Operational na muli ang consular office ng Department of Foreign Affairs (DFA) sa Metro Alabang Town Center.
Kasunod na rin ito nang isinagawang disinfection sa pasilidad.
Mananatili namang sarado ang DFA consular office sa Aseana, Paranaque para sa kaukulang disinfection.
Ipinabatid naman ng DFA na bukas sa publiko ang iba pang consular offices nito.
Suportado ng Archdiocese ng Maynila at Makati Business Club (MBC) ang franchise renewal ng ABS-CBN.
Kasabay ito nang apela ng Archdiocese ng Maynila at MBC sa kongreso na huwag haluan ng pulitika ang usapin sa pag-apruba ng prangkisa ng media giant.
Tinukoy ni Apostolic Administrator Bishop Broderick Pabillo ang kahalagahan ng ABS-CBN na katuwang aniya sa paghahatid ng mga impormasyon sa publiko lalo na ngayong nahaharap sa global health crisis ang bansa.
Binigyang diin naman ng MBC na makatutulong sa pag-ahon ng ekonomiya ang muling pag-ere ng media giant dahil madadagdagan ang nakokolektang buwis ng gobyerno at mapapangalagaan nito ang mga trabaho pati na ng mga negosyong nag-aadvertise sa mga programa ng Kapamilya network.
Tila pinagdiskitahan ng mga driver ng mga lumang pampasaherong jeep ang mga modernong public utility vehicles (PUVs) na binigyan na ng go-signal ng gobyerno na bumiyahe ngayong panahon ng pandemya.
Kasunod na rin ito ng report ng isang kooperatiba hinggil sa ginawang pambabasag ng rear-view ng ilang modernong PUVs na kanilang pag-aari.
Ayon kay Transportation Assistant Secretary Goddess Hope Libiran, iniimbestigahan na nila ang nasabing insidete, gayundin ang inireport din sa kanilang panghaharang sa mga rider at pambabato sa mga modern jeeps.
Tiniyak ni Libiran na pananagutin nila ang mga nasa likod ng tila panggugulo sa operasyon ng modern jeepneys.
Handa na para sa operasyon ang 12 mula sa 16 na bus stops na itinayo sa kahabaan ng EDSA.
Ayon kay Metropolitan Manila Development Authority (MMDA) Spokesperson Celine Pialago, halos 80% nang kumpleto ang mga bagong bus stops, samantalang apat pa sa mga ito na itinayo sa Buendia, Taft, Kamuning at Pasay ay wala pang clearance mula sa Department of Public Works and Highways (DPWH).
Sinabi ni Pialago na ang mga naturang bagong bus stops ay mayroong waiting shed, marking at bakod.
Inaasahan aniyang sa mga susunod na araw ay maitatayo na rin ang concrete barriers at steel separators, gayundin ang mg elevator na maaaring magamit ng senior citizens.
Samantala, ipinabatid ni Pialago na 550 city buses lamang ang otorisadong mag-operate sa rutang Monumento patungong Parañaque Integrated Terminal Exchange, taliwas sa bumabyahe noong Enero at Pebrero na 2,500.
Ipagbabawal na ng Department of Finance (DOF) ang bentahan ng alak at sigarilyo online.
Sinabi ni Finance Secretary Sonny Dominguez na nangangamba silang hindi matutukan ang mga bumibili ng alak at sigarilyo.
Ang nasabing hakbang aniya ay para maprotektahan na rin partikular ang mga kabataan na posibleng kabilang sa mga tumatangkilik sa nasabing produkto.
Tiniyak ni Dominguez ang mahigpit na pagbabantay ng DOF sa Lazada at iba pang online shopping site.
Umapela si Defense Secretary Delfin Lorenzana sa publiko na bigyan ng pagkakataon ang kakalagda pa lamang na anti-terrorism act of 2020.
Sa gitna na rin ito ng mga kumakalat na misinformation at disinformation hinggil sa nasabing batas.
Ayon kay Lorenzana, dapat na basahin muna at intindihin ng bawat isa ang nasabing batas.
Kailangan aniya ang nasabing batas para mabigyan ng kinakailangang kapangyarihan ang mga ahensya ng gobyerno sa kampanya laban sa mga terorista sa bansa.
Iniatras na ng Department of Health (DOH) ang paggamit ng dalawang gamot sa mga coronavirus disease 2019 (COVID-19) patients sa ilalim ng solidarity trial ng World Health Organization (WHO).
Ito, ayon kay Health Undersecretary Maria Rosario Vergeire, ay base na rin sa mga nakitang ebidensya at rekomendasyon ng mga experts ng bansa laban sa paggamit ng hydroxychloroquine at kombinasyon ng HIV drugs na lopinavir-ritonavir sa mga pasyenteng dinapuan ng COVID-19.
Sinabi ni Vergeire na kaagad nilang ipinatigil ang paggamit ng hydroxychloroquine nang mailabas ng experts ang ebidensya laban dito.
Lumalabas aniya sa interim trial results na maliit lamang o halos walang epekto sa mortality ng mga naka-confine na COVID-19 patients ang hydrochloroquine at lopinavir-ritonavir combination, kumpara sa standard of care o mahigpit na pagtutok ng medical experts sa isang may sakit.
Dahil dito, ipinabatid ni Vergeire na gagamitin na lamang ngayon ang kumbinasyon ng remdesivir at interferon para sa medical treatment laban sa COVID-19, mula sa hiwalay na paggamit sa mga gamot nito noong mga nakalipas na araw.
WHO ipinatigil na ang paggamit ng ilang anti-HIV drugs, hydroxychloroquine vs. COVID-19
Ipinatigil ng World Health Organization (WHO) ang paggamit ng ilang anti-HIV drugs at hydroxychloroquine sa mga isinasagawang clinical trials sa pagtuklas ng gamot laban sa coronavirus disease 2019 (COVID-19).
Ito ay matapos na matuklasan ng WHO na hindi naman nito nagagawang mapaliit ang tyansa na masawi ang mga pasyente ng COVID-19 na sumasailalim sa mga clinical trials.
Samantala, sinabi naman ni WHO director-general Tedros Adhanim Ghebreyesus na nakatakda nang lumabas ang unang resulta ng kanilang isinasagawang clinical trials sa loob ng dalawang linggo.
Matatandaan namang nasa 5,500 ang mga COVID-19 patients mula sa 39 na bansa kabilang na ang Pilipinas na lumahok sa clinical trials sa paghahanap ng lunas sa naturang virus.
Nag-iipon na ng mga ebidensya ang Philippine Coast Guard (PCG) kaugnay sa isasampang kasong kriminal laban sa opisyal ng Hong Kong flagged cargo vessel na MV Vienna Wood.
Ayon kay Coastguard Commandant Vice Admiral George Ursabia, Jr. natapos na ang imbestigasyon nila sa mga tripulante ng MV Vienna Wood at sinimulan na aniya ng kanilang mga abogado ang pagkuha ng sinumpaang salaysay ng mga lokal na mangingisda na rumesponde sa insidente.
Una nang inihayag ng Coastguard na ang nawawalang 14 na Pinoy fishermen at pasahero ay maaaring kasama sa paglubog ng MV Liberty 5.
Tinatayang may 2,000 metro ang lalim nang pinaglubugan ng bangkang pangisda at ang technical divers ay maaaring lumubog sa ilalim ng 100 metro.
Umalma si Labor Secretary Silvestre Bello III sa pahayag ng mga abogado ng ABS-CBN sa Kamara hinggil sa pag-apruba anila ng DOLE sa seasonal work arrangement sa ilang empleyado ng kapamilya netowrk.
Tinawag ni Bello na intellectually dishonest ang mga nasabing abogado ng media giant dahil mahigit na 40 taon na ang nasabing polisiya na idineklarang invalid ng Korte Suprema noong 2004.
Una nang itinanggi ng DOLE ang mga pahayag na napatunayan nang compliant ang kapamilya network sa mga labor laws and standards.
Papayagan na ang limitadong religious activities sa mga lugar na nakasailalim sa general community quarantine (GCQ) simula July 10.
Sinabi ni Presidential Spokesman Harry Roque na aprubado na ng IATF ang pagdaraos ng religious activities sa GCQ areas subalit dapat ay 10% lamang ang kapasidad ng pasilidad ang papayagang dumalo.
Para naman sa mga lugar na nasa modified GCQ ang mga simbahan at iba pang religious venues ay uubrang tumanggap ng hanggang 50% ng kanilang total capacity.