Judith Estrada-Larino

Umaapela ang mga commuters na paagahin o magsimula ng 4:00 ng madaling araw ang mga bus na bumabyahe sa EDSA para hindi sila ma-late sa kanilang mga trabaho.

Kaugnay ito ng ikalawang araw ng suspensyon ng operasyon ng MRT 3 kung saan ang mga pasahero ay sumasakay sa bus augmentation buses gayundin sa EDSA busway units.

Maraming pasahero ang humihiling ng mas maagang pagbiyahe ng mga bus sa halip na dating ala singko y medya ng madaling araw para makaabot ang ilan sa mga ito sa alas 6:00 ng umagang pasok nila.

Alas 6:00 ng umaga ay mahaba na ang pila ng mga pasaherong pasakay ng bus augmentation units.

Magugunitang suspendido ang MRT operations mula July 7 hanggang 11 para sa kaukulang disinfection dahil sa tumataas na bilang ng mga tauhan nitong nagpo positibo sa coronavirus disease 2019 (COVID-19).

Isinulong ni ACT-CIS Party List Representative Niña Taduran ang pagpaparusa at tuluyang pagpapasa sa mga establishment na lumalabag sa mga panuntunan hinggil sa community quarantine.

Kasunod na rin ito ng nakuhang report ni Taduran hinggil sa ilang pasugalang operational na at nagbukas pa ng private rooms (VIP) para sa kanilang mga parokyano.

Ito ay matapos mag reklamo sa assistant house majority leader ang pamilya  ng 80 taong gulang na lola na tumatakas ng kanilang bahay at nagsusugal kasama ang mga amigang senior citizens.

Sinabi ni Taduran na nauunawaan niyang nais lamang maglibang ng mga tao dahil stress na sa coronavirus disease 2019 (COVID-19) pandemic subalit mas mabuting maglibang sa loob ng bahay kasama ang pamilya.

Hindi na aniya dapat pinapalabas pa ng bahay ang mga matatanda lalo na kung pupunta sa mga public establishments na hindi naman kailangan.

Bukod sa mga casino at iba pang pasugalan bawal pa ring mag operate sa ilalim ng general community quarantine ang childrens amusement industries, cultural centers tulad ng museums, gardens at libraries, tourist destinations tulad ng beaches, water parks at resorts, travel agenies, personal care services tulad ng spa, sauna at waxing salon, gyms at fitness studios, cinemas, theatres at karaoke bars at mga pubs, nightclubs at beerhouse.

Maagang nag-adjust ang mga regular commuter ng MRT 3 matapos ang tigil operasyon nito kasunod ng pagiging positibo sa coronavirus disease 2019 (COVID-19) ng halos 100 empleyado nito.

Bago pa man sumikat ang araw maraming commuter ang nagkalat na sa mga pangunahing lugar sa kahabaan ng EDSA para makasakay sa mga bus augmentation units o mga bus na bahagi ng EDSA busway system.

Sa bahagi ng EDSA sa Bagong Barrio, Caloocan City alas kuwatro pa lamang ng madaling araw ay nag-aabang na ang maraming pasahero ng masasakyang bus na bahagi ng EDSA busway na hanggang Paranaque Integrated Terminal Exchange (PITX) na ang biyahe.

Mahaba na rin ang pila sa labas ng North Avenue at Quezon Avenue stations madaling araw pa lamang.

Samantala bukod sa nakagawiang paghinto sa Quezon, Ayala at Taft Avenues titigil na rin ang mga nasabing bus sa Guadalupe at Ortigas stations para magbaba lamang ng pasahero.

Nagsisilbi namang guide sa mga pasahero ang mga tauhan ng MRT 3 na nakasuot ng personal protective equipment (PPE) at nagche-check ng temperatura ng mga commuter.

Samantala pahirapan namang makasakay ang mga commuter sa EDSA Cubao dahil hindi anila alam na walang byahe ang MRT at tanging ang maaari nilang sakyan ay mga taxi at TNVS.

Nag-unahan naman ang mga pasahero sa pagsakay sa police truck na napadaan sa lugar.

Tinambangan ang isang prosecutor ng Maynila.

Ayon sa Ermita Police Station 5 ang biktimang si Jovencio Senados, 62 taong gulang at chief inquest prosecutor sa Manila RTC ay tinambangan sa Quirino Highway kanto ng Anakbayan sa Paco.

Iniimbestigahan na ng mga otoridad ang motibo sa pagpaslang kay Senados kasabay ang pagtugis sa mga kriminal na mabilis na tumakas sakay ng isang itim na SUV na may plakang 8133A.

Muling nakapagtala ng panibagong 141 na kumpirmadong kaso ng coronavirus disease 2019 (COVID-19) sa lungsod ng Taguig.

Sa pinakahuling tala, kabuuang 1,227 na ang bilang ng mga dinapuan ng virus dito.

Lumalabas din na naitala ang mga bagong kaso ng virus ay sa mga sumusunod na mga barangay: Barangay Bagumbayan, Central Signal, Fort Bonifacio, Katuparan, Lower Bicutan, Napindan, New Lower Bicutan, Palingon, Pinagsama, South Daang Hari, South Signal, Sta Ana, Ususan, at Western Bicutan.

Mayorya naman ng kaso ang nanggaling sa barangay Fort Bonifacio na nakapagtala ng 100 bagong kaso, kaya’t lumobo na ang bilang ng mga COVID-19 cases sa naturang barangay sa bilang na 274.

Sa kaparehong bulletin, naitala rin ang kabuuang 167 na mga COVID-19 patient ang tuluyan nang nakarekober sa virus, habang nasa 23 naman ang nasawi dahil dito.