Halos 8,0000 pamilya o nasa mahigit 28,000 indibidwal ang nailikas ng provincial government ng Catanduanes kaugnay ng Bagyong Bising.
Ipinabatid ito sa DWIZ ni Catanduanes Governor Joseph Cua na nagsabi ring mas ramdam nila kagabi hanggang kaninang umaga ang malakas na hanging dala ng Bagyong Bising.
Wala pa aniya siyang nakukuhang official report mula sa tatlong bayan sa lalawigan na apektado ng Bagyong Bising.
Isinailalim sa hard general community quarantine (GCQ) ang buong bayan ng San Isidro sa lalawigan ng Isabela.
Ito, ayon kay Police Captain Ricson Cabautan, OIC ng San Isidro Police, ay para mapigilan ang pagkalat ng coronavirus disease 2019 (COVID-19) dahil hindi makontrol ng lokal na pamahalaan ang galaw ng mga tao partikular ng mga motorista kaya’t tumataas ang kaso ng virus sa nasabing bayan.
Dahil dito, mahigpit na ipinatutupad ang travel restriction sa mga residente kabilang ang checkpoint sa bawat barangay .
Epektibo pa rin ang total liquor ban at mahigpit na ipinagbabawal ang mass gathering.
Kaagad nailikas ng provincial government ng Albay ang mga residente mula sa coastal areas ng lalawigan.
Ito, ayon kay Albay Governor Al Francis Bichara, ay dahil sa lakas ng alon dulot ng Bagyong Bising bagamat hindi naman kalakasan ang ulan.
Sinabi sa DWIZ ni Bichara na nais lamang niyang magsiguro na walang madidisgrasyang residente sa coastal areas sa buong magdamag at inaasahang magbabalikan na rin sa kani kanilang mga bahay ngayong araw na ito.
Ilan naman aniya sa mga apektadong residente ay nagpasyang makitulog muna ng isang gabi sa kani-kanilang mga kaanak.
Marami ang nai-evacuate namin kahapon sa may shore line, sa may pampang ng dagat. Siguro mga almost 30,000 din. Sabi ko overnight lang ito, pasensya na dahil kailangan, pero totoo, malakas ang mga alon, pumapasok sa mga bahay nila sa shore line, malakas talaga ‘yung alon. Ngayon umuulan pa naman, pero malayo na ‘yung bagyo, pero umuulan pa rin dito,” ani Bichara. —sa panayam ng Balitang Todong Lakas
Dumadami ang kaso ng coronavirus disease 2019 (COVID-19) sa lalawigan ng Albay kung saan karamihan sa mga dinadapuan ng virus ay authorized person outside residence (APOR) tulad ng mga doktor, nurses, pulis, gayundin ang empleyado ng local government units.
Ipinabatid ito sa DWIZ ni Albay Governor Al Francis Bichara sa gitna na rin nang pagsirit ng kaso ng COVID-19 sa bansa.
Ayon kay Bichara, mataas ang community transmission sa lalawigan kung saan nakapagtatala sila ng 10 kaso kada araw.
Nagkaroon tayo ng community transmission. Dapat ay lahat ng pumapasok, specially ‘yung galing Maynila, dapat pinapa-check talaga, kaso, sinabi nila basta APOR pwedeng pumasok, labas-masok sila, ‘yun din ang kumakalat,” ani Bichara. —sa panayam ng Balitang Todong Lakas
Iniimbestigahan na ng pamunuan ng Armed Forces of the Philippines (AFP) ang grupong Viber 500 na umano’y nagpahayag nang pagkalas ng suporta sa Pangulong Rodrigo Duterte.
Ayon ito kay AFP Chief of Staff General Cirilito Sobejana na tinawag na ‘fake news’ ang pinalulutang ng nasabing grupo.
Mahigpit na itinanggi ni Sobejana na bahagi siya ng naturang grupo, gayundin ang iba pang opisyal ng AFP, kasabay ang pakiusap na huwag i-share ang mga katulad na post ng hindi pa nabeberipika mula mismo sa mga otoridad.
Nakita namin sa socmed post na nagsasabi na kasama kami sa Viber 500 at sinasabing we are withdrawing our support from the commander-in-chief and the president. Pinabulaanan na namin ‘yan wala pong katotohanan at we even made a public statement yesterday telling our people na wag tayong maniwala sa mga fake news. Kailangan pag may mga lumalabas na ganyan, tatanungin natin ‘yung concern or the authorities bago natin i-share sa iba,” ani Sobejana.
Tiniyak ni Sobejana ang pagiging tapat sa tungkulin ng sandatahanang lakas na protektahan ang Pangulong Duterte at Sambayanang Pilipino.
‘Yung inyong Armed Forces remains and will always be faithful to the nation and the chain of command, with our commande in chief, who is also our president, as the most senior in the chain of commands. Mananatili po kaming faithful sa pagbibigay ng serbisyo sa ating mga kababayan at sa ating commander in chief at the same time our president,” ani Sobejana. —sa panayam ng IZ sa Alas Sais
Isa pang pribadong ospital ang naisyuhan ng Food and Drug Adminsitration (FDA) ng Compassionate Special Permit (CSP) para sa paggamit ng Ivermectin bilang gamot kontra coronavirus disease 2019 (COVID-19).
Gayunman, tumanggi si FDA Director General Eric Domingo na tukuyin ang nasabing ospital gayundin ang naunang nabigyan nila ng CSP.
Kabilang sa mga requirement para mabigyan ng CSP, ayon kay Domingo, ay pangalan ng licensed importer at patunay ng registration ng Ivermectin mula sa bansang pagkukunan ng supply nito.
Dapat din aniya nilang malaman ang investigational treatment na susundin ng ospital sa paggamit ng Ivermectin laban sa COVID-19.
Ipinabatid ni Domingo na buwan-buwang magre-report sa FDA ang mga doktor na magpapainom ng Ivermectin na sa Amerika ay ginagamit na sa mild hanggang moderate cases ng COVID-19.
Pinalawig pa ng ikatlong telco ang serbisyo nito sa 21 pang lungsod.
Tiniyak ng Dito Telecommunity ang kanilang serbisyo sa Lipa City, Malvar, Santo Tomas at Tanauan sa Batangas, Silang at Tagaytay City sa Cavite, Calamba at Los Baños sa Laguna, Baliuag sa Bulacan, Palayan, Santa Rosa, Science City of Muñoz, Talavera at Cabanatuan City sa Nueva Ecija.
Bukod pa ito sa Capas, Concepcion, Gerona at Tarlac City sa lalawigan ng Tarlac, General Santos City sa South Cotabato at Compostela at Cordova sa Cebu.
Tiniyak ni Dito Chief Administrative Officer Adel Tamano ang pagpapalawig pa ng serbisyo nila sa mga susunod na araw para sa mga Pilipinong naghahanap ng malakas at maaasahang internet service.
Unti-unti nang nararamdaman ang epekto ng dalawang linggong ECQ status na pinairal sa NCR plus.
Ayon ito kay Professor Guido David, miyembro ng OCTA research group matapos maitala sa 1.16 ang reproduction number ng COVID-19 cases sa Metro Manila hanggang kahapon.
Nilinaw sa DWIZ ni David na hindi pa tuluyang bumababa ang kaso sa buong NCR bagamat may mga LGU na nakapagtala ng may downward trend sa COVID-19 cases.
Yung sa buong NCR medyo hindi naman tumaas or bumaba masyado yung cases pero may mga LGU na may improvement, downward trend na kasama dito yung Pasay, Mandaluyong, Marikina, Taguig, Manila saka Muntinlupa. May mga iba na pababa na, nakikita na natin nagsimula ng bumaba at may ilang LGU naman na hindi na rin tumataas masyado, ” ani David.
Gayunman sinabi ni David na hindi nila matukoy ang partikular na hakbangin na nagpababa sa reproduction number ng COVID cases sa Metro Manila bagamat maaring nakatulong ang localized lockdown na ipinatupad sa ilang area sa NCR.
Hindi natin ma-i-identify kung ano yung specific, yung measures na nakatulong pero in totality nakatulong lahat ‘yan. Ang nakakagulat yung Pasay 157 na lang yung average cases nila so, baka nakatulong din yung localized lockdown nila, in fact mas marami ng cases sa San Juan ngayon kesa sa Pasay,” ani David.
Inaprubahan na ng Inter-Agency Task Force on Emerging Infectious Diseases (IATF) ang mga sektor na pasok sa A4 category na priority sa coronavirus disease 2019 (COVID-19) vaccination program ng gobyerno.
Ayon kay Presidential Spokesman Harry Roque, kabilang sa A4 category ang mga nasa sektor at industriya ng transportasyon, market, manufacturing, government services, hotels, education at media.
Pasok din sa A4 list ang mga lider at opisyal ng mga relihiyon, security personnel sa priority industries at sectors, mga nasa telecoms, cable, internet providers, electricity distribution at water distribution utilities.
Bukod pa ito sa mga nasa law, justice, security, protection sectors at maging mga Overseas Filipino Workers (OFWs) kabilang ang mga nakatakdang lumabas ng bansa sa loob ng dalawang buwan.
Kasabay nito, ipinabatid ni Roque na inaprubahan din ng IATF ang patuloy na training ng national athletes sa Olympic training bubble sa Calamba, Laguna at extension, samantalang ang mga dayuhang may valid entry exemption documents na inisyu ng Department of Foreign Affairs (DFA) bago mag-ika-22 ng Marso ay uubrang makapasok ng bansa.
Inanunsyo rin ni Roque na inaprubahan ng IATF ang pagpapalawig sa modified enhanced community quarantine (MECQ) status ng Quirino Province hanggang ika-30 ng Abril.
Inamin ng Food and Drug Administration (FDA) na pahirapan ang pagsecure ng bansa ng coronavirus disease 2019 (COVID-19) vaccines para sa lahat ng mga Pilipino.
Kasunod na rin ito ng mahigit 900,000 kumpirmadong kaso ng COVID-19 sa bansa.
Ayon kay FDA Director General Eric Domingo, ini-evaluate pa nila ang application para sa emergency use authorization (EUA) ng mga bakunang dini-develop ng Bharat Biotech ng India at Belgium-based Janssen Pharmaceuticals, samantalang wala pa namang naisusumiteng requirement para sa EUA application ang US-based company na Moderna.
Sinabi ni Domingo na matagal nang nagpaparamdam ang Moderna subalit wala pa naman itong EUA application.
Una nang iniulat ng Department of Health na hanggang nitong nakalipas na ika-13 ng Abril, mahigit 1.2 million doses na ang naiturok simula nang gumulong ang vaccination program ng gobyerno noong ika-1 ng Marso.