Judith Estrada-Larino

Patuloy ang pagtaas ng mga Pilipino sa ibang bansa na apektado ng coronavirus disease 2019 (COVID-19).

Ayon sa Department of Foreign Affairs (DFA), hanggang April 16, nasa 757 Pilipino sa 41 bansa at rehiyon ang kumpirmadong positibo sa COVID-19.

Sa nasabing bilang, 414 ang patuloy na nagpapagamot sa iba’t ibang ospital at 240 namang Pilipino abroad ang nakarecover na.

Nadagdagan naman ng 15 ang nasawing Pinoy dahil sa COVID-19 kaya’t nasa 103 na ang death toll.

Pinakamarami pa rin ang naitalang confirmed COVID-19 positive na overseas Filipino sa Asia Pacific Region na may 271 kaso.

Sumunod dito ang Europe na may 237 na kaso, Middle East/Africa na may 91 na kaso at Americas na mayroon namang 158 na kaso.

Nakipagpulong ang Chinese medical experts team sa technical advisory group ng Department of Health (DOH).

Sa pamamagitan ito ng online meeting kung saan kabilang sa mga natalakay ang field of infections protection sa mga ospital, diagnosis at treatment sa mga buntis, discharge standards at post death placement.

Nagpasalamat naman ang DOH sa pangunguna ni Health undersecretary Kenneth Ronquillo sa mga ibinahaging kaalaman ng Chinese expert team sa nasabing online meeting.

Target ng Department of Human Settlements and Urban Development (DHSUD) ang paggamit sa 24,000 homeowners associations sa buong bansa para magpakalat ng mga impormasyon kaugnay sa coronavirus disease 2019 (COVID-19).

Ayon kay Housing Secretary Eduardo Del Rosario, malaki ang papel ng homeowners associations para maipaabot ang mga tamang impormasyon hinggil sa mga polisiya, regulasyon, programa at mga aktibidad ng kanilang tanggapan sa mga komunidad bilang suporta sa ipinatutupad na enhanced community quarantine (ECQ).

Sinabi ni Del Rosario na malaking tulong sa pagpapalakas ng kampanya kontra COVID-19 pandemic sa pamamagitan ng mga tamang impormasyon.

Kasabay nito, ipinabatid ni Del Rosario na nagpatupad na sila ng mga hakbangin para mapagaan ang problema ng mga Pilipino sa housing sector na dulot ng nasabing krisis tulad ng tatlong buwang moratorium sa housing at short term loan payments.

Patuloy ang pagtaas ng bilang ng mga gumagaling sa coronavirus disease 2019 (COVID-19) cases sa bansa.

Ayon sa Department of Health (DOH ) hanggang kahapon,  Abril 16  nasa 435 na ang total recoveries ng bansa mula sa COVID-19 matapos ang 82 panibagong recoveries mula sa virus sa nakalipas na magdamag.

Samantala 13 naman ang nasawi kayat umaabot na sa 362 ang COVID-19 related deaths.

Lumobo naman sa 5,660 ang kabuuang kumpirmadong kaso ng COVID-19 matapos dumagdag ang 207 panibagong kaso sa Pilipinas.

Ibinasura ng Pangulong Rodrigo Duterte ang resolusyon ng 14 senador na mag-resign na si Department of Health (DOH )  Secretary Francisco Duque III dahil sa anila’y palpak na pagtugon sa coronavirus disease 2019 (COVID-19) crisis.

Sinabi ni Executive Secretary Salvador Medialdea na nagpasya ang Pangulong Duterte na panatilihin sa puwesto si Duque.

Ayon kay Medialdea tiwala ang Pangulo na higit pang pagbubutihin ni Duque ang trabaho nito para patunayan ang kaniyang kakayahan at sinseridad na paglingkuran ang publiko sa gitna na rin nang kinakaharap na krisis ng bansa

Una nang iginiit ng mga senador ang kapalpakan ni Duque na anila’y incompetent, inefficient at negligent matapos na hindi kaagad irekomenda sa pangulo ang travel ban sa China kung saan nagsimula ang coronavirus.

Ipinanawagan ng 14 na senador ang agarang pagbibitiw sa puwesto ni Department of Health (DOH)  Secretary Francisco Duque III.

Ito’y dahil sa umano’y kapalpakan sa paghahanda ng bansa laban sa coronavirus disease 2019 (COVID-19).

Batay sa senate resolution 362, tinukoy ang “lack of foresight” at “inefficiency” ni duque na siyang sinasabing dahilan kaya lumala ang sitwasyon.

Binanggit din ang hindi umano magandang paghawak ng mga opisyal ng DOH sa krisis dahilan upang malugmok ang pilipinas sa pinakamababang safety ranking sa mga bansa sa asia pacific.

Bukod dito, binigyang diin sa resolusyon ang umano’y pagkabigo ng DOH na bilisan ang accreditation ng mga testing centers tulad ng naranasan ng lokal na pamahalaan ng marikina.

Kabilang sa mga senador na lumagda sa resolusyon sina Vicente Sotto III, Juan Miguel Zubiri, Sonny Angara, Nancy Binay, Grace Poe,  Manny Pacquiao, Sherwin Gatchalian, Francis Tolentino,  Joel Villanueva, Ronald “Bato” Dela Rosa,  Imee Marcos,  Lito Lapid, Ramon “Bong” Revilla Jr. at Panfilo Lacson.

Inamin ni Department of Health (DOH) Secretary Franciso Duque III na naging malaking hamon sa ahensya ang krisis ng coronavirus disease 2019 (COVID-19) sa bansa.

Sa kaniyang pagharap sa teleconference ng COVID-19 committee technical working group  health sinabi ni Duque na “extremely difficult” ang karanasan ng ahensya sa nakalipas na tatlong buwan sa gitna nang patuloy an paglaban ng bansa COVID-19.

Ipinaabot ni Duque ang pagkilla sa staff ng DOH at buong health care sector na nagsa sakripisyo ng kanilang panahon at buhay para makatulong sa mga kapwa Pilipinong nagkakasakit.