HEADLINES

Nakapagtala ng karagdagang 27 delta variant cases ang Cagayan Valley Region mula sa nakolektang mga samples noong Setyembre 1, at dumaan sa whole genome sequencing noong Oktubre 8.

Batay sa biosurveillance report, apat na kaso ng delta variant ang naitala sa sa lalawigan ng Cagayan, 15 sa Isabela at walo sa Quirino.

Ayon sa Department Of Health Regional Office 2, ang mga kasong naitala ay pawang mga local cases na ngayon ay nakarekober na maliban sa naitalang kaso sa San Isidro at isa sa Santiago City na nasawi.

Nagpapatuloy naman ang case investigation at contact tracing activities ng special action team ng regional epidemiology and surveillance unit sa tulong na rin ng rural health units at LGU’s.—sa panulat ni Hyacinth Ludivico

Nanawagan ang mga health worker ng Zamboanga City sa gobyerno na ilagay sa Modified Enhanced Community Quarantine o MECQ ang kanilang quarantine classification.

Sa ngayon kasi ay nasa ilalim ng General Community Quarantine o GCQ ang lungsod.

Ayon kay Zamboanga City COVID-19 Task Force Spokesperson Kenneth Beldua, mayroong 2,551 active COVID -19 cases  sa Zamboanga City kung saan umaabot sa 150 cases ang average na bilang na naitatala kada araw habang 10 hanggang 12 naman ang nasasawi dahil sa virus kada araw doon.

Dahil sa pagtaas ng mga kaso ng COVID-19 sa lugar ay kinukulang na rin sila sa suplay ng oxygen at COVID hospital beds.

Sinabi pa ni Beldua na isa sa mga dahilan ng pagtaas ng COVID cases sa kanilang lugar ay dahil na rin sa mabagal na vaccination program doon.—sa panulat ni Hyacinth Ludivico

Aminado ang Philippine Health Insurance Corporation o Philhealth na mas nahihirapan sila ngayon sa pagproseso ng hospital claims.

Ayon kay Philhealth Chief Dante Gierran, natambakan sila ng claims dahil sa pandemya.

Sa ngayon kasi aniya ay umaabot sa 39,000 claims ang kanilang pinoproseso kada araw at kulang din aniya sila ng tao.

Maliban dito ay problema rin aniya nila ang ginagamit nilang IT system.

Sinabi naman ni Gierran na ginagamit nila ang debit-credit payment method upang agad na mabayaran ang portion ng claims habang isinasagawa ang pagbeberipika sa mga ito.—sa panulat ni Hyacinth Ludivico

Umapela ang Oriental Mindoro Provincial Hospital sa gobyerno na bigyang prayoridad sa pier at barko ang mga truck na nagsusuplay ng oxygen tank sa lalawigan.

Nagkakaubusan na kasi ng oxygen tanks sa naturang ospital at maging sa mga pribadong ospital doon.

Ayon kay Dr. Dante Nuestro, Officer In Charge ng ospital, problema din sakaling magkaroon ng bagyo dahil walang barko ang makakabiyahe.

Sa ngayon ay nasa full capacity na ang kanilang ospital dahil sa dami ng COVID-19 patients.

Bukod dito ay kinukulang na din sila sa health workers dahil maging ang mga ito ay tinamaan na rin ng virus.

Hinikayat naman ni Nuestro ang mga mamamayan na manatili na lamang sa kanilang mga bahay at sundin ang health protocols.—sa panulat ni Hyacinth Ludivico

Bumaba pa ang bilang ng mga lugar sa National Capital Region (NCR) na nakasailalim sa granular lockdown, ayon sa Philippine National Police (PNP).

Mula sa dating 131, ngayon ay nasa 125 na lamang ang bilang ng mga lugar sa Metro Manila na naka-lockdown.

Batay sa PNP, ang mga lugar na naka-granular lockdown ay mula sa 83 mga Barangay kung saan kabilang dito ang 72 na kabahayan, 24 subdivisions, 18 residential building, anim na kalsada, at isang residential building floor.

Nasa 420 PNP personnel at 485 force multipliers naman ang idineploy sa mga lugar na naka-lockdown upang matiyak ang seguridad at nasusunod ang minimum health standards.—sa panulat ni Hyacinth Ludivico

Inilunsad ng Bangko Sentral ng Pilipinas ang National QR code standard o QR PH person-to-merchant digital payment stream.

Layunin nito na isulong ang paggamit ng digital transactions lalo na ngayong may pandemya.

Ayon sa BSP, ang QR ph ay magbibigay ng madali at murang paraan ng pagbabayad ng maliliit o pangmaramihang transaksyon.

Sa pamamagitan din nito ay hindi na kailangan pa ng mga mamimili na magkaroon ng mga hiwalay na accounts para sa magkakaibang payment service providers.

Makakatulong din ito sa store owners dahil hindi na nila kailangan pa na maglagay ng maraming QR code standees sa kanilang establisyimento at hindi na rin kailangan pang mamuhunan ng mga ito sa mahal na point-of-sale terminals.

Maging ang tricycle drivers, tindero o tindera sa palengke, mga may-ari ng sari-sari store at iba pang maliliit na negosyo ay maaari ding makikinabang  anila sa QR Ph payment-to-merchant.—sa panulat ni Hyacinth Ludivico

Anim na hinihinalang holdaper ang patay matapos makipagbarilan sa mga pulis sa Marcos highway sa Antipolo City, Rizal.

Dakong ala una kaninang madaling araw nang tangkain ng anim na lalaki na holdapin ang isang gasolinahan sa Sitio Boso-Boso, Barangay San Jose.

Gayunman, natunugan sila ng mga miyembro ng Antipolo City police kaya’t sumiklab ang engkwentro sa pagitan ng mga otoridad at grupo ng mga lalaki.

Narekober ng PNP-scene of the crime operatives sa encounter scene ang isang kotse na brown Kia Sedan, motorsiklo at mahigit 40 basyo ng bala mula sa hindi pa mabatid na kalibre ng baril.

Wala namang nakuha sa gasolinahan ang mga lalaking hinihinalang sangkot din dating kaso ng robbery sa Antipolo.—sa panulat ni Drew Nacino

Tumaas ang presyo ng gulay, partikular ang ilang highland vegetable, sa mga pamilihan matapos ang pananalasa ng bagyong Maring sa Northern Luzon.

Sa pag-iikot ng DWIZ – Metro Patrol sa ilang palengke sa Pasig City, nasa 100 hanggang 120 na ang presyo ng repolyo mula sa dating 80 hanggang P100;

Habang ang carrots, 100 hanggang 150 mula sa dating 70 hanggang 100;patatas, 80 hanggang 130 kumpara sa dating 70 hanggang 100 at cauliflower 320 hanggang 350 mula sa dating 280 hanggang 320.

Aminado ang mga vegetable vendor na limitado ang supply at hindi rin gaanong magandang klase ang mga dumating sa kanila.

Inaasahan namang tataas pa ang presyo ng highland vegetables at iba pang gulay lalo ang mga nagmumula sa Cordillera at Cagayan Valley regions, na pangunahing pinagkukunan ng supply ng metro manila.

Samantala, tiniyak ng Department of Agriculture ang tulong sa lahat ng mga magsasakang naapektuhan ng kalamidad.—sa panulat ni Drew Nacino

Lumalala na umano ang energy crisis na nararanasan sa buong mundo makaraang pumalo sa $84 ang presyo ng kada bariles ng krudo, na pinakamataas sa nakalipas na pitong taon.

Pinakamalaki ang itinaas ang presyo ng natural gas sa international market, partikular sa Europa at Asia, bunsod ng numinipis na supply sa gitna ng nalalapit na winter.

Nagbabala ang Bank of America global oil research na maaaring pumalo sa $100 per barrel ang presyo ng brent crude na inaasahang magkakaroon ng malaking epekto sa presyo ng mga bilihin.

Sa China at India naman, nagmahal na rin ang coal dahil sa malaking demand nito sa dalawang pinaka-mataong bansa kaya’t nanganganib ang mga power plant na gumagamit ng coal bilang panggatong.

Kaliwa’t kanan na ang power shortages sa China na nakaapekto na sa maraming factory dahilan upang magsara pansamantala ang ilang assembly plunt hub ng mga foreign manufacturing company.—sa panulat ni Drew Nacino