Pumapalo na sa kabuuang P1.38 bilyon halos 28 milyong dolyar ang naibigay na tulong ng Amerika sa bansa para labanan ang COVID-19 pandemic.
Ang nasabing halaga, ayon sa US Embassy ay hindi lamang bakuna kundi iba’t ibang medical supplies at facilities.
Tiniyak ng US government ang patuloy na tulong sa Pilipinas sa COVID-19 pandemic response nito.
Nasa 800 indibidwal lamang ang pinayagang makapasok sa golden mosque sa lungsod ng Maynila.
Bahagi ito nang paggunita sa Eid’l Adha o Arabic festival of sacrifice ngayong araw na ito na isang regular holiday.
Ang mga hindi nakapasok sa mosque, ayon sa mga otoridad na nasa halos 1K pa ay kailangang magsagawa ng morning prayer sa mga lansangan ng Globo De Oro at Elizondo.
Inabutan ng pag-ulan ang pang umagang dasal kayat kinailangang putulin ang pagtitipon ng mga tao sa labas ng mosque.
Ito na ang ikalawang beses na ipinagdiwang ng mga kapatid na Muslim ang Eid’l Al Adha sa ilalim ng pandemya subalit ito ang unang beses na nadala ng marami ang kanilang mga anak sa pagdiriwang matapos payagang lumabas ang mga batang may edad lima pataas.
Masusi pang pag-uusapan ng DILG ang ikakasang mga strategy kontra delta variant ng coronavirus.
Ayon ito kay DILG Undersecretary Epimaco Densing kasunod ng pahayag ng Pangulong Rodrigo Duterte na posibleng maghigpit muli ng quarantine dahil sa delta variant.
Gayunman sinabi sa DWIZ ni Densing na ang mga binubuo nilang strategy ay naka-depende sa quarantine classification ng isang local government unit.
Para pag-usapan po namin itong istratehiya nitong para pigilan itong mass gathering at yung mga tao, wag basta-basta lalabas ng bahay magiging depende pa rin po ito sa community quarantine classification ng isang lokal na gobyerno. Halimbawa po ngayon ang biglaan po noong Biyernes inangat po into total lockdown o ECQ ang Iloilo Province, Iloilo City, Gingoog City sa Misamis Oriental at Cagayan De Oro kasi doon nakitaan ng bagong cases ng delta variant para malaman po ng ating mga kababayan na ito ang matagal ng pinipigilan na makapasok sa Pilipinas kaya po mahigpit an gating mga protocols sa mga umuuwing Pilipino galing sa ibang bansa,″ pahayag ni Densing.
Tiniyak ni Densing ang mahigpit na bilin sa local officials ng mga naka-lockdown na Iloilo Province, Iloilo City, Gingoog, Misamis Oriental at Cagayan De Oro City na mahigpit na magpatupad ng health and safety protocols matapos makapagtala ng mga kaso ng delta variant.
Malinaw po kinausap namin ang mga Mayor na ‘yan, nagpalabas nap o sila ng executive order na lalabas lang po ang kanilang kababayan para sa essential services,bibili ng pagkain, mga pangangailangan sa bahay at ang papayagan lang lumabas ay ang mga magtatrabaho doon sa tinatawag nating essential services so very limited po. Ang ating DSWD naman ay naghahanda na po ng kanilang assistance sa mga kababayan natin sa mga lugar na ‘yun,″wika ni Densing sa panayam ng DWIZ.
Gagamitin ng PNP ang Oplan Bandillo sa pagbabantay sa mga lugar partikular sa Mindanao na nagsisilbing backdoor para hindi mapigilan ang pagpasok ng COVID-19 partikular ng delta variant nito.
Ipinabatid ito sa DWIZ ni PNP Spokesperson Ronaldo Olay matapos ipag utos ng pangulong rodrigo duterte ang mahigpit na pagbabantay ng PNP at AFP laban sa COVID-19.
Sinabi ni Olay na sa pamamagitan ng oplan bandillo na Anti-Crime and Information Campaign ng PNP ay makakatuwang din nila ang publiko para sanib puwersang labanan ang COVID-19.
Inihahanda na rin aniya nila ang kanilang medical personnel sakaling kailangan ang mga ito sa pagbabantay laban sa virus.
Ito kasing sa bagay na ito pwede nating gamitin ang oplan bandillo para iparating sa mga kababayan natin ang patuloy na banta ng COVID-19 at kung ano yung klasipikasyon ng quarantine at para sumunod sila sa mga patakaran ng IATF protocols,″pahayag ni Olay sa DWIZ.
Itinuturing na pinakahanda at pinakamalakas ang delegado ng bansa sa idaraos ng Olympics sa Tokyo, Japan ngayong taon simula nang sumali ang bansa sa Olympics noong 1924 sa Paris.
Dahil dito, tiwala si Philippine Sports Commission Chair William Butch Ramirez na magpapakitang gilas ang 19 na Pinoy athletes tungo sa paghablot sa pinakaaasam na gintong medalya.
Ipinabatid ni Ramirez na nasa P279 milyon na ang nagastos nila sa training ng pinoy athletes na sasabak sa Tokyo Olympics kaya’t normal lamang din aniyang umaasa ng gintong medalya ang gobyerno mula sa Tokyo olympics.
Inaasahan na aniya ang return on investment at nakakadismaya talaga kung walang makukuha ginto o tanso ang Pinoy athletes na kasali sa olympics ngayong taon.
Itinaboy ng isang barko ng Philippine Coastguard ang isang Chinese navy warship sa Marie Louise Bank na nasasakop ng El Nido, Palawan.
Ayon sa Coastguard, namataan ng BRP Cabra noong Hulyo 13 ang isang navy warship na mayroong bandila ng China at markado ng Chinese characters
Dahil dito, kaagad na isyu ng warning sa nasabing Chinese warship ang commanding officer ng BRP Cabra na si Commander Erwin Tolentino habang mahigpit na mino-monitor ang galaw ng warship gamit ang radar system.
Tiniyak naman ng coastguard na may diplomansya at naaayon sa batas ang inisyung warning ni tolentino sa nasabing Chinese warship matapos lumapit pa rito at igiit na bahagi ng Exclusive Economic Zone ng Pilipinas ang kinatatayuan nito.
Hindi pa naman kaagad kumilos at lumayo sa lugar ang naturang Chinese navy warship hanggang gumamit ang BRP Cabra ng long range acoustic device nito para ulitin ang warning dito.
Ibinasura ng korte sa Olongapo City ang kasong isinampa laban sa dalawang magsasakang Aeta na tiga San Marcelino, Zambales.
Kaagad nakalaya si Japer Gurung at bayaw nitong si Junior Ramos matapos i-dismis ni Olongapo RTC Judge Melani Fay Tadili ang terrorism charges laban sa mga ito.
Binigyang diin ni Tadili na bigo ang prosecution na patunayang mga terorista sina Gurung at Ramos na kapwa tuwang-tuwa naman sa naging hatol ng korte.
Nagpasalamat din sina Gurung at Ramos sa lahat ng mga tumulong sa kanila para mapawalang sala sa itinuturing umanong landmark terror case.
Una nang nasangkot ang mga nasabing Aeta sa isang engkuwentro sa mga sundalo at pinaghinalaang mga rebeldeng komunista noong Agosto 21, 2021.
Dalawang hinihinalang rebeldeng komunista ang nasawi sa engkuwentro sa Sagnay, Camarines Sur.
Ayon sa military, mag-a-alas-11 ng umaga nang magkasagupa ang pinagsanib na puwersa ng 83rd infantry battalion at PNP at halos 20 miyembro ng npa sa Barangay Bongalon.
Nasabat sa pinangyarihan ng engkuwentro ang 12 high powered firearms, walong M16s, tig-2 M14s at M653 rifles, magazines at mga personal na gamit.
Ipinabatid ni Lt. Colonel Clark Dalumbar, Commander ng 83 I.B na isang report ang natanggap nila hinggil sa pagtatangka ng isang grupo ng npa members na mag recruit sa lugar kayat kaagad nilang nilusob ang lugar.
Muling binuksan ng City government ng Tagbilaran ang pagbabakuna nito ng first dose sa kanilang mga residente.
Ipinabatid ni Tagbilaran City Mayor Baba Yap na sinimulan na kahapon at itutuloy ngayong araw na ito ang pagbabakuna ng first dose ng AstraZeneca sa mga residente nito.
Priority sa pagbabakuna ng first dose ang mga nasa ilalim ng A1 category o health workers, A2 o senior citizens at A3 o persons with comorbidities.
Kailangan lamang aniyang iprisinta ng mga residente ang kanilang ID na inisyu ng gobyerno kung saan nakalagay ang address ay mula sa tagbilaran samantalang kailangang magdala ng medical certificate ng persons with comorbidities.
Itinakda naman sa buwan ng Setyembre ang pagtuturok ng second dose sa mga naturang residente ng Tagbilaran.
Walang sapat na tauhan ang mga pribadong ospital para pangasiwaan ang mga dagdag ding kama.
Sa gitna ito nang inaasahang pagsirit muli ng kaso ng COVID-19 dahil sa delta variant ng nasabing virus.
Ayon kay Dr. Jose Rene Degrano, pangulo ng Private Hospitals Association of the Philippines (PHAP), uubra namang magdagdag ng kama ang mga miyembro nilang ospital subalit kulang sa tao ang mga ito para mag-alaga sa mga moderate to critical patients.
Mayorya ng mga pribadong ospital ang naglaan ng 20% ng bed capacity nila sa COVID-19 patients tulad nang direktiba ng gobyerno.
Sinabi ni Degrano na nagiging problema rin nila ang nabibinbing pagbabayad sa kanila ng PhilHealth para sa COVID-19 cases noong 2020 na sa katunayan ay nasa 4% pa lamang ang nase-settle ng ahensya sa mga pribadong ospital.