Mahigit tatlong daang pamilya ang naapektuhan ng pagbaha sa SOCCSKSARGEN, Zamboanga City, bunsod ng malalakas na ulan dulot ng habagat dala ng Bagyong Kiyapo.
Sa General Santos City, umapaw ang ilog sa Barangay Calumpang na nagdulot ng pagbaha sa mga kabahayan at paglikas ng mga residente sa evacuation center.
Bukod dito, matinding pinsala rin ang naitala sa Saranggani matapos tangayin ng rumaragasang baha ang ilang bahay at masira ang mga kalsada at tulay sa Glan, Maasim, Malapatan, at Kiamba.
Samantala, nakaranas din ng pagbaha ang Sultan Kudarat kung saan lumubog sa tubig ang ilang kabahayan sa Lambayong.
Sa ngayon, patuloy ang monitoring at damage assessment ng mga otoridad sa mga apektadong lugar.
Payo ng PAGASA sa publiko na manatiling alerto dahil inaasahang magpapatuloy ang mga pag-ulan dulot ng habagat na pinalalakas ng Bagyong Kiyapo.—sa panulat ni Reabelle Medina
