Sumirit pa sa mahigit 2.6-M ang kabuuang kumpirmadong kaso ng COVID-19 kasama na ang 7,181 na mga bagong kaso ng virus.
Dahil dito, ipinabatid ng DOH na nasa 82,411 ang active cases kung saan 75.3% ang mild, 12.1% ang asymptomatic, 3.7% ang severe at 1.6% ang critical condition.
Sumampa na sa mahigit 2.5-M ang total recoveries matapos bagong gumaling ang nasa 6,889 patients.
Samantala, lumampas na sa 40,000 o nasa 40,069 ang death toll kabilang ang 173 na mga bagong nasawi sa COVID-19.
Isasailalim na sa alert level 3 ang Metro Manila simula sa Oktubre 16 hanggang 31.
Kasunod na rin ito nang pag apruba ng IATF sa rekomendasyong ibaba sa alert level 3 mula sa alert level 4 ang NCR matapos mabawasan ang kaso ng COVID-19.
Sa ilalim ng alert level 3, papayagan nang mag operate sa 30% capacity ang ilang establishment bukod sa mga restaurant at personal care services anuman ang vaccination status ng customer.
Kabilang dito ang museums, libraries, internet cafes, billiard halls, amusement arcades, casinos, cockfighting, lottery, gyms, spa at leisure centers.
Inaprubahan din ng IATF ang paglalagay sa ilalim ng MECQ ang Apayao, Kalinga, Batanes, Bulacan, Bataan, Cavite, Rizal, Laguna, Naga City, Zamboanga City at Zamboanga Del Norte.
Kabilang sa mga nasa ilalim naman ng GCQ with heightened restrictions ang Abra, Baguio City, Ilocos Sur, Pangasinan, Cagayan, Isabela, City of Santiago, Nueva Vizcaya, Quirino, Quezon, Batangas, Bacolod City, Capiz, Lapu Lapu City, Negros Oriental, Bohol, Zamboanga Del Sur, Misamis Oriental, Cagayan De Oro City, Davao Del Norte, Davao Occidental, Davao De Oro, Butuan City at Surigao Del Sur.
Bukod pa ito sa Ilocos Norte, Dagupan City, Ifugao, Benguet, Tarlac, Lucena City, Occidental Mindoro, Oriental Mindoro, Puerto Princesa, Marinduque, Albay, Camarines Norte, Aklan, Antique, Guimaras, Negros Occidental, Iloilo City, Iloilo Province, Cebu City, Cebu Province, Mandaue City, Siquijor, Tacloban City.
Isang kongresista ang pumalit sa puwesto kay DPWH Mark Villar.
Nanumpa na kay Executive Secretary Salvador Medialdea si Congressman Roger Mercado bilang pinuno ng DPWH.
Sa 18th congress, nasa 66 na batas ang iniakda ni Mercado na nagsilbing Vice Chair ng House Committee on Public Works and Highways.
Bago ang 18th congress, si Mercado ay naging bahagi rin ng 8th to 10th congress, 14th, 15th at 17th Congress.
Nilinaw ni North Korean Leader Kim Jong Un na para sa depensa sa bansa at hindi sa giyera ang pagpapalakas nila ng kanilang militar.
Ito ang inihayag ni Kim sa defense exhibition kung saan ipinakita ang iba’t ibang uri ng malalakas na missiles.
Una nang nagkaroon ng missile test ang North Korea ng kanilang hypersonic at anti-craft missiles.
Kaisa ng mga lokal na pamahalaan ang mga tropa ng Naval Forces Northern Luzon ng Philippine Navy sa pagtulong sa mga apektado ng bagyong Maring sa Hilagang Luzon.
Ito’y kasunod ng isinagawa nilang search and rescue operations sa Cagayan, Benguet, Ilocos Sur at La Union na matinding sinalanta ng bagyo.
35 pamilya ang inilikas ng navy sa Brgy. Aridowen, Sta. Teresita sa Cagayan habang search and retrival naman ang ginawa sa mga biktima ng pagbaha at landslide sa Brgy. Roxas, Baguio City.
Nagkasa rin ng operasyon ang navy sa Brgy. Susoc Sur sa Luna, La Union habang maliban sa pagsagip ay nagpadala rin ng grupo ang navy para sa road clearing operation sa Brgy. Pallogan sa bayan ng Tagudin, Ilocos Sur.
Namahagi rin ng relief packs ang mga tauhan ng navy sa hiwalay na operasyon nito sa Brgy. Pudoc sa nabanggit ding lalawigan. —sa ulat ni Jaymark Dagala (Patrol 9)
Nadagdagan pa ng dalawa ang bilang ng mga napaulat na nasawi sa pananalasa ng bagyong Maring na mula sa dating 11 ay umakyat na ito sa 13.
Ito ang nakasaad sa pinakahuling situationer report ng National Disaster Risk Reduction and Management Council (NDRRMC) kaninang umaga.
Batay sa impormasyong natanggap ng NDRRMC, isa sa mga nasawi ay isang 35 anyos na babae na natabunan ng gumuhong lupa sa Brgy. Tiangan, San Emilio sa Ilocos Sur.
Habang isang 52 anyos na lalaki naman ang nalunod matapos tangayun ng rumaragasang flashflood sa Brgy. Candilacan, bayan ng Sta. Cruz sa Ilocos Sur.
Gayunman, paglilinaw ng NDRRMC na under validation pa ang lahat ng mga datos na nakararating sa kanila mula sa mga rehiyong apektado ng kalamidad. —sa ulat ni Jaymark Dagala (Patrol 9)
Inatasan ng Philippine National Police (PNP) ang mga tauhan nito na makipag-ugnayan sa kanilang mga lokal na pamahalaan para sa anumang tulong o pag-alalay na kailangan para sa mga nasalanta ng bagyong Maring.
Kasabay nito, puspusan na rin ang ginagawang road clearing operations ng pulisya sa mga lugar na matinding hinagupit ng nagdaang bagyo.
Aminado si PNP Chief P/Gen. Guillermo Eleazar na sa kabila ng kanilang mga babala ay marami pa rin ang naipit sa kanilang mga tahanan sa takot na malimas ang kanilang mga naipundar.
Wika niya, nauunawaan niya ang ganitong sitwasyon lalo pa’t hindi inaasahan ng mga residente na maaapektuhan ang kanilang lugar ng mga pagbaha o pagguho ng lupa at dahil na rin sa pangambang mahawaan ng COVID-19.
Kaya naman sinabi ni Eleazar na kabilang sa mga plano na kanilang ikakasa sa tuwing may kalamidad ay kung paano makaiiwas sa banta ng virus nang hindi nalalagay din sa balag ng alanganin ang buhay at kaligtasan ng publiko sa panahon ng sakuna. —sa ulat ni Jaymark Dagala (Patrol 9)
Patay ang 11 taong gulang na bata matapos madaganan ng steel railing sa may P. Burgos Street sa Cebu City.
Batay sa ulat, nagtitinda ng kandila ang bata kasama ang kaniyang nanay nang mangyari ang insidente.
Nakaupo umano ang bata nang bigla itong bagsakan ng railings.
Samantala, isa namang limang taong gulang na batang babae ang natagpuang patay sa isang creek sa Camarines Sur.
Kinilala ang biktima na si Marie Claire Abad na huli umanong nakitang buhay noong Lunes ng hapon.
Kasalukuyang iniimbestigahan pa ng mga awtoridad ang dahilan ng pagkamatay ng naturang bata.
Patuloy ang isinasagawang search at rescue operation sa dalawang batang nawawala sa landslide sa Baguio City.
Kinilala ng Baguio City Government ang dalawang bata na si Nathalia Ocampo, apat na taong gulang at Jodirose Tolibas, 12 taong gulang.
Una nang narekober ang kaanak ng mga ito na si Alfredo Ocampo habang sugatan naman ang asawa nitong si Marjorie.
Nasa 29 na insidente ng landslide ang naitala sa lungsod dahil sa pananalasa ng bagyong Maring.
Patay ang dalawang bata matapos malunod sa Dasmariñas, Cavite.
Sa pagsasagawa ng rescue operation ng CDRRMO Dasmariñas, natagpuan ang dalawang batang may edad onse at trese anyos sa malalim na bahagi ng ilog matapos ang dalawang oras na paghahanap sa mga ito sa Pasong Baca River.
Nagkayayaan umano ang mga kaibigan ng mga bata na maligo sa nasabing ilog.
Tatlong bata rin ang nasawi sa lawa sa barangay Pulanglupa Uno, Las Piñas matapos ding malunod.
Ang mga ito ay nasa edad, pito, siyam at labing dalawang taong gulang.
Ayon sa mga kaanak, hindi nila alam na nagtungo ang mga bata sa lawa para maligo sa kasagsagan ng pag-ulan.