HEADLINES

Patuloy ang panawagan ng Philippine National Police (PNP) sa publiko na huwag ipagwalang bahala ang banta ng COVID-19.

Ito ang inihayag ng PNP matapos makapagtala ng 274,231 ang bilang ng mga lumabag sa quarantine restrictions sa ilalim ng alert level 4 with granular lockdown sa Metro Manila.

Ayon sa PNP, nakabatay ito sa kanilang datos mula Setyembre 16 hanggang Oktubre 11 ng taong kasalukuyan.

Pinakamarami ang lumabag sa hindi tamang pagsusuot ng facemask at faceshield noong panahong required pa ito sa paglabas ng tahanan gayundin ang mass gathering

Marami rin sa mga lumabag sa curfew ay iyong mga hindi naman Authorized Persons Outside of Residence (APOR). —sa ulat ni Jaymark Dagala (Patrol 9)

Ipinahayag ng Food and Drug Administration (FDA) na ang may pinakamaraming kaso ng COVID-19 ay nasa 18 hanggang 39 taon gulang.

Ayon kay FDA Director General Eric Domingo, naitala ang 90% kaso sa nasabing edad na kung saan ang mga ito ay ang lumalabas ng bahay at nagtatrabaho.

Subalit, sinabi ni Domingo na karamihan sa mga namamatay dahil sa impeksyon ay mga senior citizens o edad 60 pataas.

Samantala, walang nakitang pagtaas sa bilang ng kaso at patunay lamang na epektibo ang nakalipas na ilang buwan na pagbabakuna. —sa panulat ni Airiam Sancho

Inirekomenda ni Appropriations Vice Chairman Joey Salceda ang pondo sa ilalim ng 2022 National Budget para COVID-19 booster shots ay ilipat sa gamot laban sa COVID-19.

Ayon kay Salceda, ipinarerelocate niya ang P45-B pondo para sa COVID-19 booster shot sa pagkuha ng gamot sa COVID-19.

Batid niyang ang bakuna ang susi sa pagkamit para maibalik ang normal na pamumuhay ng publiko ngunit mahalaga din ang pagkakaroon ng gamot sakaling magkasakit ng COVID-19 na maari lamang mabili sa mga botika.

Magugunitang ang COVID-19 antibiotic na Molnupiravir na pinaniniwalaang gamot kontra COVID-19 ay nabigyan ng Food and Drug Admnistration ng Compassionate Special Permit. —sa panulat ni Airiam Sancho

Ipinaalala ng pamunuan ng Metropolitan Manila Development Authority (MMDA) na isasara sa mga motorista ang Eastbound o papuntang Elliptical Road sa Quezon City mula sa Biyernes, Oktubre 15, 2021 hanggang Hunyo 1, 2022 para sa pag-aayos ng MRT-7 proyekto ng Department of Transportation.

Ayon sa MMDA, maaring dumaan sa North Avenue ang mga sasakyang papasok sa Wildlife at Veterans, habang ang mga sasakyan naman na papuntang Elliptical Road ay maaring dumaan sa Quezon Avenue via Agham Road bilang alternatibong ruta.

Samantala, inaasahan ng MMDA na ang pagsasara sa ilang bahagi ng naturang lugar ay magdudulot ng abala sa daloy ng trapiko. —sa panulat ni Airiam Sancho

Humirit ang ilang negosyante ng dagdag-presyo sa ilang produkto ng noche buena sa Department of Trade and Industry (DTI) para sa papalapit na kapaskuhan.

Ayon kay DTI Undersecretary Ruth Castelo, inihirit ng mga negosyante na taasan ang presyo ng ilang ham, tomato sauce at iba pa na inihahanda tuwing pasko.

Nilinaw naman ni Castelo na masusi pang pinag-aaralan ng dti ang naturang hirit dahil kailangan balensahin ang interes ng mamimili at negosyante, bagaman ang presyo ng noche buena ay hindi nagtaas noong 2019 at 2020. —sa panulat ni Airiam Sancho

Nilinaw ng mga mayor sa Metro Manila na hindi sila kampante hinggil sa mataas na vaccination rate at mababang infection rate laban sa COVID-19.

Ito’y ayon kay MMDA Chairman Benhur Abalos kaugnay ng magandang resulta sa patuloy na pagbabakuna, granular lockdown at contract tracing sa bansa.

Samantala, sinabi ni Abalos na target mabakunahan ng dalawang dose ang 86% sa buong populasyon ng Metro Manila hanggang Nobyembre 10. —sa panulat ni Airiam Sancho

Maaaring bumaba pa sa 10,000 ang active COVID-19 cases sa NCR sa katapusan ng Oktubre kung mananatili sa ilalim ng alert level 4, kaakibat ang pagsasagawa ng detection at isolation.

Gayunman, aminado si Health Undersecretary Maria Rosario Vergeire na posibleng tumaas sa 13,471 hanggang 17,967 ang aktibong kaso kung ipatutupad ang alert level 3.

Maaari rin anyang bumaba sa 527 hanggang 849 ang severe at critical cases sa katapusan ng buwan kung mananatili ang level 4 at ipagpapatuloy ang four-day detection hanggang isolation time.

Aabutin naman ng 703 hanggang 1,235 ang severe at critical cases sa NCR kung ibaba sa level 3.

Ang projection ng DOH ang isa sa magiging batayan ng gobyerno sa pagpapasya kung ibababa na sa level 3 o ipagpapatuloy ang alert level 4 sa Metro Manila sa kabila ng patuloy na pagbaba ng COVID-19 cases.—sa panulat ni Drew Nacino

Tinanggal ng United Kingdom sa kanilang COVID-19 red list countries ang Pilipinas, simula kahapon.

Kinumpirma ng British Embassy sa Pilipinas na mula sa 54 na bansa, pito na lang ang naiwan sa listahan.

Ito ang Panama, Colombia, Venezuela, Peru, Ecuador, Haiti, at Dominican Republic.

Ayon sa embahada, hindi na kailangang sumailalim sa quarantine at manatili sa hotel ang mga biyahero mula sa Pilipinas.

Kailangan lamang nilang magpa-book para sa COVID-19 test na dapat isagawa dalawang araw bago dumating sa britanya at kumpletuhin ang passenger locator form.

Nilinaw din ng embahada na maaari pa ring bumiyahe ang mga pasaherong hindi pa fully vaccinated basta’t magpapa-COVID-19 dalawang araw bago dumating at mag-book at magbayad para sa test bago ang biyahe.—sa panulat ni Drew Nacino