Bumaba ang naitalang bagong kaso ng COVID-19 sa Central Visayas.
Ayon sa DOH, mula August 28 hanggang September 3, nasa 488 new cases ang naitala sa Central Visayas kung saan nasa 70 ang average daily rate.
Mula sa halos 500 bagong kaso ng COVID 19 sa nasabing rehiyon, apat ang nasa kritikal na kondisyon.
Hindi na interesado ang Mandaue City sa Cebu na bitiwan na ang face mask rule.
Ayon ito kay Mandaue City Mayor Jonas Cortes matapos batikusin ng National Officials ang pasya ng Cebu City Government hinggil sa Non-obligatory wearing ng face mask.
August 31 nang magpalabas ng pahayag si Cortes na bukas siyang sundan ang naturang desisyon ng Cebu City Government.
Subalit sinabi ni Cortes na nagbago ang kanyang isip dahil ayaw niyang isugal ang kalusugan ng kanyang mga kababayan kayat dapat mahigpit na sundin ang ordinansa sa pagsusuot ng face mask.
Bukas naman aniya siya sakaling i-lift ng Konseho ang kautusan hinggil sa pagsusuot ng face mask ng mga residente ng Mandaue City.
Isang Low Pressure Area (LPA) sa labas ng Pilipinas ang mino-monitor ng PAGASA.
Ang nasabing sama ng panahon, ayon sa PAGASA ay pinakahuling namataan sa layong mahigit 1,600 kilometro silangan- hilagang- silangan ng extreme Northern Luzon.
Taglay ng nasabing LPA ang pinakamalakas na hanging umaabot sa 45 kilometers kada oras malapit sa gitna at may pagbugso na umaabot sa 55 kilometers kada oras.
Posibleng bukas ay nasa PAR na ang naturang sama ng panahon kung hindi magbabago ang bilis nito at magpapahina ito sa Hanging Habagat kapag nasa bansa na.
Inalis muna pansamantala ang Police Community Precinct (PCP) sa Quezon City.
Binigyang diin ng Quezon City Police District na mas madaling malapitan ang Pulisya dahil nasa labas at nagpapatrulya ang mga ito.
Ayon sa QCPD, dapat masigurong gising na gising ang mga Pulis kung nasa labas sila at kaagad mahihingan ng saklolo ng publiko kaysa nasa loob ang mga ito at naghihintay lamang ng magre- reklamo.
Naglibot sa iba’t- ibang area sa lungsod ang mga pinuno ng QCPD at nagtayo na rin ng checkpoint para sa Anti-Criminality Campaign.
Sinelyuhan ng Pilipinas at Indonesia ang apat na kasunduang may kinalaman sa ekonomiya, kultura at defense.
Kasunod na rin ito ng state visit ng Pangulong Ferdinand “Bongbong” Marcos, Jr. sa Indonesia.
Kabilang sa mga nasabing kasunduan ang: plan action sa pagitan ng gobyerno ng Pilipinas at Indonesia mula 2022 hanggang 2027, Memorandum of Understanding sa pagitan ng dalawang bansa hinggil sa cultural cooperation.
Bukod pa ito sa: kasunduan sa cooperative activities sa aspeto ng defense and security sa pagitan ng dalawang bansa at Memorandum of Understanding for Cooperation para sa development and promotion ng creative economy sa pagitan ng Indonesia at Pilipinas.
Ayon sa Pangulong Marcos, mahaba ang naging pag uusap nila ni Indonesian President Joko Widodo hinggil sa dapat na maging papel ng ASEAN sa mga hamong kinakaharap may kinalaman sa geopolitics hindi lamang sa rehiyon kundi maging sa iba pang bahagi ng mundo.
Nagpasalamat din si PBBM sa Indonesia sa pagtulong nito sa infrastructure programs ng nakalipas na Duterte administration gayundin sa patuloy na commitment ng bansa hindi lamang sa mga programang ito kundi para mapalakas at mapaganda pa ang relasyon ng dalawang bansa.
Pinawalang bisa ng Court of Appeals (CA) ang arrest warrant na inisyu nuong November 2019 laban sa nakakulong na aktibistang si Reina Mae Nasino at dalawang iba pang kasamahan nito.
Kasunod na rin ito nang pagpabor ng Appellate Court sa Petition for Certiorari na isinampa ni Nasino, Ram Carlo Bautista at Alma Moran laban kay Manila RTC Judge Marivic Balisi-Umali at ibinasura ang search warrants na inilabas ni QC RTC Judge Cecilyn Burgos-Villavert.
Ayon sa CA, nakagawa ng Grave Abuse of Discretion si Balisi-Umali nang pabiran ang validity ng search warrants na naka-address sa tatlong magkakaibang lugar.
Binigyang diin pa ng Appellate Court na walang probable cause na pinagbasehan ang pag i isyu ng search warrants.
Magugunitang nanganak si Nasino habang nakakulong subalit namatay din si Baby River makalipas ang tatlong buwan o October 2020 nang ma diagnose ito ng pneumonia.
Personal ang dahilan nang maagang pagreretiro ni COMELEC Director James Jimenez.
Kasama na rito, ayon kay COMELEC Chairman George Garcia ang estado ng kalusugan ni Jimenez kaya’t nag avail ito ng early o optional retirement.
Gayunman sinabi ni Garcia na ang retirement ni Jimenez ay hindi makakaapekto sa imbestigasyon sa kontrobersyang kinasasangkutan ng organizer ng Halalan 2022 Debate na Hub Manila.
Bagama’t hindi naman aniya naka sentro kay Jimenez ang nasabing imbestigasyon.
Tatakbo ng 9 hanggang 12 buwan ang pilot operation ng Automated Fare Collection System.
Ayon kay Transportation Undersecretary Timothy John Batan, kapag nagtagumpay ang pilot implementation, tatanggap pa ang sistema ng mas maraming payment cards maliban sa Landbank of the Philippines at masasakop ang mas maraming PUV units at ruta.
Sinabi ni Batan na uubra pa rin namang magbayad ng cash ang mga pasahero kung wala silang payment cards.
Sa ngayon aniya ay tanging ang Landbank prepaid at credit contactless cards ang tinatanggap sa 150 kasaling PUVs sa bansa sa ilalim ng pilot run.
Pasok sa ikalawang round ng US Open Juniors si number 10 Alex Eala matapos pataubin si Annabelle Xu ng Canada.
Tinambakan ni Eala ang Canadian player sa iskor na 6-3, 6-0.
Ang nasabing event ang unang US Open Girls’ Tournament Junior Events ng 17 anyos na Pinay.
Hawak ni Eala na Women’s Tennis Association World Number 297 ang dalawang Girls Doubles Grand Slam Titles na 2020 Australian Open at 2021 Roland Garros Open.
Napasakamay ni Pinoy pole vaulter EJ Obiena ang ikalawang medalyang ginto niya nang magtagumpay sa St. Wendel City Jump sa Sankt Wendel, Germany.
Nakapagtala si Obiena ng 5.86 meters para manguna sa nasabing event kung saan naitala niya rin ang bagong record dito.
Ipinaabot naman ni Obiena ang kanyang pasasalamat sa pag imbita sa kanya sa nasabing event.
Balik aksyon si Obiena sa September 2 sa Memorial Van Damme, ang Brussels Leg ng Diamond League.