Isasailalim na sa general community quarantine (GCQ) ang Iloilo City simula Mayo 1.
Ito ang inihayag ni City Mayor Jerry Treñas sa gitna ng tumataas na bilang ng kaso ng coronavirus disease 2019 (COVID-19) sa bansa.
Pero paliwanag ni Treñas, ipapatupad ang general quarantine sa lungsod matapos magpalabas ng binagong listahan ang national government ng mga lugar na kasama sa enhanced community quarantine (ECQ) na extended hanggang Mayo 15.
Magiging abogado na ang dalawang junior officers ng Bureau of Fire Protection (BFP) matapos pumasa sa 2019 Bar examinations.
Sa isang Facebook post, binati ng BFP-National Capital Region sina Fire Officer 3 Marco Arpon at Fire Officer 1 Kim Austine Padilla nang mapabilang sa mahigit 2,000 nakalusot na idinaos na pagsusulit sa University of Santo Tomas (UST) noong nakaraang taon.
Magugunitang sa inilabas na listahan ng Korte Suprema, nanguna rito si Mae Diane Azores ng University of Santo Tomas-Legazpi.
Sinasabing mas maluwag ang bar exams noong nakaraang taon dahil ipinako sa 74% ang passing grade sa nasabing pagsusulit.
Isinusulong ni Sen. Imee Marcos na maisama ang mga media personnel sa mga frontliners na dapat makatanggap ng special risk pay ngayong panahon ng coronavirus crisis.
Sa isang virtual press briefing, binigyang diin ni Marcos na mahalaga ang ginagampanang papel ng mga mamamahayag sa gitna na rin ng paglaganap ng maling impormasyon tungkol sa COVID-19.
Una rito, pinayagan ni Pangulong Rodrigo Duterte ang pagkakaloob ng hazard pay sa mga government workers na patuloy na nagtatrabaho sa kabila ng banta ng naturang virus.
Sinorpresa ng SexBomb Girls ang kanilang mga tagahanga matapos magsagawa ng online reunion para sa mga frontliners.
Sa YouTube channel na “The Solinaps,” kinanta ng grupo ang theme song ng kanilang dating drama series sa GMA-7 na “Daisy Siete” at maging ang signature nilang sigaw na “Get Get Aw!”
Kabilang sa mga miyembro ng SexBomb Girls sina Rochelle Pangilinan, Jopay Paguia, Weng Ibarra, Izzy Trazona, Yvette Pabalan, at Monic Icban.
Ayon kay Pangilinan, ginawa nila ang reunion upang makakalap ng pondo para sa mga nangunguna sa laban kontra coronavirus disease 2019 (COVID-19).
Umakyat na sa 1,023 ang bilang ng mga nakarekober mula sa coronavirus disease 2019 (COVID-19) sa Pilipinas.
Ayon sa Department of Health (DOH), ito’y bunsod ng panibagong 48 new recoveries na kanilang naitala sa nakalipas na 24 oras.
Samantala, pumalo na sa 8,212 ang bilang ng mga tinamaan ng COVID-19 sa bansa bunsod ng naitalang 254 new infections.
Sumampa naman sa 558 ang mga nasawi dahil sa 28 pasyente na nadagdag sa naturang listahan.
Nadagdag ang Social Security System (SSS) sa listahan ng mga tumugon sa tawag ng pangangailangan ng mga Pilipino para tulungan ang mga pinaka-apektado ng krisis na dulot ng coronavirus disease 2019 (COVID-19).
Bilang pakikiisa sa “Bayanihan to Heal as One Act,” naglatag ang SSS ng iba’t ibang COVID-19 Relief Programs, kasabay na rin ng implementasyon ng pinalawig na Enhanced Community Quarantine (ECQ) sa National Capital Region at iba pang lugar sa Luzon.
Kasabay nito, extended o pinalawig ng ahensya ang ‘filing period’ para sa lahat ng sickness benefit claims mula Marso 1 hanggang Abril 30, 2020.
Sa ilalim ng temporary extension, ang mga ‘employed members’ ay mayroong 60 araw para makapagsumite ng sickness notification sa kanilang mga employers pagkatapos ng enhanced community quarantine (ECQ).
Ang mga employers naman ay maroon 60 araw para maihain ito sa SSS.
Samantala, ang mga employers at SSS members naman na ang sickness benefit o reimbursement claims ay mapapaso na sa Abril 30, 2020, maaari pang makapagsumite ng claims hanggang Hunyo 30, 2020 nang walang kaltas o ‘denial’ ng kanilang claims.
Samantala, muli ring pinaalalahanan ng SSS ang mga kompanya na magbayad nang maaga ng sickness benefits para sa kanilang mga empleyado dahil ito’y nakabatay sa Republic Act 11199 o Social Security Act of 2018.
Naglaan ang Philippine Charity Sweepstakes Office (PCSO) ng P38-M na medical assistance para sa mahigit 4,000 marginalized Filipinos na kasalukuyang nasa ospital.
Ayon kay PCSO General Manager Royina Garma, patuloy ang ginagawa nilang pagtulong sa mga ‘nasa laylayan ng lipunan’ o ang mga walang kakayahang makapagbayad ng hospital bills.
Aabot sa P4.4 milyon ang ibinuhos ng PCSO sa National Capital Region (NCR), P9 milyon sa Southern Tagalog at Bicol Region, P12 milyon sa Northern at Central Luzon, P8 milyon sa Visayas at P5-M sa Mindanao mula Abril 20 hanggang Abril 24.
Sinabi ni Garma na handang tulungan ng PCSO ang mga Pinoy lalo na ngayong panahon ng krisis dahil sa coronavirus disease 2019 (COVID-19).
Sa Belgrade, Serbia na gaganapin ang 2021 Men’s World Boxing Championships at hindi sa New Delhi, India.
Ito’y ang inanunsiyo ng International Boxing Association (AIBA) matapos kanselahin ang kontrata ng New Delhi dahil sa umano’y hindi pagbabayad ng napagkasunduang host fee.
Gayunman, ayon sa AIBA, magbabayad pa rin ang India ng cancellation penalty na nagkakahalaga ng $500,000 o 461,366 euros.
Samantala, wala pang eksaktong petsa kung kailan magaganap ang nabanggit na boxing competition dahil sa coronavirus pandemic.
Patuloy na tumataas ang bilang ng kumpirmadong kaso ng coronavirus disease ( COVID-19) sa Somalia.
Ito’y makaraang ibunyag ng isang health official na halos 500 katao na ang tinamaan ng COVID-19 sa kanilang bansa.
Gayunman, nababahala si Dr. Abdirizak Yusuf Ahmed na baka tumaas pa ang bilang na ito dahil ang mga symptomatic na pasyente pa lamang ang naisasalang sa virus testing.
Isiniwalat din ng United Nations na walang organisadong sistema sa Somalia kaya’t hindi naitatala nang maayos ng mga ospital at health facilities ang mga kaso ng COVID-19 sa naturang bansa
Iminungkahi ng isang opisyal ng Commission on Elections (Comelec) ang pagpapatupad ng ‘no contact policy’ laban sa mga lumalabag sa mga ordinansa na may kaugnayan sa Enhanced Community Quarantine (ECQ).
Ayon kay Comelec Commissioner Rowena Guanzon, sa ganitong paraan ay maiiwasan ang komprontasyon sa pagitan ng mga awtoridad at pulisya, tulad ng kinasangkutan nina Police SMSgt. Roland Madrona at Spanish national Javier Salvador Parra sa isang exclusive subdivision sa Makati City.
Nag-ugat umano ang insidente sa hindi pagsusuot ng face mask ng kasambahay ni Parra.
Giit naman ni Guanzon, malinaw sa nangyari na kulang pa sa training at hindi malinaw sa pulis kung ano ang papel niya o tungkulin niya sa implementasyon ng lockdown.