Judith Estrada-Larino

Nakikitaan na ng improvement ang mga pasyenteng ginamitan ng blood plasma mula sa mga naka recover sa coronavirus disease 2019 (COVID-19).

Ipinabatid ito ni Philippine General Hospital (PGH) Director Dr. Gerardo Legaspi matapos bumubuti na ang kondisyon ng dalawa sa limang pasyente na sumailalim sa blood plasma therapy simula nuong nakalipas na linggo.

Samantalang ang dalawa pa aniyang pasyente ay hindi naman na lumala pa ang kondisyon subalit ang isa ay pumanaw dahil sa pre-existing condition nito.

Sinabi ni legaspi na kuntento naman sila sa resulta ng paggamit nila ng blood plasma.

Hinimok ng Department of Information and Communications Technology (DICT) ang mga entity na magparehistro sa rapid pass system nang bultuhan o maramihang registration.

Ito, ayon kay DICT Secretary Gregorio Honasan, ay sa gitna na rin nang pagdagsa ng mga application hinggil sa rapid pass.

Sinabi ni Honasan na para mapabilis ang pagproseso ng application, hinihikayat nila ang lahat ng government, private at business entities na nasa essential services na irehistro ang kanilang mga empleyado sa pamamagitan ng bulk application.

Ang tinutukoy ni Honasan ay ang rapid pass sytem na isang virtual identification system na naglalayong matiyak ang mabilis na pagdaan sa mga checkpoints ng frontliners at iba pang indibidwal na exempted mula sa enhanced community quarantine.

Nag-isyu ng show-cause orders ang Department of the Interior and Local Government (DILG) laban sa 29 na barangay captain sa Metro Manila.

Ito, ayon kay DILG Spokesman Undersecretary Jonathan Malaya, ay dahil sa umano’y kabiguan ng mga nasabing barangay chairmen na ipatupad ang mga panuntunan hinggil sa enhanced community quarantine (ECQ) sa kani-kanilaang mga lugar.

Kabilang sa mga sumbong na natanggap ng DILG ay hindi pag-obserba ng physical distancing at pagkakaroon ng mass gatherings o pagtitipon sa ilang lugar.

Sinabi ni DILG secretary Eduardo Año na hindi puwedeng maging kampante sa coronavirus disease 2019 (COVID-19) kaya’t binibigyan niya ng 48-oras ang mga barangay chairmen mula sa pagkatanggap sa show cause orders na magpaliwanag kung bakit hindi sila dapat sampahan ng administrative charges

Ilan sa mga naisyuhan ng show cause orders ay pinuno ng Barangays 11, 12, 20, 154, 220, 350 at 212 sa Maynila , Barangay Bagong Silangan, 178, 12, 176, 37 at 129 sa Caloocan, gayundin sa ilang barangay sa Quezon City, Parañaque, Makati, Malabon at Muntinlupa.

Nagsimula nang tumanggap kahapon ang Philipine Charity Sweepstakes Office (PCSO) ng online application para sa mga nais humingi ng tulong.

Nagtalaga ng online access ang PCSO para sa National Capital Region (NCR) para tumugon sa medical assistance at requests para sa chemotherapy, dialysis, hemophilia at post transplant medicines.

Ito ay dahil hindi personal na makakatungo ng PCSO para humingi ng tulong ang publiko dahil sa umiiral na enhanced community quarantine (ECQ).

Para sa mga nais humingi ng tulong, maaaring bisitahin ang website ng PCSO na www.pcso.gov.ph at i click ang e-services at ang NCR online application.

Tinawag na ‘fake news’ ng Department of Education (DepEd) ang isang litrato na kumalat sa social media na nagpapakita ng umano’y school calendar para sa taong ito.

Sa nasabing litrato, makikitang magbubukas umano ang school year 2020-2021 sa August 3 at magtatapos sa April 16, 2021.

Nakalagay na rin sa nasabing litrato ang schedule ng quarterly examinations, Christmas break at iba pa.

Binigyang diin ng DepEd na ilalabas nila ang official school calendar para sa darating na school year sa pamamagitan ng isang memorandum na kanilang ipopost sa kanilang website at Facebook page.

Pinayuhan ng DepEd ang publiko na maging maingat sa pagpapakalat ng hindi beripikdong impormasyon lalo na sa social media.

Una nang inihayag ni Education Secretary Leonor Briones na malaki ang posibilidad na sa buwan ng Agosto na magbukas ang school year 2020-2021 sa elementary at high school level.

Nakabalik na ng bansa ang mahigit 300 Pinoy seamen mula sa France.

Ang mga naturang Pinoy seafarers ng Costa Smeralda ay sinalubong ng mga opisyal mula sa Department of Foreign Affairs (DFA).

Bayanihan in Action: The DFA welcomes home 341 Filipino seafarers of Costa Smeralda from France this afternoon. The DFA continues to implement the whole-of-nation approach in repatriating Overseas Filipinos amid the COVID-19 pandemic. pic.twitter.com/p3n2GyOjuv

— DFA Philippines (@DFAPHL) April 22, 2020

Samantala, 223 pang Pinoy mula naman sa Saudi Arabia ang nakauwi na rin ng bansa sa pamamagitan ng special flight ng Saudi Airlines patungong Pilipinas.

Tiniyak ng DFA ang tuluy-tuloy na hakbangin nila para ma-repatriate ang mga overseas Pinoys dahil sa coronavirus disease 2019 (COVID-19) pandemic.

Mainit at maalinsangang panahon ang naranasan sa Quezon City, ngayong Miyerkules, ika-22 ng Abril.

Ipinabatid ng PAGASA na umabot sa 42°C ang naramdamang heat index sa bahagi ng Science Garden sa Quezon City, mag-a-ala-2 ng hapon.

Samantala, umabot naman sa 35.2°C ang pinakamataas na temperatura sa nasabing lugar.

Dahil ditto, pinayuhan ng PAGASA ang publiko na dalasan ang pag-inom ng tubig at iwasan ang anumang physical activities tuwing tanghali at hapon.

Nadagdagan pa ang bilang ng mga Pilipinong apektado ng coronavirus disease 2019 (COVID-19) sa ibang bansa.

Ayon sa Department of Foreign Affairs (DFA), hanggang kahapon, April 22, nasa 1,114 na overseas Pinoys ang kumpirmadong positibo sa COVID-19 sa 42 bansa at rehiyon.

(1/3) Of the 42 countries and regions with confirmed COVID-19 cases among Overseas Filipinos, the DFA reports a total of 30 new cases, 26 new recoveries, and 6 new deaths in the Americas, Europe, Asia and the Pacific, and Middle East/Africa as of today. pic.twitter.com/DJFzGAF7AH

— DFA Philippines (@DFAPHL) April 22, 2020

Sa naturang bilang, 660 ang patuloy na ginagamot sa mga ospital samantalang 295 naman ang naka-recover mula sa nasabing virus.

Lima naman ang nadagdag sa mga nasawing Pinoy abroad kaya’t nasa 159 na ang death toll.

Pinakamarami ang naitalang confirmed COVID-19-positive na Pinoy sa Europa na may 374 na kaso, ikalawa ang Asia Pacific Region na mayroong 299 na kaso, Middle East/Africa na may 162 na kaso at Americas na mayroon namang 279 cases.

Nagsimula nang tumanggap ng mga pasyenteng apektado ng coronavirus disease 2019 (COVID-19) ang ilang dagdag na quarantine facility.

Kabilang sa mga quarantine facilities na ito, ayon kay Health Undersecretary Maria Rosario Vergerie, ang PICC, Asean Convention Center sa Central Luzon at World Trade Center na gagamitin para sa mga overseas Filipino worker.

Halos 300 aniya ang bed capacity ng PICC, 150 sa Asean Convention Center at 502 sa World Trade Center.

Samantala, ipinabatid ni Vergeire na hindi natuloy ang pagbubukas ng New Clark City National Government Administration Center noong Martes dahil kailangan pang magsagawa ng ilan pang safety measures at inspection para masiguro ang kaligtasan ng mga pasyente at healthcare workers sa pasilidad.