Patay ang nasa 28 katao habang sugatan naman ang nasa 15 indibidwal matapos mahulog sa bangin ang isang bus sa kanlurang bahagi ng Nepal.
Ayon kay Local Administrator Rom Bahadur Mahat, hindi pa matukoy kung ilan ang sakay ng naturang bus.
Isinugod naman sa ospital ang mga sugatan habang patuloy pang nagsasagawa ng searching operation ang mga awtoridad upang mahanap ang iba pang nawawalang mga pasahero matapos ang insidente. — sa panulat ni Angelica Doctolero
Umabot lang ng sampung minuto ang pagtalakay ng senate committee on finance sa panukalang budget ng Commission on Audit para sa susunod na taon.
Pinangunahan ni senate committee on finance chairman Sonny Angara ang budget hearing kung saan wala itong naging katanungan ukol sa panukalang budget ng COA.
Pinuri naman ni Angara si COA chairman Michael Aguinaldo dahil sa mahusay nitong pamumuno sa ahensya na aniya ay walang naging kontrobersya.
Tiniyak ni Angara na susuportahan ng mayorya ng mga senador ang pagbibigay sa COA ng kailangan nitong budget dahil sa mahalagang papel na ginagampanan nito.
Humirit ang COA na dagdagan ang kanilang budget para sa local travel na kailangan ng kanilang field personnel at dagdag ding budget para sa operational expenses ng satellite offices ng COA sa mga lalawigan.–-mula sa ulat ni Cely Bueno
Umabot sa mahigit 200,000 ang naitalang lumabag sa health protocols at curfew mula nang ipatupad ang alert level 4 sa NCR.
Ayon sa PNP, nakabatay ito sa kanilang datos mula Setyembre 16 hanggang Oktubre 11 ng taong kasalukuyan.
Pinakamarami ang lumabag sa hindi tamang pagsusuot ng facemask at faceshield noong panahong required pa ito sa paglabas ng tahanan gayundin ang mass gathering.
Marami rin sa mga lumabag sa curfew ay iyong mga hindi naman Authorized Persons Outside of Residence (APOR).—mula sa ulat ni Jaymark Dagala
Umakyat na sa siyam ang bilang ng mga nasawi dahil sa pananalasa ng Bagyong Maring sa bansa.
Ayon kay NDRRMC executive director Usec. Ricardo Jalad, 4 sa mga ito ay mula sa nangyaring flashflood sa Narra sa Palawan, 3 sa nangyaring landslide sa La Trinidad at 1 sa Itogon na kapwa nasa Benguet habang isa rin dahil sa pagkalunod sa Claveria, Cagayan
Maliban dito, sinabi rin ni Jalad na may 11 rin ang napaulat na nawawala habang 2 ang nasaktan mula sa 15 naitala nilang insidente ng biglaang pagbaha at 4 na pagguho ng lupa sa mga rehiyon ng Ilocos, Cagayan Valley, Mimaropa, Western Visayas at Cordillera.
Sa ngayon ay patuloy pa rin umano ang pagtanggap ng ulat ng NDRRMC sa mga local counterparts nito hinggil sa pinsalang idinulot ng Bagyong Maring.—mula sa ulat ni Jaymark Dagala
Hawak na ng mga operatiba ng PNP Integrity Monitoring and Enforcement Group (IMEG) ang isang pulis matapos mahuli ito sa aktong nangingikil.
Ito’y nang positibong tanggapin ng pulis ang marked money sa ikinasang entrapment operation sa San Mateo Municipal police station.
Kinilala ni IMEG director P/BGen.Flynn Dongbo ang Dorobong pulis na si police senior Sgt. June Angeles na nakatalaga sa naturang himpilan ng pulisya.
Ayon kay Dongbo, nanghingi si Angeles ng P10K sa hindi pinangalanang babaeng biktima kapalit ng Certificate of Detention ng kaniyang mister na nakakulong.
Nakuha sa suspek ang marked money, 9mm na pistola kasama ang magazine at nasa 26 na bala nito.—mula sa ulat ni Jaymark Dagala (Patrol 9)
Pananagutin ng pamahalaan ang sinumang kandidato o politiko na mapatutunayang nakikipagsabwatan sa CPP-NPA.
Ito ang babala ng Department of the Interior and Local Government (DILG) kasunod ng pagnanais ng mga ito na maipanalo ang darating na halalan.
Ayon kay DILG spokesman Usec. Jonathan Malaya, sa ilalim ng batas, maaaring madiskwalipika sa kanilang kandidatura at makasuhan pa ng administratibo ang sinumang mapatutunayang lumabag.
Sa pulong balitaan ng NTF-ELCAC kahapon, ibinunyag ni NICA deputy director general Abelardo Villacorta na naniningil ng permit to campaign fee ang NPA ng hanggang sa 4 na milyong piso.—mula sa ulat ni Jaymark Dagala
Matinding pagbaha ang naranasan sa ilang bahagi ng Ilocos Sur dahil sa malakas na ulan dala ng Bagyong Maring.
Sa lungsod ng Candon, nagmistulang ilog ang ilang bahagi ng barangay San Nicolas at barangay Oaig Daya.
Binaha rin ang barangay Sta. Lucia sa Narvacan habang hindi naman madaanan ngayon ng mga motorista ang Bayugao bridge sa Santa Cruz matapos itong masira.
Samantala, ayon naman sa provincial disaster risk reduction and management office ng Benguet, nailikas na ang ilang mga pamilya matapos makapagtala ng pagbaha, landslides at rockslides bunsod ng malakas na buhos ng ulan.
Palabas na ng Philippine Area of Responsibility (PAR) ang Bagyong Maring.
Ayon sa Pagasa, huling namataan ang bagyo sa layong 315 kilometro Kanluran ng Calayan, Cagayan.
Taglay nito ang lakas ng hanging umaabot sa 100 kilometro kada oras malapit sa gitna at may pagbugsong umaabot sa 125 kilometro kada oras.
Kumikilos ang Bagyong Maring pa-Kanluran sa bilis na 20 kilometro kada oras.
Sa ngayon ay nakataas ang tropical cyclone wind signal number 2 sa Batanes, Cagayan kasama ang Babuyan Islands, Northern portion ng Isabel, Apayao, Kalinga, Mountain Province, Abra, Ilocos Norte at Ilocos Sur.
Signal number 1 naman sa iba pang bahagi ng Isabela, Nueva Vizcaya, Quirino, Ifugao, Benguet, La Union, Pangasinan, Aurora, Nueva Ecia, Tarlac, Zambales, Pampanga, Bulacan, Northern portion ng Bataan, Northern portion ng Quezon kabilang ang Polillo Islands.
Nagpakawala ng tubig ang Ambuklao at Binga dam sa Benguet ngayong araw ayon sa PAGASA.
Ito dahil sa inaasahang malakas na buhos ng ulan bunsod ng bagyong Maring.
Binuksan ang Ambuklao dam ang kanilang walong gate ng may 10.5 meters.
Anim na gate naman ang binuksan sa Binga dam sa 13 meters.
Kahapon, nagbukas din ng gate ang nasabing dam dahil rin sa bagyong Maring.
Inaprubahan na ni Philippine National Police (PNP) Chief P/Gen. Guillermo Eleazar ang dissmissal order laban kay P/SMSgt. Christopher Salcedo, ang pulis na nakabaril at nakapatay sa binatilyong si Erwin Arnigo na may problema sa pag-iisip sa Valenzuela City noong Mayo.
Ayon kay Eleazar, kaniyang ipinag-utos na tanggalin na sa kanilang hanay si Salcedo matapos ang ginawang review ng Discipline, Law and Order Division na nasa ilalim ng Directorate for Personnel and Records Management sa rekumendasyon ng Internal Affairs Service (IAS).
Magugunitang pinatawan lamang ng IAS ng 40 araw na suspensyon si Salcedo bagay na inalmahan naman ng pamilya Arnigo.
Gayunman, lusot sa mga kasong administratibo tulad ng grave neglect of duty at less grave neglect of duty ang apat pang kasamahan ni Salcedo sa ikinasang anti-illegal gambling operations sa lungsod noong Mayo ng nakalipas na taon kung saan nabaril at napatay si Arnigo.