Tututukan na ng Philippine Sports Commission (PSC) ang magiging protocol sakaling bumalik na sa normal ang kalagayan matapos ang coronavirus disease 2019 (COVID-19) pandemic.
Sinabi ni PSC Chair William Butch Ramirez na makikipagpulong siya sa National Sports Association at Philippine Olympic Committee hinggil sa mga naturang protocol na kailangang ipatupad at sundin at ito aniya ang irerekomenda nila sa IATF.
Magugunitang kinansela ng PSC ang maraming sports events dahil sa COVID-19 pandemic.
100 pasyenteng Pilipino ang magiging bahagi ng clinical trial ng anti flu drug mula sa Japan.
Ayon kay Health Undersecretary Maria Rosario Vergeire may go signal na ang clinical trial ng Avigan na gagawin sa mga susunod na araw at ang Japanese government ang magus-supply ng nasabing gamot para sa Pinoy patients.
Ipinabatid ni Vergeire na gumagawa na sila ng protocol kung paano pipiliin ang mga ospital at kung sino sa mga pasyente ang isasali sa nasabing clinical trial.
Kumukuha na rin aniya sila ng clearance para sa Avigan mula sa iba’t-ibang institusyon sa bansa.
Nagpatupad ang Philippine Stock Exchange (PSE) ng isang araw na trading suspension sa shares ng ABS-CBN Corporation.
Kasunod ito ayon sa PSE ng closure order na inisyu ng NTC laban sa Kapamilya network.
Sinabi ng PSE na sakop ng one day trading suspension ang shares ng ABS-CBN corporation at Philippine depository receipts ng ABS-CBN holdings corporation.
Ang shares ng ABS-CBN ay nagsara sa 17. 50 kahapon.
Isinusulong ni House Deputy Speaker Prospero Pichay ang pag-amiyenda sa Republic Act 7925 o Public Telecommunications Policy Act.
Inihain ni Pichay ang House Bill 6680 para linawin aniya na kailangang kumuha ng legislative franchise ng broadcast companies para makapag-operate.
Sinabi ni Pichay na ang nakasaad sa batas ay ang pag-obliga sa public telecommunications entities at hindi sa broadcast companies na mag-apply ng congressional franchise.
Hindi aniya malinaw ang definition o pakahulugan sa ilalim ng RA 7925 sa mga terminong telecommunications, broadcasting, public telecommunications entity at franchise.
Partikular na ipinanukala ni Pichay na amiyendahan ang sections 1, 2, 3 at 16 ng RA 7965 kasama na ang pagpapalit ng titulo nito na gagawing Public Telecommunications Policy and Broadcasting Act of the Philippines.
Patuloy na nakaranas ng mainit at maalinsangang panahon ang mga taga Metro Manila kahapon.
Ayon sa Pagasa, pumalo sa 42 degrees Celsius ang heat index sa Science Garden, Quezon City bandang 3 p.m. kahapon at umabot sa 37. 3 degrees Celsius ang air temperature sa nasabing lugar.
Sinabi ng Pagasa na ito na ang pinakamainit na naitala sa Science Garden ngayong tag init.
Samantala limang lugar sa bansa ang nakaranas ng pinakamataas na heat index kahapon.
Kabilang dito ang Dagupan City- 51 degrees Celsius; Sangley Point sa Cavite city- 49 degrees Celsius; Ambulong, Tanauan City – 48 degrees Celsius; Science of Muñoz- 46 degrees Celsius; at Iba, Zambales- 45 degrees Celsius.
Muling pinayuhan ng Pagasa ang publiko na dalasan ang pag-inom ng tubig at iwasan ang physical activities tuwing tanghali o hapon para makaiwas sa heat cramps at heat exhaustion na maaaring magdulot ng heat stroke.
28% lamang ng halos 1,600 local government units (LGUs) ang naka kumpleto ng pagbibigay ng social amelioration cash aid para sa mga mahihirap na pamilya sa gitna ng coronavirus disease 2019 (COVID-19) pandemic.
Ayon kay Department of Social Welfare and Development (DSWD) Secretary Rolando Bautista, nasa 459 na LGUs pa lamang ang nakakumpleto ng pamamahagi ng benepisyo na nasa P68.2-billion sa 12.5-milyong low income families at public utility vehicle drivers.
Una nang inaprubahan ng Pangulong Rodrigo Duterte ang 5-milyon pang dagdag na beneficiary sa ilalim ng social amelioration program (SAP).
Mahigit 1,000 Pilipino ang nawalan ng trabaho sa Qatar dahil sa COVID-19 pandemic.
Bukod sa 1, 645 OFW’s na nawalan ng trabaho ipinabatid ni Philippine Ambassador to Doha Alan Timbayan na 4,044 na Pinoy workers pa ang napuwersang mag-leave.
Hinimok ni Timbayan ang mga Pilipino na sumunod sa advisory ng embahada at maging sa COVID-19 policies ng Qatari government gayundin ay maging kalmado.
Batay sa record ng embahada hanggang nitong Enero mayroong halos 250,000 Pinoy ang nasa Qatar.
Uubra pang umapela sa korte ang ABS-CBN matapos isyuhan ng cease and desist order ng NTC.
Ayon ito kay Justice Secretary Menardo Guevarra na nagsabing posibleng mayroong magandang dahilan ang NTC kaya’t nag isyu ng naturang direktiba.
Hintayin na lamang aniya ang paliwanag ng NTC hinggil sa usapin.
Una nang inihayag ni Guevarra na mayroong sapat na basehan para payagang makapagpatuloy mag operate ang broadcast companies kahit hindi pa nare-renew ang prangkisa nito.
Nag-off air na o tumigil na sa kanilang operasyon ngayong kagabi ang ABS-CBN.
Ito ayon sa pamunuan ng kapamilya network ay bilang pagsunod sa cease and desist order na inisyu ng NTC matapos magpaso o mag-expire noong Lunes, May 4 ang legislative franchise ng broadcast network.
Sinabi ng ABS-CBN na milyong-milyong mga Pilipino ang mawawalan ng mapagkukunan ng mga balita lalo na’t nahaharap sa COVID-19 pandemic ang bansa.
Samantala iginiit naman ng ANC o ABS-CBN News Channel na patuloy pa rin silang eere dahil hindi sila sakop ng nasabing kautusan ng NTC.
Binigyang diin ng ANC na hindi kasama sa inisyung cease and desist order ng NTC ang cable news channel.
Lusot na sa ikatlo at huling pagbasa ng senado ang panulang maglulunsad ng Alternative Learning System – Community Learning Center (ALS-CLC) sa bawat lungsod at munisipyo sa bansa.
Sinabi ni Senador Sherwin Gatchalian may akda ng panukalang Alternative Learning System Act na mas maraming Pilipino ang magkakaroon ng pagkakataong matapos ang kanilang pag-aaral kung bawat lungsod at munisipyo sa bansa’y mayroong sariling ALS-CLC.
Malaki aniyang hamon ang ALS lalo na sa panahon ng COVID-19 pandemic at naghahanda na ang mga paaralan sa muling pagbubukas ng klase.
Tiniyak ni Gatchalian na gagamitin ng als ang iba’t-ibang paraan ng pagtuturo na kailangan sa ilalim nang tinaguriang the new normal tulad ng digital learning, modular instruction at pag-aaral gamit ang radyo at telebisyon.
Batay sa may 2018 Philippines education note ng World Bank mayroong humigit kumulang 24-M Pilipino na 15 tang gulang pataas ang hindi nakapagtapos sa high school at mahigit 2-M mga kabataan may edad lima hanggang 14 ang hindi nag-aaral.