HEADLINES

Muling umapela sa gobyerno ang mga negosyante na itaas pa ang kanilang operating capacity makaraang ibaba sa level 3 ang alert level system sa Metro Manila, simula Oktubre 16.

Iginiit ni Employers Confederation of the Philippines o ECOP President Sergio Ortiz Luis na walang negosyong makababawi sa 30% operational capacity kaya dapat itaas na ito agad sa 70%.

Ayon kay Luis, imposibleng sumaya ang pasko kung maliit lamang ang kapasidad ng mga negosyo na magreresulta sa maliit na kita.

Kinatigan din ni Eric Teng ng Resto Ph ang hirit ng ECOP upang mabawasan anya ang “casualty” sa restaurant sa industry.

Epektibo ang alert level 3 sa National Capital Region hanggang Oktubre 31.—sa panulat ni Drew Nacino

Sisimulan na bukas ng Department Of Science and Technology (DOST) ang clinical trial sa anti-parasitic drug na Ivermectin.

Ito’y upang mabatid kung epektibo at ligtas ang Ivermectin sa mga pasyenteng may asymptomatic at mild COVID-19 na naka-confine sa isolation facilities.

Ayon kay DOST Secretary Fortunato De La Peña,tatagal ang pag-aaral ng walong buwan.

Magmumula anya sa University of the Philippines Manila – Philippine General Hospital ang project team sa pangunguna ni Dr. Aileen Wang na kasalukuyang nakikipag-ugnayan sa Local Government Units.

Nasa 1,464 asymptomatic at non-severe Filipino COVID-19 patients na edad 18 pataas ang kasali sa clinical trial.—sa panulat ni Drew Nacino

Timbog ang isang mayoralty candidate sa Mountain Province matapos mahulihan ng P2.2 milyon na halaga ng marijuana sa checkpoint, sa bayan ng Sadanga.

Kinilala ng PDEA at PNP ang suspek na si Sonny Kalaw, 36 anyos, dating pulis at kuma-kandidato sa pagka-Alkalde ng naturang bayan sa 2022 elections.

Naaresto rin ang apat na kasama ni kalaw na kinilalang sina Jonathan Abella, 37 anyos; Jeric Sansano, 30; Samson Damaso, 28 anyos at isang 17 anyos na lalaki.

Narekober sa mga ito ang labinsyam na bricks ng pinatuyong dahon ng marijuana at mga bala ng 9mm pistol.

Sa isa namang hiwalay na operasyon, nasa P18.4 milyon na halaga ng marijuana ang nasabat din sa Sadanga  habang apat na suspek ang naaresto.—sa panulat ni Drew Nacino

Nasa P6.5 milyong halaga ng ecstasy ang nasamsam ng pinagsanib puwersa ng Bureau Of Customs, Philippine Drug Enforcement Agency at airport police sa Pasay City.

Nagsagawa ang BOC ng random inspection sa central mail exchange center sa Pasay City kung saan dumaan sa x-ray ang mga padala at lumabas na may kahina-hinalang laman ang dalawang improvised pouches.

Nagsagawa agad ng physical examination ang mga otoridad at tumambad sa kanila ang tinatayang tatlong libo walundaang ecstasy tablet na hugis “hexagon” at bungo na nagmula sa Germany.

Naaresto naman ang suspek at consignee ng kontrabando na kinilalang si Mary Grace Vergara ng San Fernando, Pampanga na natiyempuhan sa control delivery ng Philpost office sa naturang lugar.

Nahaharap si Vergara sa kasong paglabag sa comprehensive Dangerous Drugs Act of 2002 at customs modernization and tariff act.—sa panulat ni Drew Nacino

Muling pinaalalahanan ng Commission on Elections ang mga kuwalipikadong Overseas Filipino o mga nataon na nasa ibang bansa sa araw ng 2022 elections na humabol na sa voters registration.

Ayon sa COMELEC, dapat samantalahin ang extended overseas voter registration na matatapos ngayong araw.

Matatapos sana ang registration sa Setyembre 30 pero pinalawig ito mula Oktubre 1 hanggang 14 sa lahat ng Philippine embassies at consulates sa ibang bansa.

Pinayuhan naman ng COMELEC ang mga magpaparehistro na i-check ang oras ng operasyon ng bawat tanggapan bago magtungo.—sa panulat ni Drew Nacino

Aminado ang Commission on Higher Education na nakadepende ang pagbabalik ng face-to-face classes sa kolehiyo sa pangangailangan ng physical classes upang makamit ang skill at curriculum flexibility.

Ipinunto ni CHED Chairman Prospero De Vera na magkakaroon ng “uniformity” sa implementasyon ng pagbabalik ng limitadong in-person classes.

Ayon kay De Vera, ang mga degree program ang kanilang magiging batayan sa halip na ang lebel ng quarantine classifications.

Prayoridad anya ang mga estudyanteng kailangan ng hands-on experience upang magkaroon ng dagdag na skills

Ipinaliwanag ni De Vera na mahalaga ang physical classes upang mahubog ang kakayahan ng mga estudyante lalo ang mga ga-graduate, kaya’t kabilang sa unang isasalang ang medicine at allied health and sciences courses. —sa panulat ni Drew Nacino

Sumampa na sa P692 milyon ang pinsalang dulot ng bagyong Maring sa sektor ng agrikultura.

Naitala ng Department of Agriculture ang pinsala sa Cordillera, Ilocos, Cagayan Valley, Central Luzon, Bicol at Western Visayas regions.

Kabilang sa mga naapektuhan ang mga palayan, maisan, high value crops, livestock at fisheries.

Aabot sa 36,354 metric tons na pananim at 32,882 hectares ng taniman ang naapektuhan ng kalamidad.

Tinaya naman sa 29,063 na magsasaka sa Cordillera, Ilocos, Cagayan Valley, Central Luzon, Bicol Region at Western Visayas regions ang apektado.—sa panulat ni Drew Nacino

Inalis na ng gobyerno ang mandatory quarantine sa mga pasilidad para sa fully vaccinated na papasok sa bansa.

Ito ayon kay Presidential Spokesman Harry Roque ay kung magne-negatibo sa RT PCR test, 72 oras o tatlong araw bago umalis sa bansang panggagalingan nila.

Sa halip, sinabi ni Roque na ang mga traveler na ito ay o obligahing sumailalim na lamang sa home quarantine sa loob ng 14 na oras.

Bubuksan muli ng CBCP ang undas online para sa mga hindi makakabisita sa sementeryo sa kanilang mga namayapang mahal sa buhay.

Ito ay matapos ipasara ng Metro Manila Mayors ang public at private cemeteries, memorial parks at columbaria mula Oktubre 29 hanggang Nobyembre 2 para maiwasan ang superspreader events sa paggunita sa araw ng mga patay.

Ayon kay Fr. Jerome Secillano, CBCP Secretary of the Permanent Committee on Public Affairs, magbibigay sila ng liturgy para maipagdasal ang mga namatay nang kaanak kahit nasa bahay na rin.

Pinaaalis na ni Congressman Ronnie Ong sa IATF ang quarantine at RT-PCR requirement sa tourist destinations para sa mga fully vaccinated basta’t mayruon lamang pre-booked accommodation at pre arranged itinerary.

Bukod dito, binigyang diin ni Ong na ang lahat ng hotel staff, guides, drivers at iba ang tourism personnel ay dapat na fully vaccinated na rin.

Sinabi ni Ong na ang mga lugar na bubuksan para sa turismo ay dapat sa mga lugar lamang na mayruong alert levels na katumbas ng sa Moderate General Community Quarantine at General Community Quarantne.

Naniniwala si Ong na handa na ang ilang lugar sa bansa para buksan ang turismo sa fully vaccinated  local at international travelers.