HEADLINES

Isang barko ang sumadsad sa bahaging sakop ng Nasugbu, Batangas kahapon ng umaga.

Agad na rumesponde ang mga tauhan ng  Philippine Coast Guard (PCG) matapos ang insidente kung saan, napag-alaman na ang domestic vessel na LCT Metal Hawk ay pagmamay-ari umano ng Marine Vest Company na nakatalaga sa Surigao Del Sur.

Nabatid na may lamang 1,000 metrikong toneladang buhangin ang naturang barko at sakay ang nasa 17 crew members nang maganap ang insidente.

Sa ngayon ay inaalam pa ng PCG SUB-Station Nasugbu at Marine Environmental Protection Group – Batangas kung posibleng oil spills ang dahilan ng pagsadsad ng barko.— sa panulat ni Angelica Doctolero

Inihayag ng Department of Foreign Affairs (DFA) na nakauwi na ng bansa ang nasa 91 distressed overseas Filipino workers mula sa bansang Bahrain.

Sakay ng Gulf Air’s direct commercial flight ibiniyahe ang mga Pilipinong nakararanas ng axiety, depression at pananakit sa kanilang mga employer.

Kabilang sa mga napauwi ang mga menor de edad, pardoned detainees, overstaying overseas Filipinos, pregnant women, medical patients, at wards sa embassy shelter.

Nagmistulang ilog ang ilang mga kalsada sa bahagi ng Ilocos Sur dahil sa malakas na ulan dulot ng bagyong Maring.

Ito’y matapos isailalim sa Tropical Cyclone Wind Signal number 2 ang Ilocos Sur maging ang iba pang lugar sa bansa.

Kabilang sa mga binaha ay ang Lungsod ng Candon, Barangay San Nicolas, Barangay Oaig Daya, at Barangay Sta. Lucia sa Narvacan sa nasabing lalawigan.

Sa ngayon, patuloy paring nagpapaalala ang PAGASA sa posibleng maranasang malalakas na pag-ulan.—sa panulat ni Angelica Doctolero

Binalaan ng mga tauhan ng Bacoor Police Station ang mga Dental Clinic laban sa mga holdaper.

Ayon sa public Information Officer ng Bacoor police na si Police Lt. Janice De Guzman, target ngayon ng mga holdaper ang mga klinika sa iba’t-ibang lugar sa Metro Manila maging sa mga lalawigang sakop nito.

Nabatid na isang klinika sa lugar ang tinarget ng holdaper na kinilalang si John Michael Romero matapos makuhanan sa isang CCTV ang ginawang krimen.

Sa ngayon, mino-monitor na ng Bacoor police ang mga clinic sa lugar upang maiwasan ang iba’t-ibang insidente.— sa panulat ni Angelica Doctolero

Kulong ang 39-anyos na lalaki matapos tumakas sa isang checkpoint at mahulihan ng iligal na droga sa bahagi ng Brgy. Bunawan, Davao City.

Ayon sa mga otoridad, dumaan sa checkpoint ang isang negosyante pero nang harangin ito ng mga pulis ay agad nitong pinaharurot ang kaniyang sasakyan.

Dito na hinabol ng mga pulis ang suspek na bumangga naman sa isang gas pump ng isang gasolinahan.

Nakuha sa loob ng sasakyan ang dalawang maliit na sachet ng pinaniniwalaang shabu.

Nasa kustodiya na ng bunawan police station ang suspek na nahaharap sa patong-patong na kaso.—sa panulat ni Angelica Doctolero

Dapat na palawigin pa ang Alert level 4 sa National Capital Region (NCR) kahit na bumababa ang kaso ng COVID-19 sa bansa.

Ayon sa isang grupo ng mga doktor, mas mainam sa bansa ang pagpapatuloy ng paghihigpit sa publiko para magtuloy-tuloy pa ang magandang bilang sa kaso ng COVID-19.

Iniiwasan kasi na muling dumami ang kaso ng nakakahawang sakit sa bansa.

Matatandaan na una nang sinabi ng Malacañang na posible nilang ibaba ang alert level system sa Metro Manila, sakaling matapos ang alert level 4 sa Oktubre 15.

Pero sa naging pahayag ni Philippine College of Physicians (PCP) President Dr. Maricar Limpin, hintayin na lamang na mas mapataas ang numero ng mga taong nabakunahan bago luwagan ang alert level system sa Metro Manila.— sa panulat ni Angelica Doctolero