ENTERTAINMENT

Proud na proud si Miss Universe Philippines 2018 Catriona Gray sa mga kandidatang lumahok sa Miss Universe Philippines 2022 grand coronation night na ginanap noong Sabado, April 30, sa Mall of Asia Arena sa Pasay City.

Ayon kay Catriona, inimbitahan siya ng Miss Universe Philippines Organization para umattend sa naturang event pero hindi siya nakadalo dahil sa ginagawang pelikula.

Nabatid na naging aktibo si  Catriona sa social media bilang suporta sa mga kandidata kasabay ng kaniyang mga post sa kaniyang Twitter account kung saan, sinabi niya na dapat ay mas mahirap pa na tanong ang ibinato sa mga beauty queen na lumahok sa pageant dahil alam niyang kayang kaya itong sagutin ng mga kandidata.

Sa huli, nagpaabot ng pagbati si Catriona kay Celeste Cortesi ng Pasay City matapos koronahan bilang Miss Universe Philippines 2022.

Inamin ng aktor na si Baron Geisler na nasa hindi magandang estado ang relasyon nila ng kaniyang asawa na si Jamie Evangelista.

Kwento ni Baron, hinihiling kasi ng kaniyang asawa na ipa-annul o ipawalang bisa na ang kanilang kasal.

Nabatid kasing pansamantalang magkahiwalay ngayon si Baron at Jamie at kasalukuyan siyang nakatira sa bahay ng kanilang kasama sa fellowship.

Aniya, kailangan niya kasing sumailalim mula sa recovery process na konsepto ng Alcoholics Anonymous na mayroong 12 guidelines matapos mauwi sa pagtatalo ang kaniyang pagbalik sa pag-inom.

Kinoronahan bilang Miss Universe-Philippines 2022 ang pambato ng Pasay City na si Celeste Cortesi.

Nanaig si Celeste sa 30 kandidata na nag-aagawan para sa titulong Miss Universe Philippines 2022.

Ginanap ang coronatio night kagabi sa Mall of Asia Arena sa Pasay City.

First runner-up sa kompetisyon si Misamis Oriental Annabelle Mcdonnell  habang second runner-up si Katrina Llegado ng Taguig.

Itinanghal naman bilang Miss Universe Philippines Tourism si Michelle Dee ng Makati, habang Miss Universe Philippines Charity ang pambato ng Bohol na si  Pauline Amelinckx.

Naging hurado sa kompetisyon ang Miss Universe Queens na sina; Pia Wurtzbach, Iris Mittenaere, Demi Tebow at Harnaaz Sandhu.

Bagama’t hindi nakadalo, na-featured naman sa isang video si Catriona Gray.

Inamin ng aktor na si McCoy De Leon naranasan niya noon ang sakit na depresyon.

Sa kaniyang Instagram, ibinahagi ng McCoy ang short clippings mula sa kanilang bagong pelikula ng kaniyang real-life leading lady na si Elisse Joson kung saan makikitang pareho silang emosyonal.

Kwento ng aktor, personal para sa kaniya ang kanilang pelikula dahil naaalala raw niya ang panahong na-diagnose siya sa sakit na depresyon noong 2020.

Aniya, palagi lamang siyang nakangiti noon pero sa loob niya ay hindi na niya kinakaya ang mga bagay na kaniyang pinadaraan at dumating pa siya sa punto na hindi nakakatulog, panay na lamang ang iyak at malapit nang sumuko.

Kaya’t laking pasalamat daw niya sa kaniyang girlfriend na Elisse na tumulong sa kaniya para gumaling sa kaniyang sakit.

Nagsalita na ang dating beauty queen at aktres na si Kylie Versoza hinggil sa hiwalayan nila ng dating nobyong si Jake Cuenca.

Aminado si Kylie na nahihirapan siya at masakit pa rin ang break up nila ng aktor.

Sa ngayon aniya ay marami siyang natututunan sa kanyang sarili at sinusubukan pa rin niyang makarekober sa nangyari sa kanilang relasyon.

Pinasalamatan naman nito ang publiko sa ipinahayag na simpatiya sa kanila ni Jake.

Matatandaang nitong April 23 nang kumpirmahin ni Jake na break na sila ng aktres.

Samantala, ibinahagi ni Kylie na mayroon siyang film at online projects na gagawin at may ispesyal din siyang gagampanan sa Binibining Pilipinas 2022.

Inihayag ng Binibining Pilipinas Charities, Inc. (BPCI) na tatlo sa mga kandidata ang umatras sa pageant ngayong taon.

Opisyal na tinanggap ng BPCI, ang withdrawal nina Gwendoline Meliz Soriano, Ma. Francesca Taruc, at Iman Franchesca Cristal.

Ayon sa BPCI, dahil sa naturang development, magkakaroon ng mga bago sa latest batch ng mga kandidata kabilang na dito sina Patricia Ann Tan, Ma. Isabele David at Joanna Marie Rabei na kukumpleto sa top 40.

Isinilang na ng singer-actress na si Angeline Quinto ang panganay na anak nila ng kanyang non-showbiz boyfriend.

Ibinahagi ni Angeline ang balita sa mga fans sa pamamagitan ng kanyang Instagram stories.

Sa isang larawan, nakasaad sa caption ang ”10:22 pm, 27 April 2022, Hello!!! Baby Sylvio,” na nangangahulugang isinilang niya sa oras at araw na iyon ang kanyang baby boy.

Nitong Miyerkules ng gabi nang isiwalat ni Quinto na manganganak na siya kasama ang larawan ng kanyang baby bump.