Judith Estrada-Larino

Pumapalo sa P18-B ang nalulugi sa bansa sa bawat araw ng lockdown dahil sa coronavirus disease 2019 (COVID-19) pandemic.

Ayon ito kay Congresswoman Stella Quimbo, co-chair ng House Defeat COVID-19 Committee Economic Cluster kaya’t mahalagang maipasa na ang isang economic stimulus plan para makaagapay ang ekonomiya ng bansa sa global health crisis.

Sinabi ni Quimbo na hadlang sa muling pagbubukas ng ekonomiya ang liquidity concerns ng mga negosyo at aniya’y fear factor sa mga manggagawa.

Ipinabatid pa ni Quimbo na sa P18-B na lugi, P12.5-B dito ay unearned wages at payroll na sinagot ng non-essential businesses sa kasagsagan ng lockdown at dagdag na P5.5-B pa sa unearned corporate income.

Lumalabas sa survey ng NEDA sa 40,000 respondents, 48.3% ang nawalan ng trabaho o walang sinasahod sa gitna nang pinaiiral na enhanced community quarantine (ECQ).

Uubrang magdeklara ng martial law ang Pangulong Rodrigo Duterte dahil sa COVID-19 pandemic.

Ayon ito kay Presidential Chief Legal Counsel Salvador Panelo.

Nilinaw ni Panelo na ang pakahulugan ng invasion bilang nakasaad na dahilan sa ilalim ng 1987 constitution sa pagdedeklara ng batas militar ay nag-evolve na at hindi na lamang ito para sa paggamit ng armadong puwersa para umukupa ng isang bansa.

Ang invasion aniya ay maaari na ring tumukoy sa pagpasok ng isang sakit na malilipat o makakahawa sa sa iba tulad ng nangyayari ngayon dahil sa COVID-19 pandemic.

Pansamantalang sinuspinde ang retrenchment ng ilang medical workers sa University of Santo Tomas Hospital.

Batay sa abiso ipinabatid ni Associate Professor Giovanna Fontanilla, director ng UST office of public affairs na subject for review pa ang memorandum na may petsang April 29 hinggil sa termination of employment.

Ang nasabing usapin aniya ay tatalakayin pa ng UST board of trustees sa May 20.

Kasabay nito ay inihayag ni Fontanilla ang pakikiisa ng UST sa panalangin ng publiko para masugpo ang COVID-19 pandemic.

Makatuwiran lamang na mag-isyu ng provisional authority ang National Telecommunications Commission (NTC) sa ABS-CBN para patuloy na makapag-operate ito kahit expired o paso na ang kanilang prangkisa.

Ayon ito kay Senate Majority Floorleader Juan Miguel Zubiri at wala aniya siyang nakikitang dahilan para hindi mag-isyu ng provisional authority ang NTC sa kapamilya network.

Sinabi pa ni Zubiri na maging si Justice Secretary Menardo Guevarra ay nagsabing maaaring payagan ng kongreso ang NTC na mag isyu ng provisional authority para makapagpatuloy ng operasyon ang ABS-CBN hanggang magpasya ang kongreso sa franchise renewal bills.

Una nang binalaan ni Solicitor General Jose Calida ang mga opsiyal ng NTC na mahaharap sa kaso kapag nagpalabas ang provisional authority sa ABS-CBN matapos mag paso ang prangkisa nito kahapon.

Nag-donate ng plasma ang isang doktor ng St. Lukes Medical Center matapos gumaling mula sa COVID-19.

Una nang nakuha ni Dr. Jennifer Rodriguez, isang cardiology fellow sa St. Lukes ang COVID-19 sa kapwa doktor na una nang nagpositibo sa virus at makalipas ang 10 araw ay gumaling na ang doktor.

Kaugnay nito nanawagan ang St. Lukes sa lahat ng malulusog na COVID-19 survivors na i-donate ang kanilang plasma para makatulong na magamot ang mga pasyente ng COVID-19 na may malalang kondisyon.