HEADLINES

Muling pina-alalahanan ng Department of Labor and Employment (DOLE) ang lahat ng private-sector employer sa umiiral na batas kaugnay sa pagbibigay ng 13^th month pay sa kanilang mga empleyado.

Ito ang inihayag ni DOLE Spokesman Rolly Francia sa gitna ng hinaing ng ilang employer na maaaring hindi nila maibigay ang 13^th month pay dahil sa matinding epekto ng COVID-19 pandemic.

Sa ilalim ng Presidential Decree 851, obligado ang mga employer na magbigay ng 13th month pay sa mismo o bago mag-december 24.

Ayon kay Francia, may panahon pa upang pag-aralan ang sitwasyon at dapat hintayin ang advisory ng kagawaran kaugnay sa issue.

Ikinukunsidera naman anya ng DOLE na tulungan ang mga apektadong kumpanya gaya ng proposal noong isang taon, kung maglalabas ng dagdag na pondo para saklolohan ang mga employer sa pagbibigay ng 13th month pay.

Una nang inihayag ni Presidential Adviser for Entrepreneurship Joey Concepcion na magiging mahirap para sa ilang industriya na maglabas ng 13th-month pay, partikular ang mga labis na naapektuhan ng pandemya.—sa panulat ni Drew Nacino

Inirekomenda na ng United Nations–World Health Organization (WHO) ang COVID-19 booster shot sa mga edad 60 pataas na binakunahan ng Sinopharm at Sinovac.

Ayon sa WHO–Strategic Advisory Group, bukod sa ikatlong dose ng Sinovac at Sinopharm, maaari ring ikunsidera ang pagbibigay ng ibang vaccine brand, depende sa availability ng mga ito.

Inirekomenda rin ng advisory group ang booster sa mga moderately at severely immuno-compromised people.

Maaari iturok ang kahit anong uri ng bakuna bilang booster sa mga immuno-compromised dahil high-risk ang mga ito sa severe COVID-19. —sa panulat ni Drew Nacino

Bahagya pang lumakas ang bagyong maring habang tinutumbok ang West Philippine Sea (WPS).

Huling namataan ng pagasa ang bagyo sa layong 170km, kanluran ng Calayan, Cagayan.

Taglay nito ang lakas ng hanging aabot sa 100km/hr at pagbungso na hanggang 125km/hr at kumikilos pa-kanluran sa bilis na 20km/hr.

Nakataas pa rin ang public storm signal 2 sa Batanes, Cagayan, kabilang ang Babuyan Islands, Northern Portion ng  Isabela, Apayao, Kalinga, Mountain Province, Abra, Ilocos Norte at Sur.

Signal number 1 naman sa nalalabing bahagi ng Isabela, Nueva Vizcaya, Quirino, Ifugao, Benguet, La Union, Pangasinan, Aurora, Nueva Ecija, Tarlac, Zambales, Pampanga, Bulacan, Northern Portion Ng Bataan at Northern Portion ng Quezon, kabilang ang Polillo Islands.

Asahan na ang malakas hanggang sa biglaang pag-ulan sa Batanes, Northern Portion ng Cagayan, kabilang ang Babuyan Islands, Cordillera at Ilocos Regions.

Posible naman ang katamtaman hanggang sa malakas na pag-ulan sa Zambales, Bataan, Tarlac at nalalabing bahagi ng Cagayan habang mahina hanggang sa katamtaman at minsang malakas na pag-ulan sa Metro Manila, Central Luzon at nalalabing bahagi ng Cagayan Valley.

Inaasahang lalabas ng Philippine Area of Responsibility ang bagyong Maring, ngayong umaga. —sa panulat ni Drew Nacino

Inilarga na ng mga kumpanya ng langis ang panibagong price increase sa kanilang mga produkto.

Epektibo alas-12 kaninang hatinggabi nang ipatupad ng

Caltex ang P1.50 na dagdag sa kada litro ng diesel; P1.30 sa gasolina habang P1.45 sa kerosene.

Nagpatupad din ng kahalintulad na price hike mamayang ala-6 ng umaga ang Petron, Phoenix Petroleum, PTT Philippines, Unioil, Seaoil, Petrogazz at Shell.

Mamayang alas-4 naman ng hapon aarangkada ang dagdag-presyo ng Cleanfuel.

Ito na ang ikapitong sunod na linggong oil price increase bunsod ng lumiliit na supply sa international market. —sa panulat ni Drew Nacino

Sumampa na sa 23,180,969 ang mga indibidwal na nakakumpleto ng bakuna kontra COVID-19 o 30% ng 77-M na target population ng bansa.

Batay sa datos ng Inter-Agency Task Force, aabot naman sa 26,486,522 ang tinurukan ng first dose hanggang noong linggo.

Sa kabuuan ay nasa 49,673,491 na ang binakunahan sa bansa kabilang ang 7,579,220 fully-vaccinated individual sa NCR o 77.53% ng 9.8-M na target population.

Muli namang hinimok ng gobyerno ang mga hindi pa nababakunahan na magpabakuna na ng kahit anong brand ng COVID-19 vaccine dahil aprubado ang lahat ng ito ng Food and Drug Administration at World Health Organization. —sa panulat ni Drew Nacino

Kanselado ang pagpapatuloy sana ng pagdinig ng Senate Blue Ribbon Committee ngayong araw kaugnay sa umano’y katiwalian sa pagbili ng gobyerno ng pandemic supplies sa Pharmally Pharmaceutical.

Dahil ito sa hiling na magpahinga muna ang mga staff ng kumite at tanggapan ni Senator Richard Gordon na chairman ng blue ribbon.

Ihahayag na lamang ang bagong petsa ng pagdinig sa mga susunod na araw.

Nakatakda sana ngayong araw ang ika-labindalawang pagdinig ng kumite sa naturang issue.

Samantala, naniniwala naman sina Senators Ronald Dela Rosa at Francis Tolentino na dapat ng tapusin ang hearing upang makagawa na ng committe report.—sa panulat ni Drew Nacino

Tutugisin na ng Department of Foreign Affairs ang mga passport fixer sa ahensya.

Tiniyak ito ni Foreign Affairs Secretary Teodoro Locsin sa publiko, lalo sa mga nahihirapang kumuha ng pasaporte, bilang tugon sa sumbong ng isang netizen.

Isiniwalat ng netizen na mayroon umanong modus ang ilang empleyado at retirado kung saan sinisingil nila ng P2,500 hanggang P3,500 ang sinumang nais mapabilis ang proseso ng pagkuha ng passport.

Hinimok naman ni Locsin ang publiko na i-follow ang social media account ng DFA at ni Foreign Affairs Undersecretary Brigido Dulay upang maging updated.

Ipinaalala rin ng kalihim na mayroong mga temporary offsite passport services sa ilang mall sa Metro Manila at ibang rehiyon upang magbigay-serbisyo sa mga aplikante. —sa panulat ni Drew Nacino

Nilinaw ni Presidential Spokesman Harry Roque na datos ang magiging batayan kung luluwagan ang quarantine classification sa bansa.

Tugon ito ni Roque sa projection ng OCTA Research Group na posibleng nasa “low risk” na para sa COVID-19 ang National Capital Region sa katapusan ng buwan.

Mayroon ding tinitingnan na two week growth rate ng COVID-19 cases kung saan nasa -13 at -46%, indikasyon na bumagal ang hawaan.

Ang mabuti anyang balita ay nasa moderate risk na sa ICU capacity sa Metro Manila na isa sa mga factor na maaaring ikunsidera upang ibaba ang quarantine classification.

Ipinunto ni Roque na eksperimento o pilot pa lamang naman ang ipinatutupad na alert level system sa Metro Manila kaya’t kailangang pag-aralan muna ang resulta nito at nakadepende pa rin ang pasya sa IATF. —sa panulat ni Drew Nacino