Judith Estrada-Larino

Naabot na ng Department of Education (DepEd) ang target na bilang ng enrolees halos isang buwan bago ang pagbubukas ng klase sa August 24.

Ayon sa DepEd pumalo na sa mahigit 22.3-million ang mga estudyanteng nagpapatala sa mga pampubliko at pribadong paaralan at ito ay 80 porsyento ng enrollment turn out ng halos 28-million students nuong 2019.

Sinabi ng dep ed na kung hihimayin nasa 20.8-million ang mga estudyanteng nag enrol sa public schools at nasa 1.3-million naman ang nakapag parehistro sa private schools.

Una nang inihayag ng DepEd na uubra pang tumanggap ng late enrolees hanggang Setyembre basta’t pasok pa sa 80% prescribed number ng school days.

Tinawag na malaking turn off ng isang think tank group ang pagturing ng Pangulong Rodrigo Duterte sa ilang malalaking negosyo bilang oligarchs.

Ayon kay Sonny Africa, executive director ng IBON Foundation maaaring mag- alangan ang local o foreign investors na mag invest sa bansa dahil sa tila arbitrariness o hindi makatuwirang  pagturing ng pangulo sa mga negosyante.

Bukod dito sinabi ni Africa na maaaring na turn off din ang mga negosyante sa kawalan ng kumprehensibong recovery plan ng gobyerno para tugunan ang coronavirus disease 2019 (COVID-19)  pandemic lalo pa’t maliit, kakaunti at huling huli na ang pag responde ng gobyerno sa pagsalba sa ekonomiya sa pagkakataong ito.

Masyado aniyang maliit ang inilaang pondo ng gobyerno sa laban ng Pilipinas sa COVID-19 kumpara sa mga kapitbahay na bansa sa Southeast Asia.

Pina-plano na ng LTFRB na magbukas na rin ng mas maraming ruta para sa mga bus at UV express sa mga susunod na araw hindi lamang sa Metro Manila kundi maging sa iba pang bahagi ng bansa.

Ito ayon kay LTFRB chairman Martin Delgra III ay dahil sa demand o pangangailangan ng mas maraming sasakyan sa kalsada para sa mga commuters lalo’t panahon na ng tag-ulan.

Nagbabala naman ang LTFRB sa operators ng mga pampublikong sasakyan na maglalabas sila ng show cause order sa mga susuway sa health protocols na itinkda ng IATF.

Lumampas na 83,000 ang kumpirmadong kaso ng coronavirus disease (COVID-19) sa bansa.

Ayon sa Department of Health (DOH) sumipa na sa 83,673 ang kumpirmadong kaso ng COVID-19 matapos madagdag ang 1,678 bagong kaso ng nasabing virus.

Ito na ang sunud sunod na ika-14 na araw na nakapagtala ng mahigit 1,300 bagong kaso sa loob lamang ng isang araw.

Kabilang sa mga lugar na nakapagtala ng pinakamataas na confirmed COVID-19 cases ang Metro Manila – 698, Laguna – 218, Cebu – 100, Cavite – 87 at Davao Del Sur – 33.

Pumapalo naman sa 26,617 ang total recoveries matapos maitala ang 173  mga bagong gumaling sa naturang sakit.

Nasa  1,947  death toll sa COVID-19 matapos madagdag ang 4 na nasawi rito.

Umakyat naman sa 55,109 ang active cases na sumasailalim sa gamutan o naka-quarantine.

Ang Pilipinas ay nananatili bilang ikalawang bansa sa Southeast Asia na nakapagtala ng pinakamataas na kumpirmadong kaso ng COVID-19 kung saan nangunguna ang Indonesia na mayruong mahigit 100,000  kaso na at ikatlo naman ang Singapore na nasa halos 51,000 ang active cases.

Isinusulong ng Integrated Bar of the Philippine (IBP) ang pagpapaunlad sa pagbibigay ng hustisya sa bansa  sa halip na buhayin ang parusang kamatayan.

Sinabi ni IBP President Domingo Egon Cayosa na mahalagang mapaganda ang pagbibigay ng hustisya, maalis ang korupsyon sa justice system at impluwensya gayundin ay tugunan ang kakulangan sa mga tauhan.

Inihayag ni Cayosa na kaya naman kapag naakusahan ng krimen ang isang tao at naaresto ito  sasalang sa due process, kaagad mahatulan at kapag nailipat sa mga kulungan sa bansa ay maparusahan sila at hindi na maitutuloy ang drug business sa loob ng bilangguan.

Binigyang diin ni Cayosa na ang parusa ay mas magandang panlaban sa krimen sa death penalty na hindi aniya pinaka magandang solusyon sa problema ng bansa sa iligal na droga.