Mariing itinanggi ng Bureau of Immigration ang alegasyong nagpapakalat ito ng maling impormasyon kaugnay sa umano’y planong pag-alis ng bansa ni dating House Speaker Martin Romualdez noong April 2026.
Ayon kay BI Commissioner Joel Anthony Viado, ang naunang pahayag ng ahensya ay nakabatay sa impormasyong hawak nito noon at inilabas lamang bilang tugon sa lehitimong katanungan ng media.
Samantala, iginiit naman ng kampo ni Romualdez na walang katotohanan ang report na sinubukan niyang umalis ng bansa upang makaiwas sa mga kasong kinahaharap.
Bunsod nito, hiniling ng kanyang mga abogado na bawiin ng BI ang pahayag at humingi ng paumanhin.
Gayunman, nanindigan ang BI na tama at beripikado ang impormasyong inilabas nito at pinabulaanan na BI ang nagpasimula ng isyu.
Tiniyak din ng ahensya na patuloy nitong gagampanan ang mandato nang may propesyonalismo, pagiging patas, at paggalang sa due process at karapatan ng lahat ng sangkot.—sa panulat ni Reabelle Medina
