Suportado ng OCTA Research Group ang panukalang ibaba ang alert level sa NCR.
Sinabi ni Dr. Guido David, Fellow ng OCTA Research na posible nang ibaba sa alert level 3 ang sitwasyon sa Metro Manila sa unang linggo pa lamanbg ng Oktubre.
U ubra pa nga aniyang maging alert level 2 ang alert level sa NCR ..base na rin sa metrics ng OCTA Research.
Una nang inihayag ni MMDA Chairman Benhur Abalos na pabor siyang ibaba ang alert level 4 sa NCR.
Itinalaga na ang bagong general manager ng MMDA.
Pinalitan ni Atty. Romando “Don” Artes bilang MMDA GM si Jojo Garcia na nag resign para tumakbo sa pagka kongresista sa 2022 National Elections.
Si Artes ay nagsilbing Assistant GM for Finance and Administration ng MMDA.
Kinansela ng COMELEC ang Certificates of Candidacy (COC) ng independent candidate na si Arlene Josephine Butay.
Ito ayon kay COMELEC Spokesperson James Jimenez ay dahil dalawa ang COC na isinumite ni Butay – isa sa pagka bise presidente at isa sa pagka senador.
Nakasaad sa COMELEC regulations na ang kandidatong maghahain ng COC para sa dalawa o mas marami pang posisyon ay hindi magiging eligibile sa mga tatakbuhan nito.
Pinatitigil ng National Telecommunications Commission (NTC) ang e-commerce platforms na Lazada, Shopee at Facebook Marketplace ang pagbebenta ng SMS blasting devices.
Kasunod na rin ito ng emergency alert na ipinadala habang naghahain ng kanyang certificate of candidacy sa pagka-presidente si dating senador Ferdinand Bongbong Marcos.
Ayon sa NTC, ang pagbebenta ng text o SMS blaster machines at kaparehong equipment ay paglabag sa radio control law at iba pang regulasyon tulad ng memorandum order ng ahensya o prohibition of portable cellular mobile repeater and portable cell site equipment.
Sinabi ng NTC na kailangang magpaliwanag ng e-commerce platforms sa susunod na labing limang araw kung bakit hindi dapat mapanagot sa mga paglabag at hindi dapat kumpiskahin ang mga “violative” products.
Bibigyan ng ayuda ng Department of Trade and Industry (DTI) ang mga kumpanya para lamang maibigay ang 13th month pay sa kanilang mga empleyado.
Ipinabatid ni DTI Secretary Ramon Lopez na plano nilang gumawa ng lending facility sa pamamagitan ng Small Business Corporation (SB CORP) kung saan makakautang ang mga negosyanteng labis na naapektuhan ng COVID-19 pandemic ang kanilang negosyo.
Ang naturang hakbang ayon kay Lopez ay tulad din nang ginawa nila nuong isang taon na bilang pagsuporta sa micro, small and medium enterprises para maibigay ang 13th month pay na nakasaad sa batas.
Nakikipag ugnayan na rin sila aniya sa DOLE hinggil sa nasabing usapin.
Pinaplantsa na ni pinoy boxing champion Nonito Donaire, Jr. ang laban nito sa Disyembre.
Makakasagupa ni Donaire ang WBC mandatory challenger at ngayo’y interim champion na si Raymart Gaballo ng Polomolok, Cotabato.
Ayon kay Donaire, Disyembre 11 ang napili nilang petsa ng laban subalit hihintayin pa nilang mapirmahan ang kontrata.
Disyembre 2020 nang makansela ang laban ni Donaire kay WBC Champion Nordine Oubaali dahil sa COVID-19 testing issue.
Hindi rin natuloy ang laban ni Donaire kay John Riel Casimero dahil sa isyu ng testing at word war ng magkabilang kampo.
Nasabat ng mga tauhan ng Bureau of Customs (BOC) ang nasa mahigit 4-M halaga ng mga smuggled cigarettes sa Zamboanga City.
Ayon sa mga otoridad ang mga nakumpiskang sigarilyo ay sakay ng dalawang bangkang de motor sa karagatang sakop ng nabanggit na lugar.
Nabatid na nasa kabuuang 137 master case na mga sigarilyo ang nakumpiska na ngayon ay isasailalim sa seizure and forfeiture proceeding dahil sa paglabag sa section 1113 ng Customs Modernization and Tariff Act (CMTA). —sa panulat ni Angelica Doctolero
Patay sa engkwentro ang dalawang tulak ng iligal na droga matapos makipagbarilan sa mga pulis sa ikinasang drug buy-bust operation sa barangay San Roque, Nueva Ecija.
Kinilala ang dalawang nasawi na si Randy Boy Acquiat, 33-anyos at Jonathan Tipano, 33-anyos.
Sa imbestigasyon ng mga otoridad, nagsagawa ng buy-bust ang Drug Enforcement Team ng Gapan City Police sa pakikipagkoordinasyon sa Philippine Drug Enforcement Agency (PDEA), laban sa dalawang suspek sa nabanggit na lugar.
Ayon kay P/Lt.Col. Alexie Desamito, isang poseur buyer ang nagpanggap na bibili ng iligal na droga kung saan, nang akmang aarestuhin na ang dalawang suspek ay nanlaban ang mga ito saka pinaulanan ng bala ang mga operatiba.
Swerte namang sumablay ang mga ito pero gumanti ng putok ng baril ang mga otoridad dahilan ng kanilang agarang pagkasawi.
Nakuha sa pinangyarihang krimen ang 15-plastic sachet ng umano’y shabu na abaot sa 75 gramo ang timbang at nagkakahalaga ng kalahating milyong piso.
Nakuha rin ang isang caliber .45 pistol at isang caliber .38 revolver mula sa mga nasawing suspek.
Sa ngayon iniimbestigahan pa ng mga otoridad kung may kasabawat pa ang mga nasawing suspek. —sa panulat ni Angelica Doctolero
Pansamantalang isinara ng Department of Public Works and Highways – Bureau of Maintenance (DPWH-BOM) ang nasa 15 national road sa bansa bunsod ng bagyong Maring at tropical depression Nando.
Dahil dito, hindi muna pinadadaanan sa mga motorista ang ilang lugar kabilang na ang walong (8) national road sections sa Cordillera Administrative Region (CAR), apat (4) sa Region 1, dalawa (2) sa Region 2 at isa (1) sa Region 7 dahil sa nagbagsakang mga puno at nasirang mga tulay.
Sarado din ang ilang mga kalsada sa ilan pang lugar sa bansa dahil pa rin sa patuloy na pag-ulan na dala ng pinagsamang bagyong maring at tropical depression Nando. —sa panulat ni Angelica Doctolero
Aabot sa 5,514 ang bilang ng mga contact tracer ang dineploy ng National Task Force (NTF) against COVID-19.
Ayon kay Defense Secretary Delfin Lorenzana, nasa mahigit 136 na ang kabuuang bilang ng mga contact tracers na tutulong upang puksain ang nakakahawang sakit.
Sinabi din ni Lorenzana na mula sa 31% noong nakaraang linggo ay bumaba na sa 27% ang occupancy rate dahilan para mas dumadami ang mga bakanteng beds sa mga ospital sa bansa.
Samantala, patuloy namang bumababa ang Healthcare Utilization rate kung saan, mula 68% noong September 20 ay bumaba na ito sa 64% noong September 27 hanggang October 1.
Ayon sa NTF, patuloy silang lalaban upang maabot ang herd immunity at population protection sa bansa.