Judith Estrada-Larino

Nakapagtala ng sunod-sunod na aksidente ang MMDA sa bagong lagay na concrete barriers sa EDSA para sa mga bus.

Ipinabatid ng MMDA na batay sa kanilang record simula June 1 hanggang June 19 at nakapagtala ng isang aksidente kada araw dahil sa mga nasabing concrete barriers na inirereklamo ng mga motorista.

Sinabi ni MMDA traffic head for EDSA Bong Nebrija na naglagay naman sila ng hazard markers para maging gabay ng mga motorist.

Karamihan aniya sa dahilan ng aksidente ay nakainom na driver, nagse-cellphone na driver o kaya naman ay over speeding.

Samantala ipinabatid ni Nebrija na patapos na ang paglalagay ng bus stop sa gitna ng EDSA.

Mahigit 51,000 na ang mga Pilipinong nakabalik ng bansa.

Ito ayon sa DFA ay simula nang ikasa ang repatriation sa mga Pilipino mula sa mga bansang apektado ng coronavirus disease 2019 (COVID-19) pandemic.

Sa naturang bilang 57. 33% o halos 30,000 overseas Filipino ay sea based habang land based naman ang nasa 42.67% o halos 22,000.

Karamihan sa mga umuwing Pinoy ay mula sa Japan, Norway, Oman, Saudi Arabia, UAE, USA at Vietnam.

Maliban sa mga OFW’s, nakapagpauwi na rin ng mga stranded na Pinoy mula sa iba’t-ibang bansa.

June 12 nang dumating sa bansa ang 30 Pinoy na na-stranded sa India at Sri Lanka sakay ng BRP Davao Del Sur.

Hindi magic pill laban sa coronavirus disease 2019 (COVID-19) ang paggamit ng low dose ng steroid treatment na Dexamethasone sa mga dinapuan ng nasabing virus.

Ayon ito kay Health Undersecretary Maria Rosario Vergeire matapos tila ipagmalaki ng British experts ang major breakthrough kaugnay sa anila’y posibleng kauna-unahang gamot laban sa COVID-19.

Sinabi ni Vergeire na hindi pa peer reviewed ng mga ka-level nilang experts ang naturang gamot para  masabing katanggap-tanggap ang pag-aaral ng British experts kaya’t hindi ito uubrang maging magic pill.

Binigyang diin pa ni Vergeire na na ang low dose steroid ay epektibo lamang sa severe at critical cases.

Nangangahulugan ito aniyang gumagana ang nasabing gamot sa mga kailangan ng oxygen at sa mga naka-ventilator at hindi ito iinumin lamang ay makakaiwas o mawawala na ang COVID-19.

Inihayag pa ni Vergeire na supporting treatment lamang ang low dose dexamethasone dahil wala pang gamot sa COVID-19 subalit kapag nakumpleto na ang proseso ay maituturing na itong breakthrough sa science.

Hindi nailipat sa gobyerno ang pagmamay-ari sa ABS-CBN.

Ibinunyag ito ni dating Senate President Juan Ponce Enrile sa kaniyang pagharap sa virtual joint hearing ng house committee on legislative franchises at committee on good government and public accountability hinggil sa prangkisa ng Kapamilya network.

Sinabi ni Enrile na kahit nagpalabas siya noon ng sequestration order para sa lahat ng television at radio stations sa bansa noong martial law, hindi naman nawala sa Pamilya Lopez ang pag-aari sa nasabing media giant bagamat nasa kontrol ng gobyerno ang mga pasilidad ng buong ABS-CBN Complex.

Kinontra naman ito ni Atty. Augusto Almeda-Lopez na nagsabing inagaw ng dating pangulong Ferdinand Marcos ang titulo ng ABS-CBN at hindi na ito naibalik sa kanila noong 1986 kaya’t kinailangan nilang kumilos para mabawi ang assets at equipment ng media giant.