Krystine Belen

Kumbinsido ang isang preso mula sa Iowa State Penitentiary na si Benjamin Schreiber na dapat na siyang palayain mula sa habambuhay na pagkakabilanggo.

Pansamantala kasi siyang nag-flatline sa ospital bago ma-revive. Kaya aniya, napagsilbihan na niya ang kanyang life sentence dahil “namatay” na siya at nabuhay lang muli dahil sa resuscitation.

Nahatulang guilty si Benjamin sa first-degree murder noong 1997 dahil sa pagpatay sa isang lalaki gamit ang hawakan ng piko.

Noong March 2015, isinugod siya sa ospital dahil sa septic poisoning na sanhi ng kidney stones.

Sandaling tumigil ang pagtibok ng puso ni Benjamin sa ospital; limang beses siyang sinubukang buhayin.

Nang magamot ang kanyang sepsis, ibinalik din siya sa kulungan. Ngunit ayon kay Benjamin, labag sa kanyang kalooban ang pag-revive sa kanya dahil may nilagdaan siyang “do not resuscitate” order noon.

Hindi naman natinag ang korte sa argumento ng preso na inilarawan nila bilang “unpersuasive and without merit.”

Noong April 7, 2023, pumanaw si Benjamin sa edad na 70 years old.

Naging paalala ang kwento ni Benjamin na may katapat na parusa ang bawat paglabag sa batas at hindi ito basta lamang malulusutan.

Napaluha na lamang ang isang ama mula sa Pulilan, Bulacan nang dalhin siya ng kanyang anak sa isang mamahaling restaurant upang ipagdiwang ang kaarawan ng kanyang asawa.

Ayon sa anak at uploader ng video na si Rozelle Mariano del Pozo, hindi naghahanda ang kanyang ina tuwing nagbi-birthday ito. Dahil dito, nangako siya sa sarili na babawi siya at isu-sorpresa ang kanyang mga magulang.

Hindi pa nakapunta at nakakain ang mga magulang ni Rozelle sa nasabing restaurant, kahit malapit lang ito sa kanilang tirahan, dahil iniisip nilang masyadong mahal dito.

Ito ang nag-udyok sa kanya na ilibre rito ang kanyang mga magulang at iparanas ito sa kanila sa unang pagkakataon.

At nang dumating na ang araw na pinaghandaan ni Rozelle, napaiyak ang kanyang ama dahil wala raw siyang perang ipambabayad rito.

Ayon kay Rozelle, pera ang nasa isip ng kanyang ama dahil alam nito ang gastos ng kanyang pamilya para sa kanyang pagpapagaling mula nang inatake siya ng stroke noong 2022.

Ngunit agad namang napalitan ang mga luha ni tatay ng tears of joy nang malaman niya ang surprise treat ng kanyang anak na pinag-ipunan nito para sa kanilang mag-asawa.

Sabi nga ni Rozelle, hindi man sila perpektong magulang, sila pa rin ang mga taong iniingatan niya hanggang sa kanyang makakaya.

Lungkot ang naramdaman ng mga diver nang makakita ng isang pating sa New South Wales, Australia.

Mayroon kasing nakapalibot na malaking plastic ring sa katawan nito.

Ayon sa pahayag ng Forster Dive Center, nakasalubong ng mga maninisid ang kawawang grey nurse shark na sugatan dahil sa plastic ring na humihiwa sa katawan nito.

Dahil din sa ring na ito, nayupi ang isa sa mga palikpik ng pating.

Sa kasamaang palad, hindi pwedeng hawakan ng diver ang pating kaya hindi ito agad na natulungan.

Nangako naman ang New South Wales Department of Primary Industries na iimbestigahan nila ang insidente; ngunit posibleng mahirapan ang mga ito sa paghahanap sa partikular na pating.

Ayon sa International Union for Conservation of Nature (IUCN), higit sa 400 million tons ng plastic ang napro-produce kada taon sa buong mundo. 14 million tons dito ang napupunta sa karagatan.

Ayon pa sa mga eksperto, pobileng mas dumami na ang basura kaysa isda pagsapit ng 2025 o sa susunod na taon.

Nakakaawa man ang sinapit ng grey nurse shark, hindi maikakailang ito na ang normal na nararanasan ng mga hayop sa karagatan dahil sa basurang itinapon natin. Kaya panawagan ng iba’t ibang grupo sa buong mundo, alagaan na ang mga karagatan dahil hindi lang naman ang mga hayop ang magdurusa sa pagkasira nito.

Viral ngayon sa social media ang isang batang lalaki na inaalagaan ang kanyang tuta sa gitna ng kalsada.

Sa video, mapapanood ang bata na dahan-dahang naglalakad, dala ang isang maliit na lalagyan na may lamang tubig. Ibinigay niya ito sa isang puting tuta na nasa ilalim ng pinagpatong-patong na karton.

Makikitang hindi maitago ng tuta ang kanyang excitement nang matanaw ang bata. Sa sobrang saya, aksidente pang nasira ang kanyang tinutuluyang karton na inayos din ng bata upang malimliman ito mula sa matinding sikat ng araw.

Agad namang bumuhos ng iba’t ibang reaksyon ang nakaaantig na video.

Ayon sa isang netizen, mayroong “purest heart” ang bata na nagtuturo sa mga nakatatanda kung paano maging responsible pet owner.

Sabi ng ilan, buti pa ang bata, may malasakit; hindi katulad ng ibang tao na hindi na nga nagpapakain sa aso, nananakit pa.

Samantala, lungkot ang naramdaman ng ilang mga netizen dahil nabigo ng lipunan ang magkaibigan.

Tanong pa ng isa, “Bakit kung sino pa ang salat sa yaman, sila pa mismo ang may kakayahang magbigay?”

Sa gitna ng nararanasang kahirapan sa kanyang murang edad, mayroon nang pagmamalasakit at pagmamahal ang bata sa ibang nilalang na hindi matutumbasan ng anumang halaga.

Sa kabila nito, dapat pa ring protektahan, tulungan, at bigyan ng oportunidad ang mga batang katulad niya dahil sila ang kinabukasan at pag-asa ng ating lipunan.

Marami sa atin ang humahanga sa kultura ng Japan dahil sa pagiging kakaiba nito. Maging ang kanilang educational system, iba sa ating nakasanayan dahil hindi pinapayagang mag-exam ang mga mag-aaral dito bago mag-Grade 4.

Naniniwala ang mga Japanese na mayroong mas mahalagang leksyon na dapat ituro sa mga bata na hindi masusukat ng anumang exam.

Sa murang edad, tinuturuan na sila ng tamang asal at respeto sa kapwa.

Iminumulat na rin ang mga batang Japanese na maging independent. Sa katunayan, Grade 1 pa lang, mag-isa na silang pumupunta sa kanilang paaralan, sakay ng bus o tren.

Wala ring janitors sa kanilang schools dahil ang mga mag-aaral mismo ang pinagkakatiwalaan sa kanilang classrooms. Dito, natututunan nila ang responsibilidad at pakikipagtulungan sa mga kaklase.

Binibigyang-diin din sa mga unang taon ng pag-aaral sa Japan ang pagiging magalang at punctual o nasa oras.

Higit sa lahat, itinuturo sa mga bata ang pagpapahalaga at pangangalaga sa kalikasan at sa mga hayop.

Mahalaga ang unang tatlong taon ng edukasyon sa Japan dahil dito nililinang ang pagkatao ng mga bata.

Dahil sa pagiging displinado, hindi nakapagtatakang isa ang Japan sa mga pinakamaunlad na bansa sa buong mundo.

Sobra man ang antok ni Georgia, isang aspin mula sa Pangasinan, hindi pa rin ito tumigil sa pagbabantay sa mga labi ng kanyang yumaong may-ari.

Sa viral video, makikitang umiidlip habang nakaupo sa monobloc chair ang aso sa harap ng isang kabaong.

Ayon kay Bailey Jean Manuel, ang uploader ng video, alaga ng kanyang pumanaw na tita si Georgia.

Aniya, kahit umaga, nagbabantay ang aso sa lamay. Kahit paalisin, bumabalik ito sa kanyang pwesto sa upuan na nasa harap ng larawan ng nag-alaga sa kanya.

Patunay si Georgia na likas na tapat ang mga alagang aso. Kaya imbes na saktan at maltratuhin, lalo na ang mga aspin, dapat silang alagaan at mahalin, katulad ng ibinibigay nila sa ating pagmamahal na hindi matitibag, maging ng kamatayan.

Nang pumasok si Érika de Souza Vieira Nunes kasama ang kanyang tiyuhin sa isang bangko sa Brazil, agad na nakaramdam ng kakaiba ang mga empleyado rito.

Mukha kasing matamlay at hindi maayos ang lagay ng 68-year-old na si Paulo Roberto Braga habang tinutulak ng kanyang pamangkin sa kanyang wheelchair.

Nang imbestigahan, napag-alamang matagal na palang patay ang matanda!

Nagtungo si Érika sa bangko upang mangutang sana ng $3,250 o higit sa P180,000. Isinama niya ang kanyang tiyuhin upang maging co-signer na tatanggap sa legal responsibility ng loan.

Dahil masama ang kutob ng mga empleyado matapos makaamoy ng tila patay na daga, kinuhanan nila ng video ang insidente. Dito, makikitang bumabagsak na ang ulo ng matanda at pinipilit ng babae na pahawakin ito ng panulat upang pumirma sa kontrata.

Tumawag sa emergency services ang mga empleyado at nang dumating ang rescuers, nakumpirma nilang isang malamig na bangkay na ang nakasakay sa wheelchair.

Ayon sa investigating officer, alam ni Érika na patay na ang kanyang tiyuhin dahil ilang oras nang patay ang matanda. Ngunit depensa ng abogado ng pamilya, buhay pa ito nang magtungo sa bangko.

Agad na inaresto si Érika dahil sa pang-aabuso sa patay at tangkang pagnanakaw sa pamamagitan ng fraud.