Gilbert Perdez

Muling nagbabala sa publiko ang PNP Anti-Cybercrime Group (ACG) laban sa pagpo-post sa social media at baka sila ay makasuhan.

Ginawa ni PNP ACG Director Police Brig. General Joel Doria ang paalala matapos arestuhin ang isang babae sa Brgy. Camputhaw, Cebu City nang kasuhan ng cyberlibel ng kanyang kapitbahay.

Ayon kay ACG Spokesperson Police Lt. Michelle Sabino, ang naaresto na si Sheila Ypanto Villarez ang unang nagsampa ng reklamo laban sa kanyang lalaking kapitbahay matapos umano siyang nakawan ng 60,000 pesos noong Setyembre 2021.

Ngunit noong Disyembre, sinasabing binugbog ng kapitbahay ang asawa ni Villarez, na naging dahilan ng kanyang pag-post sa social media ng kasong isinampa niya laban sa kanyang kapitbahay.

Ang post naman na iyon ang naging dahilan para ireklamo si Villarez ng kanyang kapitbahay ng cyberlibel kaya’t dinakip ito ng mga pulis.

Sinabi ni Doria na ang kaso laban kay Villarez ay nagsisilbing paalala sa lahat ng netizens na maging responsable sa  mga pino-post online.

Mismong si PNP Chief Police Gen. Rodolfo Azurin Jr. ang nanguna sa presentasyon ng 969 milyong pisong halaga ng bagong kagamitan ng pambansang pulisya sa Camp Crame.

Pahayag ni Azurin, ang mga bagong gamit ay makapagpapalakas sa kampanya ng PNP kontra sa ilegal na droga, kriminalidad, insurhensya at terorismo.

Kabilang dito ang 10 4×2 patrol jeep, 36 na 4×4 personnel carrier, 8,358 na 9mm striker fired pistol, 8,500 na 5.56mm basic assault rifle, 34 na 7.62mm light machine gun, 4,900 na 5.56mm basic assault rifle, 884 na tablet computer at 2,005 na enhanced combat helmet.

Nabatid na ang mga bagong sasakyan at tablet computers ay ipapamahagi sa iba’t ibang municipal police stations, habang ang mga baril ay gagamitin ng mga PNP recruits, PNPA cadets, PNP Maritime Group at Regional Mobile forces at battalion.

Nakatakdang pangunahan ng Office of Civil Defense (OCD) ang pagbabalik ng face-to-face na National Simultaneous Earthquake Drill.

Matatandaang dahil sa COVID-19 pandemic, naging online ang earthquake drill pero ngayong 3rd quarter ay magkakaroon na muli ng physical drill sa Makati City.

Katuwang ang lokal na pamahalaan ng Makati at Ayala Corporation, gaganapin ang ceremonial pressing of button at functional exercise sa Ayala Property Management Corporation Headquarters bandang alas-8:00 ng umaga sa Setyembre 8.

Kasabay nito, muling nagpaalala sa publiko ang OCD, lalo na sa mga lalahok sa drill, na sumunod sa minimum health standards bilang pag-iingat laban sa COVID-19.