Judith Estrada-Larino

Tutulong na rin ang Philippine National Police (PNP) para mapalakas ang presensya ng bansa sa pinag-aagawang teritoryo sa West Philippine Sea (WPS).

Tiniyak ito ni PNP Chief General Debold Sinas sa gitna na rin ng mainit na usapin sa girian ng Pilipinas at China sa WPS.

Sinabi ni Sinas na kumikilos na ang PNP Maritime Group para tumulong sa Philippine Navy, Coast Guard at Bureau of Fisheries and Aquatic Resources (VFAR) sa pagsasagawa ng coastal patrol.

Una nang nakipagpulong sinas kay Armed Forces of the Philippines (AFP) Chief Cirilito Sobejana sa isinagawang joint peace and security coordinating council meeting noong isang lnggo.

Sa panig naman ni PNP Maritime Group Director Police Brigadier General John Mitchell, siniguro nitong paiigtingin nila ang intelligence gathering lalo na sa presensya ng China sa karagatang sakop ng Pilipinas. —ulat mula kay Jaymark Dagala (Patrol 9)

Suportado ng Philippine National Police (PNP) ang layunin ng mga nagsulputang community pantry sa iba’t ibang lugar sa bansa.

Ayon kay PNP Chief General Debold Sinas, hindi kailanman nakikialam ang pulisya sa anumang uri ng kawanggawa at pagmamagandang loob ng iba’t ibang grupo  o indibidwal.

Ipinabatid ni Sinas na sariling initiative ng lokal na pulisya ang ginagawang profiling sa mga organizer ng community pantries at walang kautusan mula sa liderato ng PNP para gawin ito.

Hangad lamang aniya nilang maging maayos ang pamamahagi ng tulong, salig sa umiiral na health protocols para labanan ang pagkalat ng coronavirus disease 2019 (COVID-19).

BASAHIN: PNP hindi ipinag-utos ang pagsasagawa ng profiling sa mga organizers ng community pantries, ayon kay PNP Chief Gen. Debold Sinas | via @jaymarkdagala pic.twitter.com/Rpg8J7gzeP

— DWIZ Newscenter (@dwiz882) April 20, 2021

Sa katunayan, inihayag ni Sinas na naglatag din ng sariling community pantry ang Eastern Police District Headquarters sa Pasig City mula pa kahapon.

Ang pahayag ni Sinas ay kasunod na rin nang pagtigil sa maginhawa Community Pantry sa Quezon City dahil sa umano’y profiling at red tagging. —ulat mula kay Jaymark Dagala (Patrol 9)

Mahalaga pa ring mahigpit na sumunod sa health and safety protocols para ma protektahan laban sa coronavirus disease 2019 (COVID-19).

Ayon ito kay Health Undersecretary Maria Rosario Vergeire matapos mapaulat na maaaring malipat sa hangin ang Severe Acute Respiratory Syndrome Coronavirus 2.

Dahil dito, ipinabatid ni Vergeire na inaaral na ng Department of Health (DOH) ang mga ebidensya hinggil sa airborne transmission ng COVID-19.

Sinabi naman ni World Health Organiztion (WHO) representative Dr. Rabindra Abeyasinghe na pina-aaralan na nila ang nasabing report bagamat nakikita nilang hindi ito malaking risk factor.

Hanggat wala pang malinaw na impact analysis kung gaano kalala ang epekto ng aerosol at airborne transmission, binigyang diin ni Abeyasinghe na mananatili pa ring focus ng WHO na maiiwasan ang hawahan sa pamamagitan nang pagsusuot ng face mask at face shield, paghuhugas ng kamay at pag obserba sa physical distancing.

Bagamat malinaw naman aniya ang naging pahayag ng WHO na mataas ang tsansa ng airborne transmission sa mga lugar na nagsasagawa ng medical procedures.

Walang nakikitang problema si Overseas Workers Welfare Administration (OWWA) Chief Hans Leo Cacdac sa dalawang linggong travel ban na ipinatutupad ng Hong Kong mula sa mga manggagaling ng Pilipinas, India at Pakistan.

Sinabi sa DWIZ ni Cacdac na ang dapat gawin ng mga Overseas Filipino Workers (OFWs) na nakatakdang magbiyahe pa-Hong Kong na makipag-ugnayan sa airlines at kanilang employment agency na siyang bahalang mag-advise sa employers ng mga OFW sa Hong Kong.

Tuloy pa ho, pero ‘yun nga po, may 2-week restriction dahil nga sa health protocols ng Hong Kong. Tuloy pa naman, pwede pa naman magrecruit ang recruitment agency kaya lang nakaantala lang ngayon,” ani Cacdac. —sa panayam ng IZ sa Alas Sais

Isang taon lamang tatagal ang pagpapatupad ng Executive Order 128 o pagsusulong ng mababang taripa para sa pork imports at pagtataas ng maximum access volume (MAV) nito.

Ayon ito kay Agriculture Assistant Secretary Noel Reyes para hindi sumirit ang presyo ng karneng baboy.

Magiging daan din aniya ang isang taong mababang taripa sa pork imports para makabawi kontra African Swine Fever (ASF) at magkaroon ng repopulation.

Binigyang diin pa ni Reyes na hindi dapat sumakit ang ulo ng mga Pilipino sa mataas na presyo ng karneng baboy kung may paraan naman para mapababa ito.

Meanwhile ‘wag nating pahirapan ang mga consumer sa presyo ng baboy. Sa backyard raisers meron tayong ayuda at pautang… sa commercial raisers meron tayong pautang sa landbank at ADB, ” ani Reyes. —sa panayam ng IZ sa Alas Sais

Tutok ang Department of Public Works and Highways (DPWH) sa pagpapagawa ng modular hospitals para makatulong sa mga pasyenteng may coronavirus disease 2019 (COVID-19) na hindi na makatakbo sa mga punuang ospital.

Ipinabatid ni DPWH Secretary at isolation czar Mark Villar na 45 araw nila maitatayo ang modular hospitals.

Ayon kay Villar, ang isolation facilities ay may basic na mga gamit na hindi sapat para gamutin ang moderate at severe case ng COVID-19.

Ang kada modular hospital aniya ay may negative pressure at oxygen supply sa bawat kuwarto na mayroon pang ibang gamit para magamot ang isang COVID-19 patient.

Nakapagpatayo na ang DPWH ng modular facilities sa Quezon Institute Hospital na may 110 bed capacity, 16 bed capacity sa Lung Center, 22 beds naman sa Dr. Jose  Rodriguez Hospital, 60 beds sa National Kidney Institute at 2 units na mayroong 44 beds sa Batangas City.

Isinasapinal na ng Department of Social Welfare and Development (DSWD) ang Listahanan 3 o ng ikatlong assessment ng mga mahihirap na Pilipino sa bansa.

Ipinabatid ito ni DSWD Spokesperson Irene Dumlao na nagsabing nasa huling yugto na sila ng proseso sa pagsasapinal ng listahanan para matukoy kung sino at nasaan ang mga mahihirap na kabahayan na nangangailangan ng tulong.

Ang listahanan National Household Targeting System for Poverty Reduction ay isang information management system na magsisilbing database ng mga mahihirap na Pilipino upang mapabilis ang pagtukoy sa mga beneficiaries at pamamahagi ng anumang tulong sa mga ito.

Pinag-aaralan na ng Department of Science and Technology (DOST) kung epektibong gamot laban sa coronavirus disease 2019 (COVID-19) ang melatonin.

Ayon ito kay DOST Secretary Fortunato Dela Peña matapos aprubahan ang clinical trial sa melatonin matapos itong ipagamit sa ilang pasyenteng may severe COVID-19 sa Makati Medical Center at Manila Doctors Hospital.

Bukod dito, ipinabatid ni Dela Peña ang pag-aaral sa Methylprednisolone na isang uri ng steroid na sumasailalim na rin sa clinical trial.

Nasubukan din aniya ang gamot na Dexamethasone subalit naghahanap sila ng katulad ng naturang gamot para hindi magka problema sa intellectual property.

Una nang inihayag ni Dela Peña na sinusuri na nila ang lagundi, tawa-tawa at virgin coconut oil na posibleng lunas sa ilang sintomas ng COVID-19 samantalang sasalang na aniya sa ilang buwang clinic trials ang kontrobersyal na Ivermectin.

Tiwala ang grupo ni Congressman Nicanor Briones na tototohanin ng Pangulong Rodrigo Duterte ang pagbawi sa pinayagang pagbaba ng taripa sa pork imports at pagtaas ng maximum access volume (MAV) para rito.

Iginiit sa DWIZ ni Briones, vice president for Luzon ng Pork Producers Federation of the Philippines (ProPork), na magkakaroon ng krisis sa supply ng karneng baboy kapag nalugi ang mga local hog raisers.

Ayon pa kay Briones, maraming backyard raisers ang titigil na pag-aalaga ng baboy dahil hindi lamang sila dinapa ng African Swine Fever (ASF) kundi maging ang naturang executive order ng Pangulong Duterte.

‘Yan ang papatay sa amin. Tinamaan na ng African Swine Fever, talagang bagsak ang aming industriya, tatamaan pa ng EO 128 na ito, t’yaka yung pagtaas ng MAV, ay talagang maraming hindi na mag-aalaga na mga backyard raisers; ‘yung 65% na backyard raisers, pati itong mga commercial, at walang magrerepopulate dahil dini-discouraged nitong mga aksyon ng government. Itong EO 128 na ito ay lumalabas na kami ay walang pag-asa kaya titigil ang marami,” ani Briones —sa panayam ng Balitang Todong Lakas

Sinisi ng Pangulong Rodrigo Duterte ang Aquino administration sa anito’y paglala ng problema sa West Philippine Sea matapos tanggalin ang mga barko ng Pilipinas.

Ayon sa pangulo, ang pag-aalis ng mga barko ng bansa ng dating pangulong Noynoy Aquino ay nagpapakita na hindi pag-aari ng Pilipinas ang karagatan.

Ayaw aniya niyang makipag-away sa China at wala siyang interes sa mga isda kaya’t pumapayag siyang makihati ang China sa kung ano ang naroon sa lugar.

Subalit, binigyang diin ng pangulo na hindi siya papayag kapag ang kinuha ng China ay langis, nickel at mga mahahalagang bato, at ito aniya ang dapat aksyunan ng gobyerno ng Pilipinas.

Sinabi pa ng pangulo na mababawi lamang ang West Philippine Sea kung magkakaroon ng puwersahang pag-angkin.