HEADLINES

Ipinatupad ni Metro Manila Council Chairman at Parañaque City Mayor Edwin Olivarez ang pagpapaiksi ng curfew hours.

Ayon kay Olivarez, simula bukas, Oktubre 13, 12 ng hatinggabi hanggang 4 ng umaga ipapatupad ang unified curfew sa Metro Manila.

Aniya, makatutulong ito sa mga empleyado at may negosyo na paunti-unting magbukas sa kabila ng pandemya.

Kasalukuyan namang nasa 10 ng gabi hanggang 4 ng umaga ang nakaraang ipinatupad na curfew.

Posibleng bumaba sa 1,731 ang maitalang araw ang kaso ng COVID-19 pagsapit ng katapusan ng Oktubre ayon sa DOH.

Sinabi ni Health Undersecretary Maria Rosario Vergeire, ito ay kung magagawang maibaba sa 4 na araw ang pagtukoy sa tinamaan ng sakit hanggang sa ma-quarantine ang mga ito para hindi na makapanghawa.

Malaki aniya kasi ang nagiging epekto sa bilang ng COVID-19 case kung paano tinutugunan ang mga bagong kaso.

Kaya sinabi ni Vergeire na dapat paghusayin at paikliin ang panahon sa pagtukoy ng mga tinatamaan ng sakit at pag isolate sa kanila.

Bumaba sa 0.61 ang reproduction number sa NCR mula sa 0.74 na naitala nitong nakalipas na linggo.

Ayon sa OCTA research, maging ang 7-day average sa NCR ay bumaba sa 1,933.

Ito na ang pinaka mababang naitala simula noong July 31 hanggang August 6, bago ipatupad ang ECQ sa rehiyon.

Samantala, nananatili naman sa 12 percent ang positivity rate sa NCR.

Kumpiyansa ang Department of the Interior and Local Government (DILG) na handa na ang Metro Manila na magbaba ng alert level system ng quarantine status sa rehiyon.

Ito’y dahil sa patuloy na pagbaba ng bilang ng kaso ng COVID-19 sa National Capital Region (NCR).

Ayon kay Interior Undersecretary Jonathan Malaya, mula sa alert level 4 posibleng ibaba na sa alert level 3 ang NCR at hinihintay na lamang ang pormal na anunsyo nito mula sa Department of Health.

Ani ni Malaya, maganda ang nagiging pagbaba ng reproductive rate, positivity rate at 7-day average attack rate ratio sa Metro Manila.

Inako ni Pangulong Rodrigo Duterte ang sisi matapos magkulang ang supply ng COVID-19 vaccine sa bansa noong unang bahagi ng taon.

Sa kanyang Talk to the People kagabi, inamin ni Pangulong Duterte na tali ang kanyang kamay noon sa pagkuha ng mas marami pang bakuna mula sa ibang bansa.

Ayon sa pangulo, sa kabutihang-palad ay mayroon namang sapat na pondo sa pagbili ng mga COVID-19 vaccine.

Sa kabila nito ay nag-improve naman anya ang vaccination sa bansa dahil sa patuloy na pagdating ng vaccine supply simula noong Setyembre. -Sa panulat ni Drew Nacino

Ayan dapat ninyong maintindihan. Ngayon, kung kasalanan man yan. Walang iba kundi ako na, aaminin ko na yan, ako yung nasa .. naka-upo ngayon sa opisina ko. So dapat somebody has to .. maski na ginusto ko man e, walang mabili. Mabuti na lang nagkaroon  tayo ng konting pera at a.. ang sabi ni Sec. Dominguez, we have the money.. we have the money to pay for the vaccine for all Filipino.

Ibinasura ng Office of the Ombudsman ang kasong katiwalian laban kay dating Department of Tourism (DOT) Sec. Wanda Tulfo-Teo at limang iba pa ukol sa kontrobersyal na P60 milyon na ad placement deal sa pagitan ng dot at PTV-4.

Sa 21 pahinang resolusyon ni Graft Investigator Rosano Oliva na inaprubahan ni Ombudsman Samuel Martires, lumalabas na dinismis ang kasong paglabag sa Republic Act 3019 o Anti-Graft And Corrupt Practices Act dahil sa kawalan ng sapat na ebidensya.

Maliban kay Teo, inabswelto rin ng ombudsman ang kapatid nitong si Ben Tulfo ng Bitag Media Unlimited Inc. At apat na iba pa.

Nag-ugat ang kaso sa kontrobersyal na P60 milyon na advertisement ng DOT sa programa ni Ben Tulfo sa PTV na kilos pronto matapos maglabas ng report ang Commission on Audit (COA) ukol sa umano’y “conflict of interest” dahil sa paglalagay ni Teo ng advertisement sa programa ng kanyang kapatid.

Ngunit lumalabas na walang kinalaman si Teo sa kontrata na pinasok ng PTV at Bitag media ni Ben Tulfo kaugnay sa naturang DOT advertisement.

Nagpakawala ng tubig ang Ambuklao at Binga Dam sa Benguet ngayong araw ayon sa PAGASA.

Ito dahil sa inaasahang malakas na buhos ng ulan bunsod ng bagyong Maring.

Binuksan ang Ambuklao Dam ang kanilang walong gate ng may 10.5 meters.

Anim na gate naman ang binuksan sa Binga Dam sa 13 meters.

Kahapon, nagbukas din ng gate ang nasabing dam dahil rin sa bagyong Maring.

Patuloy ang pagtanggap ng ulat ng Natioinal Disaster Risk Reduction and Management Council (NDRRMC) sa mga local counterparts nito hinggil sa pinsalang idinulot ng bagyong Maring.

Ayon kay NDRRMC Executive Director USec. Ricardo Jalad, ini-ulat nitong umakyat na sa 9 ang bilang ng mga nasasawi.

4 sa mga ito ay mula sa nangyaring flashflood sa Narra sa Palawan, 3 sa nangyaring landslide sa La Trinidad at 1 sa Itogon na kapwa nasa Benguet habang 1 rin dahil sa pagkalunod sa Claveria, Cagayan.

Maliban dito, sinabi rin ni Jalad na may 11 rin ang napaulat na nawawala habang 2 ang nasaktan mula sa 15 naitala nilang insidente ng biglaang pagbaha at 4 na pagguho ng lupa sa mga rehiyon ng Ilocos, Cagayan Valley, MIMAROPA, Western Visayas at Cordillera. —sa panulat ni Jaymark Dagala (Patrol 9)