Judith Estrada-Larino

Pasado na ang lahat ng mga estudyante ng Pamantasan ng Lungsod ng Maynila (PLM) sa second semester/trimester ng school year 2019-2020.

Inanunsyo ito ni PLM President Emmanuel Leyco kasunod ng matinding epekto ng coronavirus disease 2019 (COVID-19) pandemic.

Batay sa inilabas na memorandum inaprubahan ng board of regents ang alternative grading system matapos ang isinagawang special meeting noong April 21.

Kabilang sa mga kondisyon para mabigyan ng pass mark ang estudyante na naka-enroll sa second semester/trimester ng school year 2019-2020ay makapagsumite ang graduating under graduate student na naka-enroll sa thesis writing ng final thesis sa college at kailangang maaprubahan ng thesis adviser subalit hindi na kailangang dumaan sa panel defense, makumpleto ng estudyante na naka-enroll sa internship course ang alternative activities na i-aassign ng college.

Nakasaad pa sa memorandum na ang pass mark ay hindi magiging bahagi ng general weighted average ng estudyante at hindi maaaring magamit para sa scholarships, retention o academic honors.

Samantala nagpasya rin ang faculty members ng Department of Journalism ng University of the Philippines-Diliman na ipasa na ang kanilang mga estudyante.

Kabilang dito ang lahat ng mga naka enroll sa journalism, communication at media studies courses ngayong school year.

Nag desisyon din ang journalism faculty members sa ginawang online faculty meeting na ang mga estudyanteng naka enroll sa J200 o thesis ay dapat makipag ugnayan na lamang sa kanilang advisers para sa kaukulang guidance.

Patuloy ang paglobo ng kaso ng coronavirus disease 2019 (COVID-19) sa bansa.

Ayon sa Department of Health (DOH) hanggang kahapon, April 22 nasa 6,710 na ang tinamaan ng nasabing virus sa bansa matapos maitala ang 111 bagong kaso ng COVID-19 sa nakalipas na magdamag.

9 namang pasyente ang nasawi sa magdamag kaya’t nasa 446 na ang death toll samantalang 39 ang mga bagong naitalang gumaling sa COVID-19 kaya’t pumapalo na sa 693 ang total recoveries mula sa nasabing virus.

Pinamamadali na ng Pangulong Rodrigo Duterte ang pagpapatupad ng national ID system.

Sinabi ni NEDA acting Secretary Karl Kendrick Chua na target ng Pangulo na makumpleto ang 80 hangang 90 million registration bago matapos ang termino nito sa 2022.

Ayon kay Chua nagsisikap na ang Philippine Statistics Authority (PSA) na makapagparehistro ng 5 milyon sa 2020 para ma-identify na rin sa social amelioration program (SAP).

Ito aniya ay para makapagbukas na rin ng bank account ang nakakuha na ng national ID at mapapabilis ang pagbibigay ng cash assistance at hindi na mag-door to door tulad ng sistema ngayon.

August 2018 nang lagdaan ng Pangulong Duterte ang Philippine Identification System Act na naglalayong pag-isahin ang iba’t-ibang government ID sa pamamagitan nang paglalagay ng single national identification system.

150 sundalo mula sa Joint Task Force National Capital Region (JTF-NCR) ang ide-deploy sa Sampaloc, Maynila para ipatupad ang 48 hour hard lockdown simula bukas ng 8:00 ng gabi.

Ipinabatid ito ni JTF-NCR Commander Brigadier General Alex Luna na tiniyak din ang pag-monitor sa area para mabatid kung paano aniya makakatulong ang mga sundalo sa pagpapatupad ng  hard lockdown.

Exempted naman sa naturang lockdown na tatagal hanggang 8:00 ng gabi ng Sabado ang frontliners, mayroong emergency health concerns, uniformed personnel, government workers, service workers, barangay officials at government accredited media members.

Isinailalim ang Sampaloc area sa lockdown dahil sa mataas na bilang ng kumpirmadong COVID-19 positive rito.

Inaasahang maitatayo na sa susunod na pito hanggang 10 araw ang laboratory equipment na binili ng bansa mula sa China.

Ayon ito sa Department of Health (DOH) matapos makabalik kaninang mag-aalas tres ng madaling araw ang C130 plane ng Philippine Airforce na kumuha sa BGI COVID-19 equipment sa Shenzen, China.

Ipinabatid ng DOH na ang nasabing equipment na nagkakahalaga ng $2.5-M ay kayang makapagsagawa ng hanggang 45,000 COVID-19 tests sakaling maging operational.