Judith Estrada-Larino

Nanawagan ng public consultation ang Catholic Bishops Conference of the Philippines (CPCP) kaugnay sa posibleng pagbuhay sa death penalty.

Sinabi ni CBCP Spokesperson Father Jerome Secillano na naninindigan sila sa pagtutol sa death penalty kayat nais nilang umapela sa Pangulong Rodrigo Duterte na irekunsider ang desisyon sa isyu.

Ayon kay Secillano mas mabuting makunsulta rin ang publiko sa naturang usapin at hindi pu-puwedeng magpadalus dalos dahil lamang sa gusto ito ng Pangulong Duterte subalit wala sa saloobin ng mga tao.

Kasabay nito nanawagan si Secillano ng mga reporma sa justice system para magtagumpay sa kampanya kontra kriminalidad.

Hindi na tatanggap simula bukas July 29 ng walk in asymptomatic patients na nais magpa swab test ang St. Luke’s Medical Center.

Ito ayon sa pamunuan ng St. Luke’s ay para matiyak ang maayos na daloy ng mga pasyente sa ospital at para na rin sa kaligtasan ng kanilang healthcare workers.

Para magpa book ng slot sa swab test maaaring makipag-ugnayan sa public information center ng ospital sa 09985822276 sa St. Luke’s Global City at 09479943550 para St. Luke’s Quezon City.

Sumirit na sa mahigit 82,000 ang kumpirmadong kaso ng coronavirus disease 2019 (COVID-19) sa bansa.

Ayon sa Department of Health (DOH) pumapalo sa 1,657  ang nadagdag na kaso ng COVID-19 kaya’t umakyat na sa 82,040  ang kabuuang bilang ng tinamaan ng nasabing virus sa bansa.

Ito na ang ika 13 sunod na araw na nakapagtala ng mahigit 1,300 bagong impeksyon.

Kabilang sa mga lugar na nakapagtala ng pinakamataas na bagong kaso ng COVID-19 ang Metro Manila – 1, 017 ,Laguna – 89, Cavite – 38, Cebu – 31 at Rizal – 31.

Umakyat na rin sa 26,446 ang total recoveries matapos madagdag ang 359 na mga bagong gumaling sa nasabing sakit na pumatay na sa halos 2,000 katao nang madagdag ang 16 na bagong nasawi.

Nasa 53,649 ang naitalang aktibong kaso ng COVID-19 at patuloy na sumasailalim sa gamutan o quarantine.

Ikinagulat at ikinaalarma ng Department of Health (DOH) ang pagpatay sa hepe ng National Center for Mental Health (NCMH) at driver nito.

Ayon sa DOH ipinaabot nito ang pagkiki-dalamhati sa pamilya ni NCMH Chief Dr Roland Cortez at driver na si Ernesto Dela Cruz na pinatay sa Barangay Culiat sa Quezon City kahapon ng umaga.

Tiniyak ng DOH ang hustisya sa pagkamatay ni Cortez atr driver nito sa gitna na rin nang pakikipag ugnayan nila sa mga otoridad para mahuli ang mga suspek at mapanagot sa batas ang mga ito.

Sinabi ng DOH na si Cortez ay respetadong lider na tumutulong ng tapat sa mga kliyente nito  at hindi makatuwirang patayin ang kagaya nito gayundin ang iba pang healthcare workers lalo na sa panahon ng coronavirus disease 2019 (COVID-19) pandemic.

Si Cortez at driver nito ay nagtamo ng iba’t ibang tama ng bala ng baril sa katawan at nakitang wala nang buhay ang mga ito sa loob ng pulang Toyota Vios.

Pangunahing suspek sa krimen ang riding in tandem.

Nadagdagan pa ng apat ang laboratoryong accredited ng Department of Health (DOH)  para sa coronavirus disease (COVID-19) testing.

Kabilang dito ang RT-PCR laboratories ng Delos Santos Medical Center, Daniel O. Mercado Medical Center at San Pablo College Medical Center samantalang gumagamit naman ng GenExpert machines ang isang laboratoryo mula sa Amang Rodriguez Memorial Center.

Dahil dito ipinabatid ng DOH na nasa 93 na ang kabuuang certified laboratory sa bansa para sa COVID-19 test kung saan 70 rito ay humahawak ng reversed transcription polymerase chain reaction at 23  ang may GenExpert testing.

Sinabi ng DOH na umabot na sa mahigit 1-milyong test ang nagawa ng mga nasabing laboratoryo.

Hanggang nitong July 25 nasa mahigit 110,000 tests na ginawa ang nag resulta ng positibo.