Judith Estrada-Larino

Giniba ng 70 kongresista ang  pagiging king maker at kingslayer ng ABS-CBN.

Ito, ayon kay House Speaker Alan Peter Cayetano, ang mga pangunahing dahilan kaya’t pinatay ang prangkisa ng ABS-CBN.

Sinabi ni Cayetano na kabilang sa mga isyu ng mga kongresistang bumoto kontra sa prangkisa ng media giant ay paglusot nito sa election at tax laws, paggamit sa network para protektahan ang kanilang negosyo at dahil sa laki ng impluwensya nito sa pulitika sa bansa.

Kasaysayan na lamang aniya ang huhusga sa naging takbo ng operasyon ng Kapamilya network sa mga nakalipas na panahon.

Hindi tinatalakay sa pulong ng Inter-Agency Task Force (IATF) ang usapin ng Charter Change ((Cha-Cha).

Ito, ayon kay Cabinet Secretary at IATF co-chair Karlo Nograles, ay dahil nasa kamay ng kongreso ang naturang isyu.

Wala naman aniyang binabanggit ang Pangulong Rodrigo Duterte hinggil sa usapin nang pagbabago sa sistema ng gobyerno sa kanilang mga pulong sa IATF.

Pumapalo na sa 16 na petisyon ang isinampa sa Korte Suprema kontra anti-terror law.

Ayon sa Supreme Court Public Information Office, ang mga petisyong kumukuwestyon sa anti-terror law ay mula sa mga dating hukom ng Korte Suprema, mga mambabatas, constitutionalists, mga abogado, human rights advocates, law professors, labor groups, youth organizations, journalists at artists.

Kabilang sa mga pinakahuling petisyong inihain ay mula sa grupo nina Atty. Chel Diokno, Erin Tañda at Congressman Kit Belmonte.

Inaasahan ng high tribunal ang pagdagsa pa ng kaparehong petisyon sa mga susunod na araw at napipintong maging isa sa most challenged laws sa Korte Suprema ang anti-terror act of 2020.

Ang cybercrime prevention act of 2012 ay humarap sa 15 petisyon at 14 na petisyon naman ang inihain laban sa reproductive health law noong 2014.

Nasa 2,000 hotel rooms sa Metro Manila ang binook ng gobyerno para magamit na isolation areas ng coronavirus disease 2019 (COVID-19) patients.

Ito, ayon kay National Task Force Against COVID-19 Deputy Chief Implementer Vince Dizon, ay dahil malapit nang mapuno ang mga We Heal as One Center na nasa 3,000 lamang ang kapasidad.

Sinabi ni Dizon na nakipag-ugnayan sila sa Department of Tourism para makapagbook ng hotel rooms na magagamit ng COVID-19 patiens hanggang sa gumaling sila.

Ang mga naturang hotel rooms ay inihahanda sa gitna nang pagsasagawa ng Oplan Kalinga ng gobyerno kung saan nagbabahay-bahay ang local health officials para mahanap ang mild at asymptomatic cases na dadalhin sa isolation facilities.

Irerekomenda ni Presidential Spokesman Harry Roque ang paggamit muli ng quarantine pass sa Metro Manila.

Ito, ayon kay Roque, ay para malimitahan ang galaw ng mga tao sa kalsada at mapuwersa ang mga itong manatili sa kanilang mga bahay.

Sinabi ni Roque na batay sa obserbasyon ng isang kakilala niyang nagtungo ng probinsya, kahit pa nasa modified general community quarantine (MGCQ) na ay hinahanapan pa rin rin ng quarantine pass ang mga tao para mahimok ang mga itong huwag nang lumabas.

Ang paggamit aniya muli ng quarantine pass ay mas magandang hakbangin kaysa i-lockdown na naman ang ekonomiya.

Magugunitang inihayag ni Roque na posibleng balik modified enhanced community quarantine (MECQ) ang Metro Manila kapag pumalo na sa 85,000 ang kaso ng coronavirus disease 2019 (COVID-19) hanggang sa katapusan ng buwang ito.