Judith Estrada-Larino

Itinigil muna ang ‘Maginhawa Community Pantry’ sa Quezon City matapos ma-red tag.

Ito, ayon kay Anna Patricia Non, organizer ng Maginhawa Community Pantry, ay para na rin sa kaligtasan ng kanilang volunteers.

Sinabi ni Non na nalulungkot siyang hindi muna nila maipapamahagi ang mga goods na inihanda nila dahil nga sa red tagging na problema rin ng iba pang community pantry, subalit magpapasabi sila kung kailan muling bubuksan ang Maginhawa Community Pantry.

Maganda naman aniya ang intensyon niya nang simulan ang community pantry na ilang araw na ring pinakikinabangan ng taumbayan at dagsa na rin ang mga dumarating na tulong.

Nagpapasaklolo si Non kay Quezon City Mayor Joy Belmonte matapos lapitan ng tatlong pulis na nanghihingi ng kanyang contact number at nagtatanong kung anong organisasyon siya nabibilang.

Una nang ipinost ng National Task Force to End Local Communist Armed Conflict at maging ng Quezon City Police ang graphics sa kani-kanilang Facebook page ang pag-uugnay sa mga community pantry sa mga komunista.

Napanatili ng Bagyong Bising ang lakas nito habang unti-unting kumikilos pa-hilaga, hilagang-kanluran.

Ang sentro ng Bagyong Bising ay pinakahuling namataan sa layong  235 kilometers silangan, hilagang-silangan ng Virac, Catanduanes o 360 kilometers silangan ng Daet, Camarines Norte.

Taglay ng Bagyong Bising ang pinakamalakas na hanging umaabot sa 195 kilometers kada oras malapit sa gitna at may pagbugso na umaabot sa 240 kilometers kada oras.

Ang Bagyong Bising ay inaasahang marahang kikilos pa-hilaga, hilagang-kanluran.

Nakataas ang Tropical Cyclone Wind Signal No. 2 sa mga sumusunod na lugar:

• Catanduanes
• Eastern part of Camarines Sur
• Eastern portion of Albay
• Eastern and central parts of Sorsogon
• Northern Samar
• Samar
• Eastern Samar
• Biliran

Nakataas naman ang Tropical Cyclone Wind Signal No. 1 sa mga sumusunod na lugar:

• Southeastern portion of Cagayan
• Northeastern part of Quirino
• Northern portion of Aurora
• Eastern part of Isabela
• Eastern part of Quezon including Polillo Islands
• Camarines Norte
• Rest of Camarines Sur
• Rest of Albay
• Rest of Sorsogon
• Masbate including Burias and Ticao Islands
• Leyte
• Southern Leyte
• Northern portion of Cebu including Bantayan and Camotes Islands
• Dinagat Islands
• Siargao Islands
• Bucas Grande Islands

Sususpendihin ng Hong Kong ang mga biyahe mula sa India, Pakistan at Pilipinas.

Ayon sa Hong Kong authorities, ang pagbabawal ng mga flights simula bukas, ika-20 ng Abril, sa loob ng dalawang linggo ay kasunod nang pagkaka detect ng N501Y mutant coronavirus disease 2019 (COVID-19) strain sa Asian financial hub sa kauna-unahang pagkakataon.

Ipinabatid ng mga Hong Kong government na maituturing ang Pilipinas, India at Pakistan bilang extremely high risk matapos maitala ang multiple imported cases na nagdala ng strain sa Hong Kong sa nakalipas na 14 na araw.

Kahapon ay iniulat ng Hong Kong ang 30 bagong kaso ng COVID-19 na anito’y inimport at itinuturing na pinakamataas na bilang simula ika-15 ng Marso.

Kabilang sa mga airlines na may biyaheng pa-Hong Kong ang Cathay Pacific, Hong Kong airlines, Vistara at Cebu Pacific.

Halos nasa 50,000 lagda na ang sumusuporta sa online petition na nananawagan sa resignation ng Pangulong Rodrigo Duterte dahil sa hindi umano maayos na coronavirus disease 2019 (COVID-19) response ng gobyerno at pagiging sunud-sunuran sa China.

Ayon ito kay Dr. Edelina Dela Paz, chairperson ng Health Alliance for Democracy, na nagpapatunay na maraming Pilipino na ang hindi natutuwa sa ginagawa ng pangulo at sakali mang hindi siya magresign, ang online petition ay magdudulot ng awareness sa mga tao na kailangang magsalita at manindigan.

Binigyang diin ni Dela Paz na ang online petition ay hindi political statement kundi authentic call o makatuwirang panawagan para magbitiw na sa puwesto ang Pangulong Duterte.

Ang change.org petition na may titulong “Save the Nation! Duterte Resign!” ay una nang nilagdaan ng 500 medical workers, abogado, negosyante, miyembro ng academe, media workers at civic leaders.

Pinadadagdagan ng Department of Health (DOH) sa grupo ng mga pribadong ospital sa pamamagitan ng written warning ng 30% ang coronavirus disease 2019 (COVID-19) capacity nito.

Ayon kay Dr. Jose Rene Degrano, pangulo ng Private Hospitals Association of the Philippines (PHAP), nasa 20% ng kabuuang bed allocation para sa COVID-19 patients ang inilalaan ng private hospitals.

Sinabi ni Degrano na isang nurse ang uubrang humawak ng lima hanggang walong pasyente na mayroong mild symptoms at isa hanggang tatlong pasyente naman ‘yung may moderate to severe symptoms.

Ayon kay Degrano, nagsabi na sila sa DOH na susubukan nilang dagdagan ang kanilang kapasidad kung makakakuha sila ng dagdag na nurses na puwedeng pumuno sa additional beds.

Ginagawa naman aniya ng paraan ng private hospitals kung kakayanin nila subalit karamihan sa mga ito ay nagsabing may natanggap silang written na kailangan nilang sumunod sa Bayanihan 2 directive na bahagi nito.

Una nang umapela sa gobyerno ang grupo para dagdagan ang workforce ng mga pribadong ospital lalo pa’t patuloy ang pagsirit ng kaso ng COVID-19 sa NCR Plus.

Inaasahang maibabalik na sa regular na kuwarto ngayong araw na ito ang dating pangulong Joseph Estrada mula sa intensive care unit (ICU).

Ito, ayon kay dating Senador Jinggoy Estrada, ay kasunod nang pag-ayos na ng kondisyon ng dating pangulo kung saan normal na aniya lahat ng vital signs nito at maging ang kanyang oxygen flow samantalang stabilize na rin ang blood pressure nito.

Ipinabatid ni Jinggoy na ngayong araw na ito ay nagkataon pang ika-84 na kaarawan ng dating pangulo, kaya’t bukod sa babatiin niya ito ay magdadala siya ng cake para rito.

Magugunitang noong isang linggo ay ibinalik sa ICU ang dating pangulo matapos makita ng mga doktor nito ang superimposed bacterial lung infection.

Ika-13 ng Abril nang magnegatibo na ang dating pangulo sa coronavirus disease 2019 (COVID-19).

Mismong ang medical workers na ang magpupunta at magbabakuna sa mga bedridden na residente ng Lungsod ng Maynila.

Nito nakalipas na weekend, mahigit 50 residenteng bedridden ng Maynila ang nabakunahan na sa pamamagitan ng home service vaccination ng Manila Health Department.

Kailangan lamang ng permiso ng pamilya o doktor lalo na sa mga mayroong sakit o preexisting condition na may edad 18 pataas para maserbisyuhan ng home service vaccination.

Sakaling may kapamilyang bedridden na nais magpabakuna sa Maynila, pinayuhan ng MHD ang mga ito na magpalista sa kanilang barangay para i-request ang home service vaccination para sa kanilang mga mahal sa buhay.

Kasabay nito, bumili muli ang Manila City local government unit ng mga gamot na Remdesivir at Tocilizumab na ginagamit sa severe at critical cases ng coronavirus disease 2019 (COVID-19), batay na rin sa solidarity trials ng World Health Organization.

Siyam (9) na emergency field hospitals ang itinayo ng Philippine Red Cross (PRC) sa Lung Center of the Philippines para maibsan ang pagdami ng mga pasyenteng may coronavirus disease 2019 (COVID-19) na itinatakbo rito.

Ayon kay PRC Chairman at CEO Senador Richard Gordon, ang lahat ng COVID-19 positive na nangangailangan ng x-ray, CT scan, laboratories at medical facilities ay uubrang dalhin na sa emergency field hospitals.

Magsisilbi aniyang extension ng Lung Center ang ipinatayo nilang emergency hospitals dahil sa patuloy na kakulangan ng hospital beds sa naturang ospital.

Ipinabatid ni Gordon na magkakatuwang na mag-a-assist sa mga pasyente sa naturang emergency hospitals ang mga staff ng PRC, volunteers, kinatawan ng Philippine Medical Association at Philippine Nurses Association.

Hindi lamang lockdown ang solusyon para mapababa ang kaso ng coronavirus disease 2019 (COVID-19) sa bansa partikular sa NCR Plus.

Ayon ito sa Private Hospitals Associations of the Philippines (PHAP) dahil ang solusyon sa global health crisis ay pagpapaigting sa contact tracing at pagbabakuna.

Sinabi ng PHAP na hindi sapat ang dalawang linggong enhanced community quarantine (ECQ) at maging modified ECQ sa Metro Manila at mga karatig lalawigan ng Bulacan, Rizal, Laguna at Cavite para tuluyang matugunan ang pagtaas ng kaso ng COVID-19.