Judith Estrada-Larino

Naghahanda na ang Food and Drugs Administration (FDA) sakaling magkaruon na ng bakuna kontra coronavirus disease 2019 (COVID-19).

Ipinabatid ni FDA Director General Eric Domingo na naglaan na sila ng fast lane para sa mas mabilis na pag proseso sa pagpapa-rehistro ng bakuna laban sa COVID-19.

Muling nilinaw ni Domingo na nasa mahigit 200 candidate vaccines ang pinag-aaralan ng experts mula sa ibat ibang bansa.

Isandaan at apatnapu (140 )rito aniya ay nasa early clinical trial o sinusubukan sa hayop habang 25 naman ang sinusubukan sa tao at lima ang nasa phase 3 na ng clinical trial.

Kayat umapela si Domingo sa publiko na i-report sa fda sakaling may makitang nagbebenta ng bakuna kontra COVID-19 dahil tiyak na peke ito.

Iginiit ng Department of Health (DOH)  ang pagtatatag ng Philippine Center for Disease Control and Prevention.

Ito ayon sa DOH ay para maging handa ang bansa sa mga posible pang sumunod na outbreak ng sakit.

Binigyang diin ng DOH na malaki ang maitutulong ng pagkakaruon ng bansa ng CDC para matiyak na ang health system ng Pilipinas ay handa sa pag forecast, pagpigil, pag monitor at pag kontrol ng emerging at re-emerging communicable diseases.

Isa rin anitong magandang oportunidad para mapalakas ang epidemiologic reporting systems, mapataas ang manpower at technical capacity at laboratory capacity ng bansa mula sa national pababa sa local level.

Una nang binanggit ng Pangulong Rodrigo Duterte sa kaniyang sona ang pagtatatag ng National Disease Prevention and Management Agency para mapigilan ang posibleng outbreak ng mga sakit.

Tinatayang P4.5-milyong halaga ng shabu ang nasabat ng mga tauhan ng Bureau of Customs (BOC) sa Ninoy Aquino International Airport  (NAIA).

Ayon sa Customs nadiskubre ang 640 grams ng shabu sa ginawang physical examination ng Customs examiners sa mga hindi pa nakukuhang DHL cargoes sa NAIA customs bonded warehouses.

Lumalabas sa record ng Customs na nagmula sa Las Vegas, Nevada, USA ang nasabing shipment ng illegal drugs at naka consign sa isang residente ng Hagonoy, Bulacan.

Isinama ang mga nasabing drugs sa box na naglalaman ng mga tsokolate, stuffed toy, candy, tsinelas, medyas at chocolate wafer kung saan itinago ang shabu.

Irerekomenda ng Inter-Agency Task Force on Emerging Infectious Diseases (IATF) sa Office of the President ang pananatili sa general community quarantine (GCQ) ng Metro Manila.

Sinabi ni MMDA Chairman Danilo Lim na suportado ng Metro Manila mayors ang pananatili ng kalakhang Maynila sa GCQ pagkatapos ng July 31.

Kasunod ito nang pagtanggi ni Lim sa report na ilang alkalde sa Metro Manila ang nagsulong na mailagay sa mas mahigpit na MECQ ang National Capital Region.

Bubuksan na sa susunod na dalawa hanggang tatlong linggo ang 22 mega quarantine facilities para sa mga mild at asymptomatic coronavirus disease 2019 (COVID-19) patients sa Metro Manila.

Tiniyak ito ni Testing Czar Vince Dizon matapos ianunsyo ni Health Undersecretary Maria Rosario Vergeire na 70 porsyento nang okupado ang quarantine facilities sa Metro Manila gayundin sa Regions 1, 7, 10 at 12.

Sinabi ni Dizon na ang mga nasabing mega quarantine facilities ay bukod pa sa halos 3,000 kama sa mga hotel na una nang binayaran ng gobyerno at inilaan para sa asymptomatic/mild COVID-19 patients sa kalakhang Maynila.

Ayon kay Dizon dumami ang asymptomatic positives at halos mapuno na rin ang mga quarantine at LGU facilities kaya kaagad silang kumuha ng isolation hotels.

Inihayag pa ni Dizon na inaasahang sa susunod na linggo ay magagamit na ang quarantine facility sa loob ng Fort Magsaysay sa Nueva Ecija.

Kasabay nito ipinabatid ni Dizon na matatapos sa susunod na dalawang linggo ang ipinapatayo ng grupo ni businessman Ricky Razon na 500 bed isolation facility sa lupain ng Entertainment City-Nayong Pilipino sa Paranaque City.

Itinuturing na pinakadelikadong bansa sa Asya ang Pilipinas para sa mga tagapagtanggol ng Inang Kalikasan.

Ayon ito sa watchdog na Global Witness na nagsabi pang ikalawa ang Pilipinas sa Colombia sa mga bansa sa mundo na most dangerous para sa land defenders.

Sa report ng Global Witness 43 ang nasawi sa Pilipinas partikular mula sa Mindanao at Negros kumpara sa 30 lamang nuong 2018.

Lumalabas din sa report na kalahati ng mga naitalang pagpatay na  nangyari simula nang manungkulan ang Pangulong Rodrigo Duterte nuong 2016 ay ini-uugnay sa armed forces o paramilitary groups.

Kabilang sa mga nasawi ay indigenous leaders, magsasaka at mga empleyado ng gobyerno na inatasang mangalaga sa kalikasan.

Ipinabatid pa ng Global Witness na mahigit kalahati ng bilang ng mga nasawi ay may kaugnayan sa agribusiness at 16 na insidente ng pagpatay ay iniuugnay sa mining na maituturing na pinakamataas na bilang sa buong mundo

Ikinakasa na ng gobyerno ang pooled testing bilang isa sa malaking pagbabagong ipatutupad kaugnay sa laban sa coronavirus disease 2019 (COVID-19) pandemic.

Ayon kay Presidential Spokesman Harry Roque natapos na ang ginawang pilot testing para sa pooled testing na isasapinal sa pulong ng IATF kasama ang Pangulong Rodrigo Duterte ngayong araw na ito.

Ipinabatid ni Roque na kapag naipatupad na ang pooled testing maaaring nasa P300.00 na lamang ang bayaran para sa COVID-19 test.

Lalabas aniyang paghahatian ng sampung taong sasailalim sa pooled testing ang isang testing kit na nasa hanggang P3,000 ang kada isa.

Suko na ang Malakaniyang sa prediksyon ng mga expert mula sa University of the Philippines (UP) matapos lumobo ang bilang ng mga kumpirmadong kaso ng coronavirus disease 2019 (COVID-19)  sa bansa.

Sa gitna na rin ito ng posibilidad na malampasan ang 85,000 mark forecast ng up hanggang sa katapusan ng buwang ito.

Ayon kay Presidential Spokesman Harry Roque nangyari na ang prediksyon kaya’t walang dapat ipagdiwang subalit hindi naman ito dahilan para panghinaan ng loob at hayaang dumami pa ang mga tatamaan ng COVID-19.

Sinabi ni Roque na mas higit pang dapat paigtingin ang contact gtracing, testing, treatment at isolation para epektibong mapigilan ang pagkalat ng virus na nagawa na rin naman sa Cebu City kayat tiyak na magagawa rin sa Metro Manila.

Inihayag ni Roque na nakakalungkot man subalit ito ang realidad kayat dapat na patuloy na mag ingat ng publiko para makaiwas sa COVID-19.