Judith Estrada-Larino

Nagkasa ng bawas singil ang Meralco sa buwang ito.

Ayon sa Meralco nasa P.0286 kada kilowatt hour ang bawas sa singil sa kuryente na katumbas ng P6.00 hanggang P14.00 na tapyas sa bill sa kuryente depende sa konsumo.

Nasa P5.72 ang mababawas sa bill ng mga kumukunsumo ng 200 kilowatt hour kada buwan, P8.58 naman sa 300 kilowatt hour, P11.58 sa 400 kilowatt hour at P14.30 sa 500 kilowatt hour.

Welcome sa mga alkalde sa Metro Manila ang panawagan ng malakaniyang na magkaruon ng iisang ordinansa kaugnay sa pagsusuot ng facemask sa mga pampublikong lugar.

Ang naturang hakbang ay una nang isinulong ng ilang miyembro ng gabinete para magkaruon anila ng iisang multa na lamang na ipapataw sa mga lalabag sa nasabing ordinansa.

Sa kasalukuyan ay kanya kanyang implementasyo n ng pagsusuot ng face mask ang mga local government sa NCR at mayruong kaukulang parusa at multa.

Dumistansya ang Malacañang sa report na isa umano si presidential son at Congressman Paolo “Pulong” Duterte sa mga kumikilos sa kamara para hindi makakuha ng boto sa mga kongresista ang panukalang pagbibigay muli ng prangkisa sa ABS-CBN.

Sinabi ni Presidential Spokesman Harry Roque na bagamat miyembro ng kamara ang batang Duterte, isa lamang ito sa mga boboto sa usapin ng Kapamilya franchise.

Mayroon aniyang mahigit 300 mambabatas ang kamara kaya’t hintayin na lamang kung ano ang resulta ng botohan.

Lumutang sa report na nagsanib-puwersa umano si Pulong at Iglesia ni Cristo para i-pressure umano ang mga mambabatas na tuluyang ipasara ang media giant at kung susuway ay tatapatan ng zero project.

Pumapalo na sa mahigit 80 laboratoryo ang binigyan ng lisensya para magsagawa ng independent testing para sa coronavirus disease 2019 (COVID-19).

Ipinabatid ni Health Undersecretary Maria Rosario Vergeire na nabigyan na nila ng accreditation ang 62 polymerase chain reaction facilities at 21 GeneXpert laboratories.

Kabilang aniya sa pinakabagong accredited laboratories ang Qualimed Health Delivery System sa San Jose Del Monte, Bulacan; Parkway Diagnostics at Philippine Airport Diagnostics.

Hanggang nitong nakalipas na ika-9 ng Hulyo, sinabi ni Vergeire na mahigit 800,000 na ang na-test ng operational laboratories kung saan halos 62,000 ang nagpositibo at nasa 7.5% ang positivity rate.

Ika-7 ng Hulyo aniya naitala ang pinakamataas na bilang nang naisagawang test sa isang araw na nasa mahigit 23,000.