Nakipag kasundo na ang pamilya ng nasawing 52 anyos na security guard sa kampo ng driver na nakasaga ritong SUV sa Dasmariñas City sa Cavite.
Dahil dito, ipinabatid ni Dasmariñas Police Chief Police Lt. Colonel Juan Oruga na pinalaya na ang hindi na pinangalanang suspek na una nang kinasuhan ng paglabag sa Anti-Drunk Driving Law.
Ang biktima ay nagmamando ng trapilo nang mabangga ng nasabing SUV at kaagad isinugod sa Dasmariñas City Medical Center subalit idineklarang dead on arrival.
Inaresto ng mga otoridad ang kapatid ni CHEd Chairman Prospero De Vera.
Ayon kay PNP Chief General Rodolfo Azurin, Jr., si Adora Faye De Vera ay dinampot ng mga otoridad base sa inisyung warrant ni Judge Guilljie Delfin Lim ng Iloilo City RTC dahil sa kasong multiple murder at pagkaka-ugnay sa CPP-NPA.
Kinumpirma ni De Vera na kapatid niya ang inaresto at si Adora aniya ay mahigit 25 taon na niyang hindi nakikita at nakakausap o simula nang magpasya itong sumama sa mga rebeldeng komunista.
Dasal pa rin naman aniya niya ang kaligtasan at magandang kalusugan ng kapatid habang nakakulong at nahaharap sa mga kaso.
Binigyang diin ni De Vera ang suporta niya sa administrasyon ng Pangulong Ferdinand Bongbong Marcos, Jr. sa kampanya nitong tuldukan ang insurgency na aniya’y sumira na ng maraming buhay at ari-arian.
Walang dapat na pagtaas ng presyo ng mga gulay sa Metro Manila at iba pang bahagi ng bansa matapos bumayo ang bagyong Florita.
Ayon kay Agriculture Undersecretary Khristine Evangelista kung pagbabatayan ang sitwasyon ng supply ng gulay mula Ilocos Norte hindi na aniya tataas sa dalawang metriko tonelada ng gulay ang ibinabagsak sa Metro Manila at ilan pang lugar sa norte na bigas na ang karamihan sa supply.
Ang ibig sabihin nito aniya ay hindi lamang sa Ilocos Norte nanggagaling ang mga gulay na sinu-supply sa Metro Manila kaya’t walang dapat pagtaas sa presyo.
Isa ang Ilocos Norte sa mga binayo ng bagyong Florita kung saan tatlong milyon ang nasira sa agrikultura at mahigit 300 magsasaka ang naapektuhan.
Pinaiimbestigahan na ng DILG sa BJMP ang protesta ng mga inmates sa Iloilo District Jail.
Sinasabing hinihiling ng mga bilanggo ang pagsibak sa jail warden dahil sa kawalan ng pagkain nila.
Dahil dito, ipinag utos na rin ng DILG ang pansamantalang relief ni Jail Warden Chief Inspector Norberto Miciano.
Kaugnay nito, inatasan ng DILG si BJMP Region 6 Director Clint Tangere na tugunan ang concerns ng mga persons deprived of liberty at tiyaking makakatanggap ng sapat na pagkain at iba pang pangangailangan ng mga ito.
Una nang nag protesta ang isandaang inmates na umakyat pa sa bubongan ng bilangguan bitbit ang banners kung saan nakasulat ang pagpapahayag nila ng gutom at panawagang sibakin ang jail warden.
Handa nang mag lockdown ang Negros Occidental matapos kumpirmahin ng DOH na nasa katabing isla ng Iloilo ang ika-apat na kaso ng monkeypox sa bansa.
Sinabi ni Dr. Ernell Tumimbang, Provincial Health Officer na isa sa mga hakbangin nila ay posibleng paghihigpit sa mga daungan para mabantayan ang mga barkong galing ng Iloilo.
Patuloy naman ang panawagan ni Negros Occidental Governor Bong Lacson sa kaniyang constituents na maging alerto laban sa monkeypox.
Una nang kinumpirma ng DOH na ang 25 anyos na pasyenteng nagkaruon ng monkeypox ay residente ng isang bayan sa Iloilo na wala namang travel history.
Posibleng mabawasan ang presyo ng lotto ticket gayundin ang buwis sa panalo rito.
Kasunod na rin ito nang paglusot sa House Committee on Ways and Means ng panukalang bawasan ang tax sa lotto.
Kapag naging batas na, ang jackpot prize na mahigit 10,000 piso ay papatawan lamang ng 10% buwis mula sa 20% na nakasaad sa Train Law.
Bababa rin sa 10% mula sa kasalukuyang 20% ang Documentary Tax Stamp ng lotto ticket.
Lumalabas sa pag-aaral ng komite, bumaba ang kita ng gobyerno mula nang taasan ang buwis sa lotto na nakaapekto naman sa pagtulong ng PCSO sa mga nangangailangan.
Inaasahang babalik sa normal ang supply ng beep cards sa unang quarter ng 2023.
Ayon ito kay Transportation Undersecretary for Rails Cesar Chavez bagamat patuloy nilang hinihimok ang beep card users na i-share ito sa iba.
Tiniyak ni Chavez na tuluy-tuloy naman ang paghahanap nila ng paraan katuwang ang beep card provider nilang AF Payments Incorporated para matugunan ang shortage ng beep cards.
Una nang ipinabatid ni Chavez na ang kakulangan sa stored value passenger train cards ay dahil sa kinakapos ding supply ng global chip dulot naman ng COVID-19 lockdown sa China at patuloy na iringan ng Russia at Ukraine.
Umalagwa muli si EJ Obiena matapos manaig sa 26th Internationales Stabhochsprung-Meeting sa Jockgrim, Germany.
Sumulong nang mabilis sa 5.81 meter mark si Obiena para magwagi sa 11 man field.
Ang nasabing performance ng Pinoy pole vaulter ay sapat na para biguin si world number 2 Chris Nielsen ng Amerika na nasa ikalawang spot at sinundan ni Australian Kurtis Marschall sa ikatlong puwesto.
Kaagad din namang babalik sa laro si Obiena sa Athletisism Meeting sa Lausanne, Switzerland mula August 25 hanggang 26 bago sumabak sa TRU Athletics Classic sa August 28.
Sinibak ang anim na opisyal ng Bureau of Customs (BOC) sa Port of Subic.
Kabilang sa mga sinibak sina District Collector Maritess Theodossis Martin, Deputy Collector for Assessment Maita Sering Acevedo, Deputy Collector for Operations Giovannie Ferdinand Aguillon Leynes.
Bukod pa ito kina Belinda Fernando Lim – Chief, Assessment Division, Vincent Mark Solamin Malasmas – Commander ng Enforcement Security Service at Justice Roman Silvoza Geli – Ciis Supervisor.
Ayon kay acting Customs Commissioner Yogi Filemon Ruiz, ang mga nasabing opisyal ay pansamantalang inilipat sa Office of the Commissioner habang iniimbestigahan pa ang umano’y smuggling ng asukal mula sa Thailand.
Una nang lumabas sa imbestigasyon ng BOC – Customs Intelligence and Investigation Service na ang imported sugar ay gumamit ng recycled permit o import permit na nagamit na sa mga nakalipas na inangkat na asukal.
Magugunitang ibinabala ni Press Secretary Trixie Cruz-Angeles na mananagot ang sinuman sa customs kapag napatunayang nakipagsabwatan ang mga tauhan at opisyal ng BOC sa smugglers gamit ang recycled sugar import permits.
Nag subside na o bumaba na ang bahang dulot ng Bagyong Florita sa malaking bahagi ng bansa.
Ipinabatid ni NDRRMC Spokesperson Mark Timbal na 20 sa 30 ng flooding incidents na ipinaabot sa kanila ang bumaba na at apat ang pababa na.
Ayon pa kay Timbal, pitong kalsada pa at pito ring tulay ang hindi pa uubrang madaanan.
Una nang ini-report ng NDRRMC na halos 5,000 katao o nasa 1,300 pamilya mula sa tatlong rehiyon ang naapektuhan ng Bagyong Florita.