Pinasinayaan ng Armed Forces of the Philippines (AFP) ang Emergency Quarantine Facilities (EQF) na itinayo sa Headquarters Support Group, Naval Base Heracleo Alano sa Sangley Point, Cavite.
Ayon sa Philippine Navy, ginawa ang quarantine facility para sa mga posibleng tinamaan ng COVID-19 cases at mino-monitor naman ng Fleet Medical group.
Sinasabing ito ay pangunahing pakikibabangan ng mga sundalo na kailangang i-quarantine dahil sa COVID-19.
Mas tumaas pa ang bilang ng mga pasyenteng gumaling mula sa coronavirus disease 2019 (COVID-19) sa Pilipinas.
Ang magandang balita ay base sa pinakahuling update ukol sa COVID-19 situation na inilabas ng Department of Health (DOH) ngayong araw, Abril 28.
Ayon sa DOH, umabot na sa 975 ang kabuuang bilang ng mga pasyente na nakarekober mula sa COVID-19.
Bunga ng 43 bagong recoveries, mas mataas pa rin ang bilang ng mga gumaling sa sakit kumpara sa mga pumanaw.
Nakapagtala naman ang DOH ng 19 na bagong bilang ng mga namatay sa sakit dahilan upang umakyat na ngayon ang COVID-19 death toll sa 530.
Kasabay nito, iniulat din ng DOH na nakapagtala rin sila ng panibagong 181 cases sa nakalipas na magdamag, kaya’t umabot na ngayon sa 7,958 ang kabuuang confirmed COVID-19 cases sa bansa, mula sa 7,777 cases kahapon.
Hindi pa man nakakaarangkada sa NBA G-League dahil sa coronavirus pandemic, napapansin na umano ng ilang coaches ang husay at galing ni Filipino-American Jalen Green.
Ayon kay Indiana Pacers assistant coach Bill Bayno, mentor ng Talk ‘N Text noong 2002, tiyak na malayo ang mararating at magiging maliwanag ang kinabukasan ng batang manlalaro.
Magugunitang mas piniling pasukin ni Green ang NBA G-League sa halip na sumabak sa collegiate basketball.
Sa isang online coaching seminar, sinabi ni Bayno na nararamdaman niyang makakalusot si Green sa Top 10 pick sakaling magpasya na itong pumasok sa NBA.
Sinasabing ang ama ni Green ay isang Amerikano habang taga-Ilocos Sur naman ang kanyang ina.
Patuloy pa rin ang pamamayagpag ni Lea Salonga bilang “Disney Legend.”
Ito’y matapos kunin ng Disney Animation Studios ang kanyang serbisyo para sa “Storytime” na isang online series ng kompanya kung saan tinatampok dito ang mga children’s books at binabasa ng mga sikat na personalidad mula sa kani-kanilang tahanan.
Si Salonga ang napiling magkuwento ng “5 Minute Princess Stories” tungkol kay Princess Jasmine kung saan inawit ng Pinay singer bilang pambungad ang ilang linya ng “A Whole New World.”
Matatandaang itinanghal noon si Salonga bilang “Disney Legend” matapos gamitin ang kanyang tinig sa mga animated films na “Aladdin” at “Mulan.”
Samantala, pasok din bilang story readers sa “Storytime” ng Disney ang iba pang voice talents na sina Paige O’Hara, Auli’i Cravalho, at Jodi Benson, gayundin ang Hollywood actors na sina John Stamos, Jeff Goldlbum, Ginnifer Goodwin, at Colin O’Donoghue.
Patay ang mahigit 700 katao sa Iran matapos umanong uminom ng alcohol sa paniniwalang gamot ito laban sa coronavirus disease 2019 (COVID-19).
Ayon kay Iranian Health Ministry Spokesman Kianoush Jahanpour, 728 na ang kabuuang bilang ng mga pumanaw dahil sa alcohol poisoning mula Pebrero 20 hanggang Abril 7, taong kasalukuyan.
Sinasabing 90 sa mga lumagok ng methanol alcohol ay nawalan ng paningin habang ang iba’y nakaranas din ng matinding pinsala sa kanilang mga mata.
Mahigit 90,000 na ang tinamaan ng COVID-19 sa Iran habang halos 6,000 naman ang nasawi dahil sa naturang virus.
Patay ang tatlong hinihinalang miyembro ng Abu Sayyaf Group (ASG) habang sugatan naman ang 7 Moro National Liberation Front (MNLF) fighters sa naganap na engkwentro sa Indanan, Sulu.
Ayon kay Major Gen. Corleto Vinluan, commander ng joint task force Sulu, bago ang insidente ay nakatanggap ng impormasyon ang militar na may mga nagtatagong bandido malapit sa base camp ng MNLF.
Nang makumpirma, agad na nagpadala ng kanyang mga tauhan si MNLF Founding Chairperson Nur Misuari sa lugar kung saan naganap ang bakbakan.
Maliban sa mga nasawing kasapi ng Abu Sayyaf, sinasabing may tatlong sugatan din sa panig ng mga bandido.
Naglabas na ng music video ang bandang Juan Karlos para sa bagong kanta nitong “Kalawakan” na bahagi ng kanilang 10-track album na “Diwa.”
Ayon sa vocalist na si JK Labajo, noon pang Marso 20 ini-release ang nabanggit na awitin sa ilalim ng MCA Music.
Sinabi ni Labajo na ginawa o sinulat niya ang kantang “Kalawakan” para sa kanyang nobya na si Maureen Wroblewitz.
Maliban kay Labajo, miyembro rin ng bandang Juan Karlos sina Jeriko Aguilar (guitar), Louise Bayas (bass), at Gian Hipolito (drums).
Muling itinanghal bilang Coach of the Year ng PBA Press Corps ang mentor ng San Miguel Beermen na si Leo Austria.
Sinasabing ang awards night ay itinakda sana noon pang Marso 16 sa Novotel Manila sa Araneta Center pero na-postpone ito dahil sa coronavirus pandemic.
Dahil dito, hindi pa alam kung kailan makukuha ni Austria ang Virgilio “Baby” Dalupan trophy para sa naturang parangal.
Ito na ang ika-apat na Coach of the Year award ni Austria sa loob ng limang taon.
Sumampa na sa 7,777 ang bilang ng mga tinamaan ng coronavirus disease 2019 (COVID-19) sa Pilipinas.
Ito’y makaraang makapagtala ang Department of Health (DOH) ng 198 new cases.
Nagkaroon naman ng 70 pang mga COVID-19 survivors kaya’t nasa 932 na ang mga nakarekober.
Samantala, nakapagtala ang DOH ng 10 bagong insidente ng pagkamatay dahil sa covid-19 dahilan upang sumampa na sa 511 ang bilang ng mga nasawi sa nasabing karamdaman sa ating bansa.
Tinawag ng isang maritime law expert na ‘propaganda’ ng China ang inilabas na partnership song ng Chinese Embassy na kinanta ni Filipina “jukebox queen” at Camarines Sur Vice-Governor Imelda Papin at iba pang singers.
Ang pahayag ay ginawa ni Prof. Jay Batongbacal, direktor ng UP Institute for Maritime Affairs and Law of the Sea, matapos makatanggap ng mahigit isang daang libong dislikes sa YouTube ang naturang awitin.
Una nang idinepensa ni Papin na ang ‘Iisang Dagat’ na sinulat ni Chinese Ambassador to the Philippines Huang Xilian ay ginawa para sa pagkakaisa at pagtutulungan ng dalawang bansa.
Ngunit para kay Batongbacal, ‘propaganda’ lamang ng China ang music video para pahupain ang galit ng mga Pinoy makaraag maghain ng diplomatic protests ang gobyerno laban sa patuloy na mga aktibidad nito sa West Philippine Sea.
Giit pa Batongbacal, tila sinasamantala ng China ang pagiging abala ng ilang bansa laban sa COVID-19 CRISIS para palawakin at kontrolin ang pinag-aagawang teritoryo.