HEADLINES

Isa na ang patay habang nasa 1,750 pamilya o mahigit 7,100 katao na ang nagsilikas matapos malubog sa baha ang ilang bayan sa Cagayan.

Ito’y bunsod ng pananalasa ng bagyong Maring na unang nag-landfall sa Fuga Island, kagabi.

Ayon sa Cagayan Provincial Information Office, isang taga-Claveria ang nasawi matapos malunod sa kasagsagan ng baha.

Apektado rin ang mga bayan ng Baggao at Gonzaga sa Cagayan maging ang mga bayan ng Bacnotan, Bangar, Luna, San Juan at San Gabriel sa La Union.

Nagsagawa naman ang Provincial Disaster Risk Reduction Management Office ng La Union ng rescue operations sa mga apektadong lugar.—sa panulat ni Drew Nacino

Target ng COMELEC ang 80% voters registration turn-out para sa 2022 National at Local Elections kahit mayroong COVID-19 pandemic.

Ipinaliwanag ni COMELEC Spokesman James Jimenez na karaniwan namang mataas ang voter turn-out kahit noong mga nakaraang presidential election.

Gayunman, iba anyang usapin ang magiging halalan sa susunod na taon dahil sa epekto ng pandemya.

Hanggang noong September 30 ay aabot na sa mahigit 62-M ang botanteng nagparehistro at inaasahang tataas ito matapos palawigin ng isa pang buwan o hanggang katapusan ng Oktubre ang registration. —sa panulat ni Drew Nacino

Nagpaabot ng pagbati ang Malakanyang kay Filipino-American Journalist Maria Ressa matapos itong gawaran ng Nobel Peace Prize.

Ayon kay Presidential Spokesman Harry Roque, isang tagumpay para sa mga pinoy ang karangalang inihatid ni Ressa at kanila itong ikinalulugod.

Nanindigan naman si Roque na hindi inaatake ang press freedom sa bansa at patunay nito ang pagkakapanalo ni kilalang mamamahayag ng prestihiyosong parangal.

Ang Nobel Peace Prize ay iginawad kay Ressa at sa Rappler dahil sa pagtatanggol sa kalayaang magpahayag na mahalaga sa demokrasya at kapayapaan. —sa panulat ni Drew Nacino

Inaasahang tatalakayin sa mga susunod na pulong ng Inter-Agency Task Force (IATF) ang mga ipatutupad na guidelines para sa undas.

Ito’y ayon kay Presidential Spokesperson Harry Roque at sinabing siya mismo ang magpo-propose ng usaping ito sa isasagawang pulong sa Huwebes.

Sinabi pa ni Roque na mahalaga na maaga pa lamang ay malaman na ng publiko ang mga ipatutupad na panuntunan bilang pag-iingat laban sa COVID-19, kasabay ng paggunita sa undas.—sa panulat ni Hya Ludivico

Nakadagdag pa sa kalituhan ng publiko ang paglalabas ng OCTA Research Groups ng projections sa COVID-19 cases sa bansa.

Ito ang inamin ni DOH Spokesperson, Undersecretary Maria Rosario Vergeire, sa tanong ng House Committee on Good Government and Public Accountability kung nakatutulong ba ang OCTA sa kampanya kontra COVID.

Isinagawa ng kumite ang hearing upang siyasatin ang qualifications, research methodologies, partnership at composition ng OCTA.

Ayon kay Vergeire, na-pe-preempt ang ilang mahalagang impormasyon katulad pag-a-anunsyo na mayroongCOVID-19 surge.

Hindi lamang anya nakikipag-kumpetensya sa virus ang kagawaran kundi maging sa OCTA Research pagdating sa pagpapakalat ng tamang impormasyon.

Para naman maiwasan na ang issue, tiniyak naman ng DOH at OCTA ang kanilang pagtutulungan para sa iisang takbo ng mga datos.

Bumaba pa ang naitatalang kaso ng COVID-19 sa NCR.

Sa datos na inilabas ni Health Undersecretary Ma. Rosario Vergeire, mula October 4 hanggang 10 ay bumaba sa 1,984 ang average daily cases ng mga naitatalang kaso sa rehiyon.

Mas mababa ito ng 36% sa 3,126 na average daily cases na naitala  mula September 27 hanggang October 3.

Aniya, malayo na rin ito sa “peak” na naitala ng ahensya noong September 5 hanggang 11 na umabot sa 5,714.—sa panulat ni Hya Ludivico

Plano ng Commission on Higher Education (CHED) na ipatupad na ang limitadong face-to-face classes sa lahat ng degree o kurso sa kolehiyo at unibersidad.

Gayunman, nilinaw ni CHED Chairman Prospero De Vera na sa mga lugar lamang na low risk sa COVID-19 at may mataas na vaccination rates idaraos ang mga klase.

Maganda naman anya ang tinatakbo ng kasalukuyang limitadong face-to-face classes kaya’t kumpiyansa silang maipatutupad ito para sa lahat ng kurso sa mga low risk area at may mataas na vaccination rate.

Sa ngayon ay tanging mga kurso sa ilalim ng Modified General Community Quarantine ang pinapayagan tulad ng medicine, engineering, hotel and restaurant management, tourism, marine engineering at marine transportation. —sa panulat ni Drew Nacino

Tumaas ang suicide rate sa bansa sa nakalipas na taon.

Ayon sa Philippine Statistics Authority (PSA), 57 porsyento ang itinaas ng suicide rate sa bansa noong 2020.

Batay sa datos ng PSA, nasa 4,420 ang nasawi sa bansa noong nakaraang taon dahil sa self-inflicted harm, na mas mataas kumpara sa 2,810 na naitala noong 2019.

Umangat rin sa ika-25 pwesto ang suicide sa listahan ng mga nangungunang dahilan ng pagkasawi sa Pilipinas, mula sa ika-31 pwesto.

Kaugnay nito, nanawagan si House Deputy Speaker Loren Legarda para sa mas malakas na pagtugon ng gobyerno hinggil sa mental health ng mga Pilipino ngayong may pandemya.

Nais ni Legarda ang mas pinaigting na implementasyon ng RA 11036 o Mental Health Care Act (MHCA) na naglalayong magbigay ng mura at abot-kamay na mental health service na mayroong mental disability, upang maiwasan ang self-induced harm.—sa panulat ni Hya Ludivico

Nai-deploy na ng Philippine National Police (PNP) ang unang batch ng kanilang mga nurse sa mga ospital upang tumulong sa pagtugon sa COVID-19 pandemic.

Pinangunahan ni PNP Chief PGen. Guillermo Eleazar ang send-off ng mga nars sa Camp Crame.

Una rito, lumagda sa memorandum of agreement ang PNP at Department of Health, alinsunod sa utos ni Pangulong Rodrigo Duterte sa PNP at AFP na magpadala ng kanilang mga medical personnel sa mga pribado at pampublikong ospital.

Sinabi naman ni Eleazar na laging handa ang PNP na sumuporta sa mga programang pangkalusugan ng gobyerno.—sa panulat ni Hya Ludivico

Suportado ng mga cinema operator ang posibleng pagbabalik ng operasyon ng mga sinehan sa Metro Manila sa oras na ipatupad ang alert level 3.

Ayon sa Cinema Exhibitor Association of the Philippines (CEAP), kapag nabigyan ng go-signal na magbalik-operasyon, maglalatag sila ng mahigpit na protocol sa pagpapapasok ng mga manonood sa mga sinehan.

Inihalimbawa na lamang ni CEAP President Charmaine Bauzonang one-seat-apart policy,panonood habang naka-facemask habang ipagbabawal ang pagkain.

Simula Marso noong isang taon, aabot na anya sa P21-B ang nalugi sakita ng mga sinehan at mahigit 300,000 cinema workers ang nawalan ng trabaho. —sa panulat ni Drew Nacino