Judith Estrada-Larino

Inaasahang napasakamay na ng bansa mula sa China ang isang equipment kaugnay sa kampanya ng Pilipinas kontra coronavirus disease 2019 (COVID-19).

Ayon sa Department of Health (DOH), kinuha ng C130 plane ng Philippine Air Force ang BGI COVID-19 laboratory equipment na nagkakahalaga ng $2.5-million.

Ang nasabing laboratory equipment na maaaring mai-set up ng pito hanggang 10 araw ay kayang makapagsagawa ng mahigit 45,000 COVID-19 tests.

Ang naturang equipment ay nakuha ng Pilipinas sa pamamagitan ng grant assistance mula sa Asian Development Bank para mapalakas ang testing capacity ng bansa.

Binalaan ng Department of Science and Technology (DOST) ang publiko kaugnay sa pagbili ng face shield na umano’y gawa ng Metals Industry Research and Development Center (MIRDC) nito.

Sinabi ni DOST Secretary Fortunato Dela Peña na nakatanggap sila ng balitang ang mga nasabing face shields na mayroong pangalan at logo ng DOST MIRDC ay ibinibenta online.

Ayon kay Dela Peña, ang mga nasabing face shields ay maramihang ginawa ng DOST para ibigay ng libre sa mga frontliners.

Kasabay nito, nanawagan si Dela Peña sa publiko sa donasyon ng raw materials para sa face shields tulad ng polypropylene at acetate sheets na aniya’y may kahirapang hanapin.

Balik na ang sesyon ng Kamara sa ika-4 ng Mayo –may quarantine man o wala.

Ayon ito kay House Speaker Alan Peter Cayetano dahil nakasaad ito sa konstitusyon na dapat sundin ng Kongreso.

Sinabi ni Cayetano na hinihintay na lamang nila ni Senate President Vicente Sotto III ang magiging desisyon ng Pangulong Rodrigo Duterte sa estado ng quarantine.

Sakaling naka-quarantine pa rin ang buong Luzon pagsapit ng naturang petsa, inihayag ni Cayetano na gagawing online ang sesyon ng mga kongresista.

Tiwala naman si House Majority Floorleader Martin Romualdez na wala silang magiging problema sa paggamit ng electronic technology matapos lumahok ang 300 kongresista sa idinaos na special session kung saan inaprubahan ang Bayanihan to Heal as One Act.a

Pinangangambahang dumoble sa taong ito o pumalo sa halos 300-milyon ang bilang ng mga taong magugutom dahil sa pagbagsak ng ekonomiya dulot ng coronavirus disease 2019 (COVID-19) pandemic.

Ayon ito sa pagtaya ng World Food Programme (WFP) ng United Nations na nagsabing inaasahang 130-milyong tao ang makararanas ng gutom ngayong taon dahil sa epekto ng COVID-19 pandemic sa nawalang kita sa turismo, bumagsak na remittances at pagbiyahe at iba pang restrictions.

Sinabi ni Arif Husain, chief economist at director of research, assessment and monitoring ng WFP na matindi ang epekto ng COVID-19 sa food security dahil nasa 135-milyon na ang mga taong nagugutom bago pa man ito mameste sa mundo.

Patuloy na umaakyat ang bilang ng mga Pilipinong nagpopositibo sa coronavirus disease 2019 (COVID-19) sa ibang bansa.

Ipinabatid ng Department of Foreign Affairs (DFA) na hanggang nitong April 21, nasa 1,084 na ang overseas Pinoys ang kumpirmadong positibo sa COVID-19 sa 42 bansa at rehiyon.

Sa naturang bilang, 662 ang patuloy na ginagamot sa iba’t ibang ospital, 269 ang naka-recover na sa virus at 10 ang nadagdag sa death toll na nasa 154 na.

Pinakarami pa ring naitalang confirmed COVID-19-positive na overseas Pinoys sa bahagi ng Asia Pacific Region na may 270 cases, sumunod ang Europe  na may 371 cases, Middle East/Africa na mayroong  156 cases at America na nakapagtala naman ng 278 cases.

Bumabagal na ang doubling time ng coronavirus disease 2019 (COVID-19) cases sa Pilipinas.

Ito, ayon kay Health Undersecretary Maria Rosario Vergeire, ay resulta ng mahigit isang buwang pag-iral ng enhanced community quarantine (ECQ) sa Luzon.

Sinabi ni Vergeire na batay sa pahayag ng mga expert, mula sa tatlong araw, bumagal pa ang doubling time sa limang araw na malaking improvement.

Ngangahuluganito aniya na kung dati rati, sa loob ng tatlong araw ay dumo-doble ang mga kaso, ngayon ay mas matagal na o halos limang araw na ang average.

Inihayag ni Vergeire na target ng gobyerno na umabot sa 30 araw ang doubling time ng COVID-19 sa Pilipinas.

Nadagdagan pa ang bilang ng mga nagpositibo sa coronavirus disease 2019 (COVID-19) sa bansa.

Batay sa huling datos ng Department of Health (DOH) ngayong ika-21 ng Abril, pumapalo na sa 6,599 ang tinamaan na ng nakakahawang sakit.

140 ang panibagong napaulat na positibong kaso sa nakalaipas na 24-oras.

Siyam na pasyente naman ang naitalang bagong nasawi kaya’t nasa 437 na  ang death toll sa COVID-19 sa Pilipinas.

Samantala, 41 pasyente ang gumaling at nakarecover sa nasabing virus kaya’t nasa 654 na ang total recoveries mula sa COVID-19.

Itutuloy ng Department of Public Works and Highways (DPWH) ang pagkumpuni ng mga kalsada sa kabila nang pag-iral ng enhanced community quarantine (ECQ) sa Luzon.

Subalit, nilinaw ni DPWH National Capital Region (NCR) District Engineer Ador Canlas na lilimitahan lamang nila ang pagkumpuni ng mga pangunahing kalsada tulad ng EDSA, C5 at Roxas Boulevard na maituturing aniyang crucial sa delivery ng essential services sa gitna ng banta ng coronavirus disease 2019 (COVID-19) pandemic.

Tiniyak ni Canlas ang quarantine protocols ng kanilang mga manggagawa na pagsusuotin nila ng personal protective equipment (PPE), bibilinang obserbahan ang social distancing at patitirahin pansamantala sa COVID-19 free facilities.

Sasamantalahin aniya nila ang pagkumpuni sa mga pangunahing kalsada sa NCR ngayong maluwag ang trapiko at mapapabilis ang trabaho ng kanilang mga tauhan mula alas-8 ng umaga hanggang alas-5 ng hapon.