Ginagamot ngayon sa isang ospital sa Estados Unidos si NBA legend Patrick Ewing dahil sa coronavirus disease 2019 (COVID-19).
Sa isang post sa Twitter, isiniwalat naman ni Ewing, 57, na nagpositibo siya sa virus.
Pinayuhan naman ni Ewing ang kanyang mga tagahanga na ingatan ang kanilang mga sarili, gayundin ang kani-kanilang mga mahal sa buhay.
Naglunsad ng bagong online show sina Karla Estrada, Melai Cantiveros at Jolina Magdangal.
Ang programa ay may pamagat na “Confessions with the Momshies” at lumabas ang unang episode sa oks.abs-cbn.com, ABS-CBN YouTube channel at ABS-CBN Facebook page.
Bukod sa palitan ng kuwento, tinatalakay at pinapakinggan din ang confessions ng kanilang mga viewers.
Nagsagawa ng disinfection at sanitation ang mga opisyal ng barangay sa Baclaran, Parañaque City.
Ito’y kasunod ng ikinasang “calibrated lockdown” sa sampung lugar bunsod ng mataas na bilang ng kaso ng coronavirus disease (COVID-19) sa Baclaran.
Ayon kay City Mayor Edwin Olivares, dahil sa tatlong araw na lockdown ay mabibigyang-daan ang mass testing ng lokal na pamahalaan.
Hindi matutuloy ang “Iconic” concert tour nina OPM icons Sharon Cuneta at Regine Velasquez sa North America dahil sa coronavirus pandemic.
Sa kanyang social media accounts, nag-post ng kanyang postponement advisory si Sharon at sinabing matagal din nilang pinag-isipan at pinag-aralan ang kanilang desisyon.
Ayon kay Sharon, ngayong May 2020 sana magsisimula ang kanilang tour pero dahil sa coronavirus disease 2019 (COVID-19) ay nagpasya silang ipagpaliban ito.
Matatandaang dinumog din ng mga fans ang dalawang gabing “Iconic” concert nina Sharon at Regine sa Araneta Coliseum noong October 2019.
Sumunod sa ipinatutupad na protocols ng mga awtoridad kahit pa binawi na ang quarantine restrictions!
Ito ang panawagan ni Joint Task Force COVID Shield Commander, Police Lieutenant General Guillermo Lorenzo Eleazar sa publiko, partikular sa mga gusto nang umuwi sa kani-kanilang bayan.
Giit ni Eleazar, dapat pa ring tumalima sa mga alituntunin ang mga tinatawag na Locally Stranded Individuals (LSIs) upang hindi maabala lalo na kapag hindi nakalusot sa Quarantine Control Points (QCPs).
Ayon kay Eleazar, hindi dapat gawing clearance ng mga LSIs ang pag-alis ng gobyerno sa quarantine restrictions para makauwi sila sa kani-kanilang mga lugar.
Kasabay nito, nanawagan din ang opisyal sa mga media at social media influencers na tumulong sa pamamahagi ng impormasyon ukol sa mga alituntunin kung paano makakakuha ng travel authority ang mga apektadong mamamayan.
Maaari nang umalis sa mga quarantine centers ang mga repatriated Overseas Filipino Workers (OFW)’s gamit ang certificates of completion na puwede nilang ipa-print sa halip na maghintay nang matagal para sa kanilang mga dokumento.
Ayon kay OWWA Administrator Hans Leo Cacdac, sa pamamagitan ng bagong sistema na katulad ng electronic ticket ay mapapabilis ang paglabas ng mga OFWs mula sa Bureau of Quarantine.
Tinatayang 42,000 migrant workers ang inaasahang uuwi hanggang Hunyo ng taong kasalukuyan.
Isinusulong ng isang mambabatas na tapyasan ng 30% ang budget ngayong taon sa mga non-essential items at expenses ng mga taong gobyerno.
Partikular na pinatatapyasan ni House Committee on Public Accounts Chairman at Anakalusugan Party-list Rep. Mike Defensor ay ang mga non-essential expenditures sa ilalim ng Maintenance and Other Operating Expenses na aabot sa P1.6-trilyon.
Ayon kay Defensor, layon ng itinutulak niyang budget cut sa P4.1-trilyon national budget na makalikom ng pondo para sa coronavirus disease 2019 (COVID-19) response at social amelioration program (SAP).
Aniya, kasama rito ang pondo sa travel na nasa P19.4-bilyon; training at scholarship, P32.9-bilyon; supplies at materials, P108.3-bilyon; at representation, dining out at entertainment para sa mga opisyal, at bisita na nasa P5.2-bilyon.
Inanunsiyo ng FIBA na wala nang magaganap na 3×3 competitions ngayong taon bunsod pa rin ng Coronavirus Disease (COVID-19) pandemic.
Bunga nito, kanselado na ang ilang events tulad ng FIBA 3×3 Under-23 Nations League, FIBA 3×3 Under-17 Zone Cups, at apat na World Tour events sa Prague, Lausanne, Los Angeles, at Nanjing.
Samantala, inusod naman ang dalawang Olympic qualifying tournaments (OQTs) sa 2021 kasunod ng postponement ng Tokyo Olympics.
Ang qualifying tournaments o OQTs ay itinakda mula Marso 18 hanggang 22 ngayong taon sa Bengaluru, India, kung saan kasama sana ang Pinoy top-ranked players na sina Joshua Munzon, Alvin Pasaol, CJ Perez at Moala Tautuaa.
Nakabalik na sa Sangley Point sa Cavite City ang BRP Bacolod City matapos ang matagumpay nitong misyon sa ibang bansa bilang bahagi ng kampanya ng pamahalaan laban sa coronavirus disease 2019 (COVID-19).
Ayon kay Philippine Fleet public affairs office chief, Lt. Vanessa Layco, kumuha ito ng personal protective equipment (PPE) sets sa China bago inihatid sa Davao City.
Sa isang simpleng seremonya, masayang sinalubong at binati ni Philippine Fleet commander, Rear Admiral Loumer P. Bernabe, ang mga opisyal at enlisted personnel naman ng barko.
Matatandaang kinuha ng gobyerno ang serbisyo ng BRP Bacolod City para kumuha ng medical equipment sa China bilang bahagi ng mga hakbang ng gobyerno upang ma-contain ang virus.
Kabilang sa mga kinuhang shipment ay ang 700,000 KN95 face masks at 200,000 sets ng PPE, tulad ng goggles, coverall suits, head cover, gloves, shoe covers, surgical masks, at surgical gowns.
Magpapatupad ng modified checkpoints ang Joint Task Force Corona Virus Shield (JTF CV Shield) sa Metro Manila at iba pang urban areas sa buong bansa upang maiwasan ang traffic congestion.
Ayon kay JTF CV Shield commander, Lt. Gen. Guillermo Eleazar, inaasahan na nila ang pagkakaroon ng mahabang pila ng mga sasakyan sa mga Quarantine Control Points (QCPs) dahil sa modified enhanced community quarantine (MECQ) at general community quarantine (GCQ) na epektibo mula noong Mayo 16.
Aniya, sa ngayon ay mayroon nang mahigit 4,000 QCPs sa iba’t ibang panig ng bansa upang makontrol ang galaw ng mga tao sa gitna ng nagpapatuloy na banta ng coronavirus disease 2019 (COVID-19).