Gilbert Perdez

Nakibahagi na si Kapamilya star Kim Chiu sa humahabang listahan ng mga sumali sa jersey auction na naglalayong makalikom ng pondo para sa mga frontliners.

Katuwang ni Chiu sa proyekto si University of Santo Tomas (UST) standout Sisi Rondina.

Ang inilahok ng Chinita Princess sa auction ay ang ginamit niyang jersey sa Star Magic All-Star Games kung saan mapupunta ang kita nito sa mga frontliners sa Barangay Luz sa Cebu.

Nagsimula ang bid sa halagang P1,500 at tatanggap ito ng alok hanggang alas-11:59 bukas ng gabi, Abril 28.

Binuweltahan ng aktres na si Pokwang ang mga impostor na gumagamit ng kanyang pangalan sa social media.

Sa video na ibinahagi ni Pokwang sa kanyang Instagram account, nanawagan si Pokwang sa mga kapwa niya artista na labanan ang mga gumagawa ng pekeng accounts.

Binanggit din ni Pokwang na may mga impostor na ginagamit ang pangalan at mga litrato ng mga artistang gaya niya para kumita.

Kasama si pokwang sa mga artista na aktibong tumutulong ngayon sa mga apektado ng enhanced community quarantine (ECQ) dahil sa coronavirus disease 2019 (COVID-19).

Gumawa ng bagong kanta sina rap artist Gloc-9 at Rocker Raymund Marasigan habang nakikibaka ang buong mundo sa coronavirus disease 2019 (COVID-19).

May pamagat na “Gera Gera”, nakatuon ang awitin sa kasalukuyang krisis kung saan halos lahat ng lugar ay naka-lockdown.

Ayon kay marasigan, dahil hindi niya mabuo nang mag-isa ang kanta kaya’t humingi siya ng tulong kay Gloc-9 para sa rap verse nito.

Ang music video ng “Gera Gera” ay umaani na ng libu-libong likes at views sa Youtube.