HEADLINES

Pinag-aaralan ngayon ng Department of Education (DepEd) na payagan ang ilang international schools sa Metro Manila na magsagawa ng face-to-face classes.

Ayon kay Education Undersecretary Nepomuceno Malaluan, ilang international school ang nagsumite ng kanilang plano at interes na makilahok sa pilot implementation ng limited face-to-face classes.

Kaya ani Nepomuceno, dadaan ito sa masusuing  pag-aaral lalo’t bumubuo ngayon ang DepEd ng mahigpit na guideline para matiyak ang kaligtasan ng lahat ng makikilahok sa pilot implementation ng face-to-face classes.

Sa ngayon ay mayroong isandaang pampublikong paaralan at dalawampung pribado ang nakatakdang magsagawa ng face-to-face classes sa Nobyembre 15.

Nag-withdraw ng kaniyang kandidatura bilang senador si Noli De Castro.

Ito ang kaniyang inanunsyo, wala pang isang linggo ang nakalilipas matapos niyang magsumite ng certificate of candidacy sa COMELEC.

Ayon kay De Castro, nagkaroon ng pagbabago sa kaniyang plano kaya napagdesisyunan niyang umatras sa pagtakbo.

Nais umano niya itong iparating sa kaniyang mga kaibigan at taga suporta na naghahanda na sanang tumulong sa kaniyang kandidatura.

Ani De Castro, naniniwala siyang maipagpapatuloy niya ang serbisyo publiko sa kaniyang pagiging mamamahayag.

Pabor si MMDA Chairman Benhur Abalos sa pagpapababa ng alert level 3 mula sa alert level 4 ng quarantine status sa Metro Manila.

Paliwanag ni Abalos, kapansin-pansin na ang pagbaba ng 2-week growth rate na nagsimula  sa 113% at ngayon ay -14%.

Gayunman, sinabi ni Abalos na pinauubaya pa rin nila sa Department of Health ang deisyon kaugnay sa magiging estado ng Metro Manila.

Nakatakdang magtapos ang alert level 4 sa Metro Manila sa Oktubre 15.

Pinagpapaliwanag ni Senador Imee Marcos ang DSWD sa hindi tugmang datos nito hinggil sa pamamahagi ng ayuda sa ilalim ng Social Amelioration Program (SAP) batay sa Bayanihan 1 at 2.

Sinabi ni Marcos na magulo ang mga numerong ibinigay sa kanila ng DSWD kaugnay sa dami nang nabigyan ng ayuda nuong nakalipas na taon at maging sa pondong ipinalabas para rito.

Sa budget hearing ng Senado, ini report ng DSWD na mahigit 90% na nilang natatapos ang pamamahagi ng ayuda subalit napuna ng mga Senador na may report din ang DSWD na nasa 80% ang obligation rate sa pondong pang-ayuda.

Binigyang diin ni Marcos na mahalagang malinaw ang report ng DSWD dahil maaaring maglaan muli ang gobyerno ng pondo para sa isa o dalawang ikot pa ng ayuda kasunod ng mga posible pang lockdown bunsod ng Delta variant at iba pang variant ng COVID-19. —sa ulat ni Cely Ortega Bueno (Patrol 19)

Nagbitiw na sa tungkulin ang Chief of Staff ni Manila Mayor Isko Moreno na si Cesar Chavez.

Ayon kay Chavez, inalok siyang magbalik sa isang radio station bilang brodkaster na una niyang trabaho.

Masaya aniya siyang babalik sa kanyang first love at tapos na siya sa government service na minahal din naman nya.

Kasabay nito, nagpasalamat si Chavez kay Moreno sa pagkakataong maging bahagi ng team nito sa lungsod at marami naman aniyang magagaling at matitinong tao sa city hall.

Suspendido ang operasyon ng konsulado ng bansa sa Macau Special Administrative Region (SAR) dahil sa bagyong Kompasu.

Kasunod na rin ito ng anunsyo ng gobyerno ng Macau hinggil sa typhoon signal number 8 ng bagyong Kompasu dahilan sa pag iral din ng blue storm surge warning sa rehiyon.

Pinaalalahanan ng konsulado ang mga Pinoy sa Macau na manatiling naka monitor sa lagay ng panahon sa smg Official Webpage at ihanda ang fully charged celfon at go bag na naglalaman ng damit, pagkain, mga gamot, tubig at iba pang essentials.

Para sa emergency situations, maaaring tumawag sa Macau emergency hotline 999 o sa hotline ng konsulado na +853 6698 1900.

Kailangang i-report sa taumbayan ni Finance Secretary Carlos Dominguez, III kung magkano na ang kinita ng gobyerno sa excise tax sa produktong petrolyo.

Mungkahi ito ni Senador Risa Hontiveros sa harap ng panawagan na isuspinde muna ang ipinapataw na excise tax sa langis sa harap ng serye ng oil price hike.

Sinabi ni Hontiveros na sana ay gamitin ang  nakolektang excise tax sa langis sa service contracting bilang tulong sa mga pasahero, driver at operator ng public transportation para hindi na madagdagan ang hirap ng mga Pilipino.

Samantala, inihayag ni Senador Joel Villanueva na tinitingnan  nila ang posibilidad na isupinde muna ang pinapataw na excise tax sa produktong petrolyo para maibsan ang dagdag pasanin na idudulot ng serye ng oil price hike sa mga commuter at mga manggagawa. —sa ulat ni Cely Ortega Bueno (Patrol 19)

Service contracting sana ang sagot para kahit magmahal ang diesel at gasolina ay magiging abot kaya pa rin ang pamasahe dahil sa gobyerno ang sasalo nito.

Ayon ito kay Senador Risa Hontiveros sa gitna na rin nang hirit ng ilang transport group na P3 dagdag sa pasahe sa jeep dahil sa sunud-sunod na pagtaas ng presyo ng langis sa bansa.

Sinabi ni Hontiveros na mayruon pang P3-B budget ang gobyerno para sa service contracting at libreng sakay.

Dapat anyang dagdagan pa ng DOTr at malakaniyang ang budget sa service contracting gamit ang pondong nakatengga lang.

Ang service contracting ay ipinatupad ngayong may pandemya bilang tulong sa mga pasahero at mga driver sa pampublikong  transportasyon. —sa ulat ni Cely Ortega Bueno (Patrol 19)

Tiwala sina Senate President Vicente Tito Sotto, III, Senate Minority Leader Franklin Drilon at Blue Ribbon Committee Chair Richard Gordon na papabor sa Senado ang magiging pasya ng Korte Suprema sa isinumiteng petisyon ni Pharmally Pharmaceutical Corporation Director Linconn Ong.

Ayon kay Sotto, marami nang naging desisyon at jurisprudence kung saan pinaboran ng high tribunal ang Senado sa pagkulong sa mga resource person na ayaw makipag tulungan sa imbestigasyon ng Senado.

Sinabi naman ni Drilon na kumpiyansa siyang “legally correct” ang pagkulong ng Senado kay Ong matapos tukuyin ang desisyon ng Supreme Court  sa Arnault vs Nazareno Case noong 1950 kung saan   malinaw na legal ang patuloy na pag detain ng Senado kay Ong dahil sa pagiging evasive at pagtangging sagutin ang ilang mahahalagang tanong ng mga Senador.

Inihayag nina Sotto at Drilon na ang Senate Legal Counsel ang sasagot sa petisyon ni Ong sa Korte Suprema na kumukwestyon sa patuloy nyang detention sa Senado subalit wala namang patakaran na nagbabawal sa Senate President para i authorize ang Blue Ribbon na humawak at sumagot sa petisyon ni Ong. —sa ulat ni Cely Ortega Bueno (Patrol 19)

Posibleng magkaruon ng magandang pasko ngayong taon ang mga Pilipino.

Binigyang diin ito ni Dr. Guido David, Fellow ng OCTA Research dahil hindi lamang liwanag ang nakikita nila sa sitwasyon ng COVID-19 kundi end game na.

Sinabi ni David na ang 7 day average sa NCR ay maaari pang mabawasan ng mas mababa pa sa isanlibo kada araw bago mag Nobyembre.

Posible aniyang bumaba pa sa 600 cases kada araw ang average number ng COVID-19 cases kaya’t sa Nobyembre ay posibleng maging low risk na rin ang NCR na nagtatagumpay kontra Delta variant.