Nag-anunsyo na ang ilang kumpanya ng langis kaugnay sa ipatutupad na rollback sa presyo ng mga produktong petrolyo.
Batay sa anunsyo ng Shell at Petro Gazz epektibo bukas ng alas sais ng umaga bababa ng 65 sentimo ang halaga ng kada litro ng gasolina at 40 sentimo naman ang bawat sa presyo ng kada litro ng kerosene.
Wala namang magiging paggalaw sa presyo ng diesel.
Ito ang unang rollback sa presyo ng oil products matapos ang siyam na magkakasunod na lingguhang oil price hike.
Nakakabahala ang pag-aaral ng mahigit 200 scientists mula sa iba’t-ibang panig ng mundo na nagsasabing airborne ang coronavirus disease 2019 (COVID-19).
Ito’y ayon kay Dr. Anthony Leachon, isang public health expert ay kaya’t hindi dapat balewalain ang bangis na dulot ng nasabing virus.
Sinabi ni Lechon na ang mga naturang scientist ay sumulat sa World Health Organization (WHO) para igiit ang pag-update nito ng mga guidelines sa COVID-19 pandemic dahil sa pagiging airborne ng nasabing sakit.
Nangangahulugan ito aniyang kahit sa indoor ay kailangang magsuot ng mask at doblehin pa ito kung nasa public mass transportation.
Nananawagan si Leachon sa local government units (LGU) para puspusan pang makapamahagi ng face mask at alcohol sa kani-kanilang mga residente.
Maliit na bahagi lamang ng lipunan o nasa minority ang mga umalma sa anti-terrorism act of 2020.
Binigyang diin ito ni Chief Presidential Legal Counsel Salvador Panelo na igiit na wala sa karakter ng Pangulong Rodrigo Duterte na magpasindak sa external forces.
Wala naman aniyang ibang layunin ang Pangulong Duterte kundi protektahan ang mga Pilipino sa nilagdaang anti-terror act.
Tiniyak ni Panelo ang sapat na safeguards sa bagong batas para masigurong hindi ito maaabuso.
Una nang dumulog sa Korte Suprema ang grupo ni Atty. Howard Calleja para kuwestyunin ang legalidad ng bagong batas partikular ang Section 29 kung saan nakasaad ang detention without judicial warrant of arrest kung saan maaaring arestuhin ng anti-terror council ang sinumang pinaghihinalaang terorista.
Pinaigting pa ng Department of Health (DOH) ang pagsusulong nito ng behavioral change o pagbabago sa ugali ng publiko gayundin ang koordinasyon nito sa local government units sa pagtugon sa coronavirus disease 2019 (COVID-19) pandemic.
Kasunod ito nang pag-amin ni Health Undersecretary Maria Rosario Vergeire sa tumataas na COVID-19 cases sa iba’t-ibang bahagi ng bansa.
Binigyang diin ni Vergeire na puspusan ang pakikipag-ugnayan nila sa LGU’s upang magkaroon ng selective lockdowns kung kinakailangan kapag patuloy pang umakyat ang kaso ng COVID-19.
Todo suporta rin aniya ang ibinibigay ng DOH para mapataas ang kapasidad ng mga pasilidad para maging handa ang mga ito sakaling tumaas pa ang COVID-19 cases.
Kasabay nito mahigpit pa rin ang paalala ni Vergeire sa publiko na huwag maging kampante sa kabila nang pagpapaluwag sa restrictions kaya’t dapat na sundin pa rin ang minimum health protocols tulad ng pagsusuot ng face mask, madalas na paghuhugas ng mga kamay at pag-obserba sa physical distancing.
Pumapalo na sa mahigit 11,500,000 ang naitatalang kumpirmadong kaso ng coronavirus disease 2019 (COVID-19) sa buong mundo.
Lumalabas sa pinakahuling datos na nasa mahigit 172,000 bagong kaso ng COVID-19 ang naitala sa nakalipas na magdamag dahilan kaya’t umakyat na sa 11, 547,000 ang global cases ng nasabing virus.
Ang Estados Unidos pa rin ang nakapagtala ng pinakamaraming kaso ng COVID-19 na nasa halos 3-M na matapos marehistro ang mahigit 42,000 bagong kaso ng virus sa bansa.
Kabilang pa sa mga nakapagtala ng mataas na kaso ng kumpirmadong COVID-19 cases ang Brazil – 1, 604, 585, India – 697, 836, Russia – 681, 251, Peru – 302, 718, Spain – 297, 625, Chile – 295, 532, United Kingdom – 285, 416 at Mexico – 252, 165.
Inihatid na sa huling hantungan ang babaeng driver na nagpaparenta ng kaniyang sasakyan sa Calamba, Laguna.
Halos bumuhos ang luha ng pamilya, mga kaanak, kaibigan at kailala ni Jang Lucero sa paghahatid dito sa huling hantungan
Hustisya pa rin ang sigaw ng mga nagmamahal kay Lucero sa gitna nang patuloy na pagkalap ng mga ebidensya hinggil sa pagpatay dito.
Magugunitang natagpuan ang labi ni Lucero na may 52 saksak sa buong katawan sa loob ng kaniyang sasakyan noong June 28 sa Bypass Road sa Calamba.
Naglabas na ng schedule ang NBA ng kanilang mga laro sa muling operasyon nito sa Disney Resort sa Florida.
Ayon sa NBA, magsasagawa muna ng 33 tune up games bago ang pormal na pagsisimula ng mga laro sa July 30.
Unang magsasagawa ng tune up games ang Orlando Magic at Los Angeles Clippers bago ang bakbakan ng Washington Wizards at Denver Nuggets at paghaharap ng New Orleans Pelicans at Brooklyn Nets gayundin ang pagtutuos ng Sacramento Kings at Miami Heat.
Magiging pambungad naman sa pormal na pagsisimula ng mga laro sa July 30 ang sagupaang Jazz at Pelicans.
Pumapalo na sa mahigit 6,000 ang kabuuang kumpirmadong kaso ng coronavirus disease 2019 (COVID-19) sa Cebu City.
Ito ay matapos maitala ang dagdag na 150 kaso ng COVID-19 sa lungsod kahapon.
Sa kabuuang kaso ng confirmed COVID-19 cases sa Cebu City nasa mahigit 3,000 na ang gumaling matapos maitala ang 90 bagong recoveries habang nasa halos 3,000 pa ang aktibong kaso.
Isa naman ang naitalang panibagong nasawi kaya’t umakyat na sa 221 ang bilang ng mga nasawi sa Cebu City dahil sa COVID-19.
Nagpositibo sa coronavirus disease 2019 (COVID-19) ang tatlong staff ng City Health Office ng Antipolo City.
Dahil dito ipinasara muna ng Antipolo City Government ang outpatient department ng city health office para makapagsagawa ng decontamination at disinfection.
Ayon kay Antipolo City Mayor Andeng Ynares, ang isang doktor at dalawang nurse na nagpositibo ay naka-quarantine na at natukoy na rin ang mga naging close contacts ng mga ito.
Tiniyak ni Ynares ang pagbabalik kaagad ng serbisyo ng CHO-OPD habang mananatili namang bukas sa publiko ang ibang tanggapan ng city hall.
Nagkasa na ng mas mahigpit na safety and health protocols ang pamunuan ng MRT 3 matapos magpositibo sa coronavirus disease 2019 (COVID-19) ang mahigit 100 tauhan nito.
Obligado nang magsuot ng personal protective equipment (PPE) ang lahat ng mga tauhan ng MRT sa mga sitasyon, tren, depot at maging sa bus augmentation service.
Inatasan din ang mga empleyado na magsumite ng health declaration o estado ng kanilang kalusugan dalawang beses kada araw.
Tuloy-tuloy naman ang isinasagawang disinfection sa lahat ng depot at istasyon at tren ng MRT 3.
Samantala alas sais ng umaga ay 11 tren ng MRT ang tumatakbo na mayroong 10 minutong interval sa pagdating ng kada tren
Alas singko pa lamang ng madaling araw ay dagsa na ang mga commuters sa North Avenue Station na kailangang kontrolin pa kaya’t humahaba pa lalo ang pila.
Dinagdagan naman ang bus augmentation units na nasa 15 nang palargahin ng Lunes ng umaga.
Una nang nagtigil operasyon ang MRT 3 nitong weekenda para sa pag-aayos ng riles nito na gagawin din sa mga susunod pang weekend hanggang Setyembre.