ang herd immunity. —sa ulat ni Raoul Esperas (Patrol 45), sa panulat ni Hya Ludivico

Bumaba pa ang bilang ng mga lugar na nasa ilalim ng granular lockdown sa iba’t ibang rehiyon sa bansa.

Batay sa datos ng Philippine National Police (PNP), aabot na lamang sa 872 ang mga naka-lockdown na lugar mula 970 kahapon.

Nanguna ang Cordillera sa may pinakamaraming naka-lockdown na lugar na umabot sa 504.

Sinundan ito ng National Capital Region na umabot sa 120 at Central Luzon na umabot sa 84.

Nagmula sa 597 na barangay sa 77 na lungsod at munisipalidad ang mga naka-lockdown na lugar.

Samantala, naka-deploy ang 666 na mga pulis at 1,360 force multipliers upang matiyak na nasusunod ang minimum public health safety standards. —sa panulat ni Hya Ludivico

Inaresto ng awtoridad ang dating suspek sa pagbebenta ng ilegal na droga sa siyudad ng Lucena.

Ayon kay Lucena police chief Romulo Albacea, kinilala ang suspek na si Ryan Secretaria, 38 taon gulang, na nagbebenta ng shabu sa barangay Dalahican dakong ala-6 ng umaga.

Nakuha sa suspek ang limang sachet ng shabu na tinatayang higit P30,000.

Nahaharap naman sa kasong paglabag sa Republic Act 9165 o Comprehensive Dangerous Act of 2002.–-sa panulat ni Airiam Sancho