Judith Estrada-Larino

 Halos 900 estudyante sa private schools ang lumipat na sa public schools simula nang maranasan ng bansa ang COVID-19 pandemic.

Ayon ito kay Dr. Anthony Tamayo, Chairman ng Coordinating Council of Private Educational Associations (COCOPEA) kaya’t maraming pribadong paaralan na rin ang nagsasara.

Ipinabatid naman ni Atty Joseph Noel Estrada, Managing Director ng COCOPEA na bumaba ang enrollment sa 60% ng private schools.

Dahil dito, umapela si Estrada sa gobyerno na i-consider ang private schools bilang complementary o isulong din ang kalidad tulad nang sa public school system.

Hindi aniya dapat makita ang kumpetisyon ang private sector subalit nagku-compliment nga sa public schools kaya’t sa halip na magtayo ng mga gusali mas magandang mabigyan ng vouchers ang mga estudyante para naman mapunan ang mga bakanteng silid aralan sa private schools para hindi na magsara ang ilan sa mga ito.

Hindi pa tinatanggap ng Malakanyang ang pagbibitiw sa puwesto ni Department of Agriculture (DA) Undersecretary Leocadio Sebastian.

Lumitaw ito sa pagdinig ng Senate Blue Ribbon Committee hinggil sa kontrobersyal na Sugar Order #4 nang tanungin ni Senador Risa Hontiveros si Sebastian kung tinanggap na ba ang resignation nito.

Sinabi ni Sebastian na suspendido lang siya matapos patawan ng 90 day preventive suspension.

Samantala, ipinabatid ni Sebastian na sa meeting nila sa Malacañang nuong August 1, kasama ang Pangulong Bongbong Marcos Jr., mga DA at Sugar Regulatory Administration (SRA) officials at Landbank officials na walang sinumang tumutol sa importasyon ng asukal.

Sa katunayan aniya ay inatasan ng pangulo ang SRA na mag-draft ng Sugar Importation Order. –  sa ulat ni Cely Ortega-Bueno (Patrol 19)

Halos 150% ang itinaas ng kaso ng dengue sa taong ito kumpara sa parehong panahon nuong 2021.

Ayon sa Department of Health (DOH) nasa kabuang 118,785 ang kaso ng dengue na naitala mula January 1 hanggang August 13.

Batay sa national dengue data ng DOH 18% o pinakamataas na naitala ay mula sa Central Luzon na nasa 21,247.

Sinundan ito ng Central Visayas na nakapagtala ng mahigit 11,000 dengue cases o 10% at National Capital Region (NCR) na nasa 11, 064 o 9%.

Nasa halos 20,000 kaso ng dengue o 19,816 ang nai-record ng DOH mula lamang July 17 hanggang August 13 kung saan pinakamarami ring naitalang kaso ay mula sa gitnang Luzon.

Nakipag kasundo na ang pamilya ng nasawing 52 anyos na security guard sa kampo ng driver na nakasaga ritong SUV sa Dasmariñas City sa Cavite.

Dahil dito, ipinabatid ni Dasmariñas Police Chief Police Lt. Colonel Juan Oruga na pinalaya na ang hindi na pinangalanang suspek na una nang kinasuhan ng paglabag sa Anti-Drunk Driving Law.

Ang biktima ay nagmamando ng trapilo nang mabangga ng nasabing SUV at kaagad isinugod sa Dasmariñas City Medical Center subalit idineklarang dead on arrival.

Inaresto ng mga otoridad ang kapatid ni CHEd Chairman Prospero De Vera.

Ayon kay PNP Chief General Rodolfo Azurin, Jr., si Adora Faye De Vera ay dinampot ng mga otoridad base sa inisyung warrant ni Judge Guilljie Delfin Lim ng Iloilo City RTC dahil sa kasong multiple murder at pagkaka-ugnay sa CPP-NPA.

Kinumpirma ni De Vera na kapatid niya ang inaresto at si Adora aniya ay mahigit 25 taon na niyang hindi nakikita at nakakausap o simula nang magpasya itong sumama sa mga rebeldeng komunista.

Dasal pa rin naman aniya niya ang kaligtasan at magandang kalusugan ng kapatid habang nakakulong at nahaharap sa mga kaso.

Binigyang diin ni De Vera ang suporta niya sa administrasyon ng Pangulong Ferdinand Bongbong Marcos, Jr. sa kampanya nitong tuldukan ang insurgency na aniya’y sumira na ng maraming buhay at ari-arian.

Walang dapat na pagtaas ng presyo ng mga gulay sa Metro Manila at iba pang bahagi ng bansa matapos bumayo ang bagyong Florita.

Ayon kay Agriculture Undersecretary Khristine Evangelista kung pagbabatayan ang sitwasyon ng supply ng gulay mula Ilocos Norte hindi na aniya tataas sa dalawang metriko tonelada ng gulay ang ibinabagsak sa Metro Manila at ilan pang lugar sa norte na bigas na ang karamihan sa supply.

Ang ibig sabihin nito aniya ay hindi lamang sa Ilocos Norte nanggagaling ang mga gulay na sinu-supply sa Metro Manila kaya’t walang dapat pagtaas sa presyo.

Isa ang Ilocos Norte sa mga binayo ng bagyong Florita kung saan tatlong milyon ang nasira sa agrikultura at mahigit 300 magsasaka ang naapektuhan.

Pinaiimbestigahan na ng DILG sa BJMP ang protesta ng mga inmates sa Iloilo District Jail.

Sinasabing hinihiling ng mga bilanggo ang pagsibak sa jail warden dahil sa kawalan ng pagkain nila.

Dahil dito, ipinag utos na rin ng DILG ang pansamantalang relief ni Jail Warden Chief Inspector Norberto Miciano.

Kaugnay nito, inatasan ng DILG si BJMP Region 6 Director Clint Tangere na tugunan ang concerns ng mga persons deprived of liberty at tiyaking makakatanggap ng sapat na pagkain at iba pang pangangailangan ng mga ito.

Una nang nag protesta ang isandaang inmates na umakyat pa sa bubongan ng bilangguan bitbit ang banners kung saan nakasulat ang pagpapahayag nila ng gutom at panawagang sibakin ang jail warden.