Judith Estrada-Larino

Umaabot na sa 23 ang COVID-19 testing centers sa buong bansa

Ayon kay Health Undersecretary Maria Rosario Vergeire pinakahuli nilang nabigyan ng accreditation para magsagawa ng independent testing sa COVID-19 ang Cebu TB Reference Laboratory.

Sa mga nasabing certified testing centers 17 ang nasa Metro Manila at ang anim pa ay nakakalat sa Cordillera Administrative Region at Regions 5, 6, 7 at 11.

Samantala ipinabatid ni Vergeire na tatlo pang laboratoryo ang nasa stage 4 na ng accreditation process ng DOH sa kabuuang 77 pasilidad na nag-apply ng certification kung saan 58 ang nasa stage 3 na.

Dedepende sa desisyon ng experts ang CBCP sa isyu nang pagbabalik ng religious gatherings sa mga lugar na nasa ilalim ng general community quarantine (GCQ).

Sinabi ni Father Jerome Secillano ng public affairs committee ng CBCP na patuloy ang pakikipag-ugnayan nila sa IATF hinggil sa usapin.

Ayon kay Secillano maraming feedback silang natatanggap para sa physical masses subalit kailangang ibalanse nila aniya ito sa kaligtasan ng mga mananampalataya.

Ayaw aniya nilang masisi sa huli kaya’t kailangang maging maingat sa pagpapasya kaya’t bahala na ang experts na mag-assess ng sitwasyon.

Mananatiling suspendido ang lahat ng international flights mula at patungong Pilipinas hanggang May 8.

Ito ayon kay Presidential Spokesman Harry Roque ang rekomendasyon ng Inter Agency Task Force for the management of Emerging Infectious Diseases (IATF-EID).

Sinabi ni Roque na sa kasalukuyan ay pinapayagan naman ang official flights,  emergency flights, cargo ambulance and medical supply flights, weather mitigation flights, maintenance flights at international flights para sa stranded foreign nationals.

Una nang sinuspinde ang international flights para ma decongest ang quarantine facilities sa Metro Manila bilang bahagi ng kampanya kontra COVID-19.

Sinegundahan ni Presidential Spokesman Harry Roque ang pananaw ni Justice Secretary Menardo Guevarra na ang invasion ay maaari lamang gawin ng tao.

Kasunod na rin ito ng naging pahayag ni Chief Presidential Legal Counsel Salvador Panelo na maaaring magdeklara ng martial law ang Pangulong Rodrigo Duterte dahil sa invasion sa bansa ng COVID-19.

Inulit ni Roque ang naging pahayag ng Pangulo na gagamit lamang ito ng martial law kapag patuloy na umatake ang New People’s Army sa mga otoridad na nagdadala ng tulong at ayuda sa mga komunidad.

Binigyang diin pa ni Roque na batid ng Pangulo ang konstitusyon dahil bukod sa abogado, naging public servant ito ng ilang dekada.