HEADLINES

Pinapayagan na muling maglayag ang mga sasakayang pandagat na naapektuhan ng bagyong Maring.

Batay sa inilabas na abiso ng Philippine Coast Guard (PCG), pinahintulutan na nila na makabalik sa byahe ang mga barko at ilan pang sasakyang pandagat.

Kabilang sa mga pinapayagan ay ang motorized banca at ilang mga barkong sumilong upang maiwasan ang masamang panahon.

Pinayagang makabiyahe ang mga naturang sasakyang pandagat makaraang makalabas na ng PAR ang bagyong Maring at alisin ang lahat ng typhoon signal o babala ng bagyo sa ilang lalawigan.

Magbibigay ng awards ang DOTR at DILG sa mga lokal na pamahalaan na makakapagtatag ng pinakamoderno at ligtas na infrastructure para sa mga active transport users.

Ito ay kasunod ng pagdaraos ng National Bike Day sa bansa.

Kabilang rin sa gagawaran ng awards ay ang mga Local Government Units o LGU’s na nakapagpasa ng ordinansa na maaaring makahikayat sa kanilang residente na gumamit ng active mobility bilang mode of transportation.

Para mag-qualify sa selection, maaring magsumite ang mga LGU’s ng entries sa DILG Bureau of Local Government Supervision (BLGS)  sa mga DILG Regional Offices.

Nakatakda naman ang deadline ng pasahan ng entries sa Oktubre 22.

Pormal nang inihain kahapon ng iba’t ibang jeepney organization ang petisyon para sa P3 dagdag singil sa pasahe sa jeep.

Sa isinumiteng petisyon ng Pasang Masda, Fejodap, Alliance of Concerned Transport Organizations o ACTO, Liga ng Transportasyon at Operators sa Pilipinaso o LTOP at Alliance of Transport Operators and Drivers Association of the Philippines o ALTODAP sa Land Transportation Franchising and Regulatory Board o LTFRB Central Office, iginiit nila na lumobo na rin ang kanilang mga nagagastos at taong 2018 pa anila napagbigyan ang taas-pasahe.

Kapag naaprupahan ay magiging P12 na ang minimum na singil sa pasahe.

Sinabi naman ni Pasang Masda President Obet Martin na handa silang bawiin ang petisyon kung magbibigay ng sapat na subsidiya ang gobyerno sa kanilang sektor.

Una nang sinabi ni LTFRB Executive Director Joel Bolano na pag-aaralan ng board ang petisyon.—sa panulat ni Hyacinth Ludivico

Tinututulan ng grupong Lawyers for Commuters Safety and Protection (LCSP) ang tatlong pisong dagdag singil sa minimum fare ng mga driver at operator.

Ipinabatid ni Atty. Ariel Inton, pinuno ng LCSP, batid nila ang pangangailangan ng mga driver ngunit dapat mabalanse ito sa hanay ng commuters o pasahero.

Dagdag ni Inton, posibleng magdagdag sila ng pasahe pero piso lamang ang naaangkop dito imbes na tatlong piso.

Aniya, dapat ituloy ng Pamahalaan ang pagbibigay tulong at suporta sa mga driver at operator lalo na at nahaharap ang bansa sa COVID-19 pandemic.

Dumulog na ang medical frontliners ng Catanduanes sa local Inter-Agency Task Force dahil sa bumibigay na health system ng lalawigan.

Punuan na kasi ang halos lahat ng ospital doon dahil sa dami ng COVID-19 patients at ilang frontliners na rin ang nagpopositibo sa virus.

Gayunman, wala anilang naging aksyon ang local IATF.

Nasa high risk level na ang Catanduanes mula noong Oktubre 3.—sa panulat ni Hyacinth Ludivico

Patay ang isang babae matapos pagbabarilin sa loob ng kanyang inuupahang bahay sa Malate, Manila.

Ayon sa ulat, nakarinig ng dalawang putok ng baril ang ilang mga residente bago natagpuan ang bangkay ng babae.

Sinabi naman ni barangay 704 Chairman Guillermo Friera, na hindi niya masabing residente ito sa lugar at nasa drug watchlist umano ang biktima.

Patuloy naman ang imbestigasyon ng mga otoridad hinggil sa insidente.—sa panulat ni Hyacinth Ludivico

Posibleng magpatupad ng deployment ban sa mga Overseas Filipino Workers (OFW) sa Saudi Arabia.

Ito ang inihayag ng Department of Labor and Employment (DOLE) makaraang hindi nababayaran ang claims ng mahigit 10K Pinoy workers.

Partikular na ang mga OFW’s na hindi pinasahod ng kanilang employers sa loob ng isa hanggang dalawang taon.

Ayon sa DOLE, mahigit apat na taon ng kailangang bayaran ang mga OFW’s ngunit hanggang sa ngayon ay hindi pa rin nakatatanggap ng kompensasyon ang mga ito.

Samantala, mismong si Labor Sec. Silvestre bello III, ang magrerekomenda kay Pangulong Rodrigo Duterte na magpatupad ng deployment ban sa Saudi Arabia.

Inilunsad nitong Miyerkules ang school-based COVID-19 vaccination sa Mabalacat City College sa Pampanga na pinangunahan nina Vaccine Czar Secretary Carlito Galvez Jr., at Commission on Higher Education Chairman Prospero De Vera.

Target ng school-based COVID-19 vaccination na matutukan ang pagbabakuna sa mga tertiary student sa bansa.

Nasa 800 college students ang nagpabakuna kontra COVID-19 sa MCC habang higit 600 estudyante naman ang nagpabakuna sa Our Lady of Fatima University-Pampanga.

Ayon sa CHED, sa 181 na mga unibersidad at kolehiyo na nagsasagawa ng limited face-to-face classes ay wala pang isang porsiyento ng mga mag-aaral ang tinamaan ng COVID-19.

Sa ngayon, higit kalahati ng higher education institutions na nag-report sa CHED ay nakapagbakuna na ng higit 75% ng kanilang personnel.—sa panulat ni Hyacinth Ludivico