HEADLINES

Nasa 12,686 COVID-19 vaccines na ang nasayang mula sa mahigit 87 milyon na bakunang natanggap ng Pilipinas, simula noong Marso.

Kinumpirma ni Health Undersecretary Myrna Cabotaje, Chairperson ng National COVID-19 vaccination operations center, na karamihan sa mga nasayang na bakuna ay nasira dahil sa pabago-bagong temperatura.

Mayroon din anyang nasunog tulad sa Cotabato at San Nicolas, Ilocos Norte, may nahulog habang ang iba ay walang label kaya’t hindi naiturok.

Tinaya naman ni Cabotaje sa P6.8 na milyon ang halaga ng mga nasayang na bakuna.—sa panulat ni Drew Nacino

Isa ang patay habang isa ang sugatan sa sunog sa Baseco compound sa Tondo, Maynila.

Bandang alas-7 ng gabi nang sumiklab ang apoy sa isang residential area.

Umabot ito sa ika-2 alarma at tuluyang naapula ng Bureau of Fire Protection (BFP) bago mag-aalas-10.

Inaalam na kung ano ang sanhi ng pagkalat ng apoy na nagsimula sa ground floor ng isang gusali.—sa panulat ni Drew Nacino

Balik-operasyon na ang mga sinehan sa Metro Manila matapos ibaba sa alert level 3 ang quarantine status simula Oktubre 16.

Pinayagan ang mga sinehan na mag-operate sa ilalim ng alert level 3 sa maximum ng 30% indoor capacity para sa mga fully vaccinated individuals at 50% outdoor venue capacity.

Dapat ding bakunado ang mga cinemas at movie house workers at employees.

Una nang inihayag ng Cinema Exhibitor Association of the Philippines na maglalatag sila ng mahigpit na protocol sa pagpapapasok ng mga manonood sa mga sinehan.

Kabilang sa mga ipatutupad ang one-seat-apart policy, panonood habang naka-facemask habang ipagbabawal ang pagkain.

Simula marso noong isang taon, aabot na sa P21 bilyon ang nalugi sakita ng mga sinehan at mahigit 300k cinema workers ang nawalan ng trabaho.—sa panulat ni Drew Nacino

Posibleng umabot sa 50 hanggang 70 milyon na Pilipino ang marerehistro hanggang Disyembre sa Philippine Identification System o PhilSys, na kilala rin bilang national ID.

Ito, ayon kay NEDA Secretary Karl Kendrick Chua, ay kung patuloy na luluwag ang quarantine restrictions.

Sa pagdinig ng Senado sa proposed 2022 budget ng NEDA at attached agencies nito,inihayag ni Chua na as of Oktubre 8, nasa 43.2 milyon na ang rehistrado sa step 1 ng national ID system.

Aabot naman sa 35.9 milyon ang nakatapos na sa step 2 kung saan kinunan na sila ng biometrics habang sa susunod na taon, 22 milyon pa ang target na idagdag sa mga nakarehistro sa PhilSys bukod sa 5 milyon OFWs.

Kasama rin sa plano ang pagpapalabas ng 37 milyon ID cards habang sa susunod na taon din anya sisimulan na ang paggamit ng mobile ID at iba pang digital credentials.—sa panulat ni Drew Nacino

Dapat ng ibalik ang National Kidney Transplant Institute at Philippine Heart Center sa primary purpose nito dahil inaasahang magiging bahagi na ng buhay ng tao ang COVID-19 sa mga susunod na taon.

Ito ang iminungkahi ni Senador Nancy Binay makaraang ihayag nito at ni Senador Pia Cayetano na hindi na dapat gawing general referal center para sa COVID cases ang mga naturang ospital, sa susunod na taon.

Ayon kay Binay, ang NKTI ay para lamang sa dialysis at kidney transplant o mga sakit na may kinalaman sa renal problem habang ang heart center ay pagamutan ng mga may sakit na kinalaman sa puso.

Bagaman sang-ayon si NKTI Executive Dir. Rose Marie Liquette, may mga COVID patient anyang may comorbidities gaya ng sakit sa bato kaya sa kanila pumupunta ang mga ito.

Nilinaw naman ni Cayetano na puwede pa ring manggamot ng COVID patients ang NKTI at heart center pero hindi na sila dapat maging general referal center ng COVID.—sa panulat ni Drew Nacino mula sa ulat ni Cely Ortega-Bueno (Patrol 19)

Suportado ni Health Secretary Francisco Duque III  ang pagbaba sa alert level 3 ng alert level system sa National Capital Region, simula Oktubre 16.

Nilinaw naman ni Duque na personal niya itong opinyon pero mahalaga pa ring bantayan ang metrics batay sa datos.

Maliban sa kalihim, pabor din ang Metro Manila Mayors sa pag-downgrade sa alert level system upang makapagbukas na ang iba pang naapektuhang negosyo.

Tiniyak din ni DILG Undersecretary Jonathan Malaya ang kahandaan ng metro Manila para sa alert level 3 dahil sa kapansin-pansing pagbaba ng COVID-19 cases.

Magtatagal ang alert level 3 sa Metro Manila hanggang katapusan ng Oktubre.—sa panulat ni Drew Nacino

Isasara ang mga sementeryo sa Tuguegarao City, Cagayan sa Todos Los Santos sa Nobyembre 1 at araw ng mga patay sa Nobyembre 2.

Layunin nitong maiwasan ang mass gathering sa mga sementeryo bilang pag-iingat laban sa COVID-19.

Ayon kay Tuguegarao City Mayor Jefferson Soriano, bagaman bumababa na ang active cases ng COVID-19 sa lungsod, mataas pa rin ang positivity rate na nasa average 50 kada araw.

Dalawa hanggang tatlo kada araw pa rin ang COVID-19 related deaths sa Tuguegarao habang umabot nasa 30 ang namatay mula Oktubre 1 hanggang noong Martes, Oktubre 12.

Nakatakda namang makipag-ugnayan si Soriano sa Sangguniang Panlungsod upang magpasa ng ordinansa para sa pagsasara ng mga sementeryo sa undas.—sa panulat ni Drew Nacino

Posibleng bumaba pa sa 3,000 hanggang 4,000 ang arawang kaso ng COVID-19 sa bansa habang bubulusok sa 400 hanggang 600 ang daily cases sa Metro Manila pagsapit ng Disyembre.

Batay ito sa panibagong projection ng OCTA research group kaugnay sa daily COVID-19 cases sa bansa.

Ayon kay OCTA Research Fellow, Dr. Guido David, maaari namang bumaba sa average 6,000 new cases kada araw ang maitala sa bansa habang nasa 1,000 cases per day sa NCR sa susunod na buwan.

Mas mababa anya ito kumpara sa kanilang pagtaya noong Setyembre 29.

Una nang inihayag ni David na nasa 1,933 ang kasalukuyang seven-day average ng bagong COVID-19 case sa NCR, na pinakamababa simula noong Hulyo 31 hanggang Agosto 6.—sa panulat ni Drew Nacino