Gilbert Perdez

Inihayag ng Armed Forces of the Philippines o AFP na patuloy ang kanilang search and rescue operations upang mailigtas ang dalawang tropa at labin-dalawang militiamen na sinasabing dinukot ng mga miyembro ng New People’s Army sa Sibagat, Agusan del Norte noong Disyembre ng nakaraang taon.

Ayon kay AFP Public Affairs Office Chief Col. Noel Detoyato, hindi tumitigil ang militar sa ginagawa nitong operasyon kung saan pinangungunahan ito ng 4th infantry division na naka-base sa Cagayan.

Hindi umano dapat mabahala ang pamilya ng mga hostages dahil ang kaligtasan ng mga bihag ang prayoridad ng mga operatiba ng militar na nagsasagawa ng operasyon.

Maliban dito, hindi rin aniya dapat na magpadalus-dalos dahil kinakailangang gamitin ang nararapat na istratehiya upang hindi malagay sa peligro ang buhay ng mga biktima.

Binigyang diin ni Defense Secretary Delfin Lorenzana na magpapatuloy ang construction activities sa Pag-asa Island sa West Philippine Sea.

Ginawa ni Lorenzana ang pahayag sa kabila ng umano’y deployment ng para-military troops ng China sa pinag-aagawang teritoryo.

Ayon kay Lorenzana, karapatan ng Pilipinas na ipagpatuloy ang mga aktibidad sa rehiyon at kailangan ito ng ating mga kababayan doon at gayundin ng mga sundalong nagbabantay sa naturang isla.

Dinala na sa Bangko Sentral ng Pilipinas o BSP mula sa Commission on Elections Main Office ang source codes para sa automated election system na gagamitin sa May 2019 midterm polls.

Mismong si Director James Jimenez ng education and information department ng COMELEC ang sinasabing nagdala ng source codes patungong BSP.

Nakasaad sa Republic Act 9369 na ang BSP ang dapat mangalaga sa source codes.

Samantala, tiniyak naman ng BSP na ligtas sa kanilang tanggapan ang naturang codes.

Isasara sa mga motorista simula ngayong araw ang ilang bahagi ng North Luzon Expressway o NLEX.

Ito, ayon kay MMDA General Manager Jose Arturo Garcia, ay upang bigyang daan ang konstruksyon ng Skyway Stage 3 sa Balintawak, Quezon City.

Dahil dito, magpapatupad ang MMDA ng traffic rerouting scheme sa pakikipagtulungan ng NLEX Corp simula mamayang alas 11:00 ng umaga hanggang sa matapos ang Skyway Stage 3 sa Disyembre, taong kasalukuyan.

Maaapektuhan nito ang mga motoristang dumadaan ng Balintawak Cloverleaf, Camachile, at Bagong Barrio, kabilang ang East at West Service Roads.

Inihayag ng Philippine National Police o PNP na sinusunod nito ang human rights protocols kaugnay ng pananatili sa kulungan ni Sen. Leila De Lima.

Ang pahayag ay ginawa ng PNP kasunod ng panawagan ng Commission on Human Rights o CHR laban sa umano’y “unfair treatment” na nararanasan ni De Lima.

Subalit, ayon kay Chief Supt. Dennis Siervo, head ng PNP Human Rights Affairs Office o HRAO, base sa ginawa nilang inspeksyon ay kuntento si De Lima sa kasalukuyang lagay ng custodial facility at pagtrato sa kanya ng mga nakatalagang custodial officers.

Magugunitang si De Lima ay nakadetine sa PNP Custodial Center sa Camp Crame simula pa noong February 2017 dahil sa kasong may kaugnayan sa iligal na droga.