Judith Estrada-Larino

Tatlong opisyal sa lungsod ng Maynila ang nagpositibo sa coronavirus disease 2019 (COVID-19).

Hindi naman tinukoy ni Manila Mayor Isko Moreno kung sino-sino ang mga naturang opisyal na kinabibilangan ng dalawang department heads at isang konsehal.

Dahil dito patuloy ang paalala ni Moreno sa mga taga Maynila na mag-ingat at palagiang sumunod sa health protocols tulad nang pagsusuot ng face mask, paghuhugas ng kamay at pag-obserba sa physical distancing.

Sinegundahan ng Department of Trade and Industry (DTI) ang pagbabawal ng Department of Finance (DOF) ng bentahan ng alak at sigarilyo online.

Ayon kay Trade Secretary Ramon Lopez suportado niya ang hakbangin dahil delikadong mga menor de edad ang makabili ng alak at sigarilyo lalo na kung walang profile ng kanilang buyers ang mga nagbebenta ng mga ito online.

Sinabi ni Lopez na nakikipag-ugnayan na sila sa DOF para makabuo ng sistema sa online selling platform upang matiyak na maire rehistro ito sa DTI at BIR.

Magpapaliwanag ang Meralco sa customers nila kaugnay sa kanilang bayarin sa kuryente.

Ito ayon kay Meralco Spokesperson Joe Zaldarriaga ay sa pamamagitan ng ipapadala nilang sulat sa lahat ng consumers.

Sinabi ni Zaldarriaga na idedetalye sa sulat ang estimated at actual costs gayundin ang proseso kung paano nakuha ang halaga ng babayaran.

Nauunawaan naman aniya nila ang taumbayan na nabigla sa naipong bayarin sa kuryente.

Muling ipinabatid ni Zaldarriaga na hindi kailangang bayaran ng bigla ng customers ang kanilang bill na uubrang installment sa loob ng susunod na anim na buwan.

Walang sakit ang Pangulong Rodrigo Duterte.

Ayon ito kay Presidential Spokesman Harry Roque subalit malungkot aniya ang Pangulong Duterte sa nangyaring pagpatay sa apat na sundalo sa Jolo, Sulu.

Sinabi ni Roque na ang pangulo ay tumatayo nang parang tatay ng mga sundalo kayat nalulungkot ito sa nangyari na parang namatayan siya ng mga anak.

Inamin ni Roque na naging emosyonal ang pangulo kayat garalgal ang boses nito habang nagsasalita sa Zamboanga City nuong biyernes at walang kinalaman sa kalusugan ang pagiging matamlay nito.