Judith Estrada-Larino

Tatlo pang quarantine facilities para sa coronavirus disease 2019 (COVID-19) patients ang nakatakdang buksan ng gobyerno.

Kabnilang dito ayon kay BCDA chief vince dizon ang PhilSports Arena sa Pasig City, Philippine Arena sa Bulacan at Filinvest Tent sa Muntinlupa City.

Sinabi ni Dizon na inaasahang matatapos hanggang ngayong araw na ito ang PhilSports Arena.

Samantala  malapit na ring matapos ang COVID-19 treatment facility sa eva macapagal super terminal na ang conversion ay pinangungunahan ng Philippine Ports Authority at Philippine Coast Guard.

Ang nasabing pasilidad sa loob ng Pier 15 sa Manila South Harbor at mayruong 211 cubicles ay ginastusan ng P100-M ng Lopez Group of Companies.

Ang pasilidad ay hinati sa apat na magkakaibang zones depende sa level ng COVID-19 infection ng mg pasyente.

7,000 body bags ang available sa MMDA para sa mga nasawi sa coronavirus disease 2019 (COVID-19).

Ipinabatid ito ni MMDA Spokesperson Celine Pialago matapos ang pulong nila ng mga kinatawan ng Department of Health (DOH), Department of Interior and Local Government (DILG), mga punenarya at local government units hinggil sa panganagsiwa sa COVID-19 fatalities.

Sinabi ni Pialago na kailangan lamang magbigay ng formal request sa DOH ang anumang ospital para sa cadaver bags at maging ng personal protective equipment (PPE)’s.

Sa  DOH  din magpupunta ang mga ospital para mapabilis ang pag iisyu ng death certificate sa mga nasawi sa COVID-19.

Inihayag pa ni Pialago na lahat ng crematorium ay dapat tumanggap ng labi ng COVID-19 saan mang lugar galing ang mga ito.

Pumapalo na sa halos 6,000 ang kabuuang kumpirmadong kaso ng coronavirus disease 2019 (COVID-19) sa bansa.

Ayon sa Department of Health (DOH) sa nakalipas na magdamag ay 218 kaso ng COVID-19 ang nadagdag kayat nasa 5,878 na ang kaso ng nasabing virus sa Pilipinas.

52 pasyente rin ang naka recover na sa sakit kayat nasa 487 na ang total recoveries mula sa COVID-19.

Samantala 25naman ang nasawi sa loob ng 24  oras dahil kayat umabot na sa 387 ang death toll dahil sa COVID-19.

Uubra nang magbukas sa susunod na linggo ang Molecular Diagnostic Laboratory ng Marikina City.

Ipinabatid ito ni Health Secretary Francisco Duque III matapos bisitahin ang nasabing bagong coronavirus disease 2019 (COVID-19). testing facility.

Sinabi ni Duque na ang nasabing pasilidad sa Marikina ay isa sa pinaka magandang laboratoryo na kaniyang nakita.

Tiwala si Duque na magiging modelo ang marikina para sa ibang lgu’s para mapalawig ang testing capacity sa bansa.

Ang nasabing laboratoryo ay gagamitin din ng mga local government ng San Mateo at Antipolo sa Rizal para sa kanilang suspected covid patients.

Nagbitiw sa puwesto si Socioeconomic Planning Secretary Ernesto Pernia.

Sinabi ni Pernia na nag resign siya matapos ang kaniyang reflection nuong holy week at maging sa konsultasyon sa kaniyang pamilya at malalapit na ka trabaho.

Dalawa ang ibinigay na dahilan ni Pernia sa kaniyang resignation – una, personal reason at ikalawa ay pagkakaiba aniya niya ng development philosopy sa ilang kapwa cabinet members.

Pinasalamatan naman ni Pernia ang Pangulong Rodrigo Duterte sa tiwala sa kaniya at isa aniyang karangalan ang makapagsilbi sa bayan sa ilalim ng Duterte administration sa loob ng halos apat na taon.

Nagpasalamat din si Pernia sa mga nakasama niya sa NEDA.

Naisalba ang bata sa sinapupunan ng 28-anyos na Pinay nurse sa London matapos itong masawi dahil sa coronavirus disease 2019 (COVID-19).

Ang nasawing Pinay nurse ay nakilalang si Mary Agyeiwaa Agyapong, nakatalaga sa general ward ng Luton and Dunstable University Hospital sa London.

Hindi pa naman malinaw kung nahawahan ng virus ang kaniyang sanggol,

Ayon sa Bedforshore Hospitals NHS Foundation Trust, si Agpayong ay nagpositibo sa COVID-19 noong April 5 at na-confine sa pinagtatrabahuhang ospital noong April 7.

Nagpaabot naman nang pakikidalamhati sa pamilya ng Pinay nurse ang mga kasamahan nito sa ospital at maging sa foundation matapos nilang taguriang ‘fantastic nurse’ ang Pinay na limang taong naging empleyado sa ospital.

Samantala, pinaniniwalang ang 106-taong gulang na si Connie Titchen ang pinakamatandang COVID-19 patient sa Britanya na gumaling mula sa mga komplikasyon ng nasabing virus.

Ipinabatid ng mga doktor sa city hospital sa Birmingham, England ang tatlong linggo pakikibaka ni Titchen sa COVID-19.

Mas mapanganib at mas mabilis ang pagkalat ng coronavirus disease 2019 (COVID-19) kumpara sa SARS.

Ayon ito kay dating Health secretary Manuel Dayrit sa isinagawang video conference meeting ng house defeat COVID-19 committee.

Sinabi ni Dayrit na naging epektibo ang pagtugon ng Department of Health (DOH) noong panahon niya sa SARS dahil sa maagang pagdetect sa mga kaso sa pamamagitan ng contact tracing at kaagad na isolation sa mga na impeksyon.

Subalit inihayag ni Dayrit na hindi epektibo ang operasyong ipinatutupad ng DOH laban sa COVID-19 dahil 17 taon na ang sistema na bagamat mayroong improvement ay hindi naman makabago.

Kaya nga aniya dapat gawing moderno ang disease surveillance capacity ng buong bansa bilang short term response sa COVID-19.

Isinulong ni Dayrit ang pagbuo ng Philippine Center for Disease Control kasabay nang pagtatayo ng laboratories para sa mass testing sa buong bansa, pagpapalakas ng primary care facilities, pagtatayo ng quarantine facilities at critical care capacity para sa level 2 at 3 hospitals.

Hiniling ni Dayrit ang malinaw na master plan dahil ang mga nasabing hakbang lamang din ang naging paraan ng South Korea, Singapore at Taiwan para mapagtagumpayan ang laban sa COVID-19.

Bukod sa luma at disorganized ang sistemang sinusunod ng DOH, inihayag ni Dayrit na kulang din talaga ang health care workers ng bansa.

Pinakilos ng Department of the Interior and Local Government (DILG) ang local government units (LGUs), Philippine National Police (PNP) at Bureau of Fire Protection (BFP) para tumulong sa pagsasagawa ng pinalawig na coronavirus disease 2019 (COVID-19) testing sa iba’t ibang lugar.

Ayon kay DILG secretary Eduardo Año, dapat damihan ng LGU ang contract tracing teams (CTT) nito para tukuyin ang mga indibidwal na mayruong exposure sa confirmed COVID-19 cases.

Sinabi ni Año na mahalaga ang papel ng CTTs para tuluyang bumaba ang kaso ng COVID-19 dahil sa mga ito nakasalalay ang pagtukoy at pag-isolate ng mga nasalamuha ng may sakit at pagpapagamot ng mga COVID-19 positive.

Ang CTT sa kada LGU aniya ay dapat pamunuan ng hepe ng pulisya at i-a-assist ng city o municipal health officer.