Inilabas na ni Lea Salonga ang kanyang bersiyon ng kantang “Kailangan Kita” na unang pinasikat ni Ogie Alcasid.
Nitong Biyernes ay gumawa rin si Salonga ng dalawang oras na virtual concert bilang pakikiisa niya sa “Bayanihan, Musikahan.”
Matatandaan na mula noong original release ng “Kailangan Kita” taong 2002, nagkaroon din ng kanya-kanyang bersiyon sina Gary Valenciano, Piolo Pascual, at Angeline Quinto.
Patay ang 30 katao dahil sa umano’y paghihiganti ng pamilya ng isang kilabot na smuggler na pinaslang ng mga migrants sa Mezdah, Libya.
Ayon sa interior ministry, maliban sa mga nasawi, 11 iba pa ang sugatan sa pag-atake.
Sa imbestigasyon, napatay ng mga migrante sa lugar ang 30-anyos na ismagler sa hindi malamang dahilan kaya’t hinihinalang gumanti ang pamilya nito.
Matatandaang napatay ng NATO forces noong 2011 ang matagal nang lider ng Libya na si Muammar Gaddafi at mula noo’y tila nabalot na ng karahasan ang naturang bansa.
Nababahala ang ilang atleta sa pasya ng gobyerno na isailalim sa general community quarantine (GCQ) ang Metro Manila simula Hunyo 1.
Ayon kay Philippine national karate team member at 2019 Southeast Asian Games gold medalist Jamie Christine Lim, posibleng lumobo ang bilang ng mga kaso ng coronavirus disease 2019 (COVID-19) dahil sa nabanggit na hakbang.
Isa si Lim sa mga nakikiisa sa bayanihan ngayong panahon ng COVID-19 pandemic.
Matatandaang ipinaliwanag ng pamahalaan na kailangang luwagan ang lockdown upang gumalaw ang ekonomiya ng bansa.
Muling nilinaw ni Department of Trade and Industry (DTI) Sec. Ramon Lopez na hindi nila ipapasara nang tuluyan ang mga restaurant at fast-food chain na hindi makakatupad sa health protocols at guidelines sa muli nilang pagbabalik-operasyon sa ilalim ng General Community Quarantine (GCQ).
Sa ginanap na virtual hearing ng Trade and Industry Committee sa Kamara, sinabi ni Lopez na pansamantala lamang ang gagawing pagpapasara upang bigyan ng panahon na maitama at magawa ang mga dapat sa panahon ng GCQ.
Bukod dito, tiniyak din ni Lopez na sa halip na sa modified GCQ ay sa GCQ pa lamang ay papayagan nang mag-operate muli ang mga restaurants at fast-food chains ng 30% hanggang 50%.
Nagpositibo sa coronavirus disease 2019 (COVID-19) ang isang lalaking Overseas Filipino Worker (OFW) na kauuwi pa lamang sa Hilongos, Leyte.
Ayon sa Department of Health (DOH), ang pasyente ay 31-anyos at cruise ship worker na dumating sa Tacloban City airport noong Lunes.
Sinabi naman ni DOH Eastern Visayas Director Minerva Molon na ‘asymptomatic’ o hindi nakitaan ng mga sintomas ang nabanggit na OFW kaya’t agad itong dinala sa local isolation facility.
Dahil dito, agad dinbg magsasagawa ng contact tracing ang mga taga-DOH sa tulong na rin ng Civil Aviation Authority of the Philippines (CAAP), Overseas Workers Welfare Administration (OWWA), Philippine National Police, at mga lokal na pamahalaan.
Inilatag ng Department of Trade and Industry (DTI) sa Kamara ang mga protocols na susundin ng mga dine-in restaurants sa oras na isailalim na sa General Community Quarantine (GCQ) ang National Capital Region (NCR).
Sa virtual hearing ng Trade and Industry Committee, sinabi ni Trade Usec. Ruth Castelo na papayagan na ang mga dine-in resto na magbukas sa ilalim ng GCQ kung saan gradual o unti-unti ang opening na kanilang gagawin.
Aniya, tanging ang mga restaurants lamang na sumusunod sa DTI-issued safety protocols ang papayagan na magbalik-operasyon pero sasailalim din ang mga ito sa post-audit.
Maliban dito, mahigpit ding ipatutupad ang no mask-no entry policy, social distancing at regular sanitation habang “no physical contact” din sa pagbabayad at kakailanganin na ang alternative mode of payment tulad ng credit o ebit card at iba pang non-cash digital payment.
Maaari pa namang magbayad gamit ang cash pero gagamit ng tray kung saan dito ilalagay ang pera.
Umaasa ang singer-actor na si Sam Concepcion na matatapos din ang naudlot na HBO Asia series na kasama siya bago ang COVID-19 pandemic.
Ayon kay Concepcion, nagsimula na sana ang kanyang proyektong action-fantasy series na may pamagat na “Halfworlds” pero nahinto ito dahil sa krisis.
Aniya, hindi lamang ang HBO series ang apektado ng pandemic kundi maging ang lahat ng movie at television productions sa buong mundo.
Maliban kay Concepcion, kasama rin sa nabanggit na serye ang Kapuso actress na si Bianca Umali.
Tumataas ang bilang ng mga Cebuano na namamatay, hindi sa dahil sa coronavirus disease 2019 (COVID-19), kundi sa ibang sakit.
Ayon kay Governor Gwendolyn Garcia, kabilang sa mga karamdamang ito ay ang hypertension at cardiovascular disease.
Sinabi naman ni Garcia na sa 2,316 swab samples na ipinadala sa mga testing centers, 127 lamang ang nagpositibo o 94.5% ang nagnegatibo sa coronavirus.
Sa kasalukuyan, Cebu City pa rin ang may pinakamataas na kaso ng COVID-19 sa lalawigan na mayroong 2,126 cases; sinundan ng Mandaue (238 cases); Lapu-Lapu (86 cases); at 127 naman sa iba pang bayan at components cities.
Isasailalim na rin sa general community quarantine (GCQ) ang Bangsamoro Autonomous Region in Muslim Mindanao (BARMM) simula Hunyo 1.
Ayon kay Atty. Naguib Sinarimbo, tagapagsalita ng BARMM, bagama’t luluwagan na ang lockdown sa rehiyon ay mahigpit pa ring ipatutupad ang physical distancing, at dapat nakasuot ng face mask kung lalabas ng bahay at ugaliin ang regular na paghuhugas ng kamay.
Kasabay nito, nanawagan si Sinarimbo sa publiko na makipagtulungan sa pamahalaang panlalawigan dahil kailangan ito para sa pagbangon ng ekonomiya.
Aabot sa 374,000 pesos na halaga ng hinihinalang shabu ang nasabat ng mga awtoridad mula sa isang high-value target sa isang buy-bust operation sa Rosales, Pangasinan.
Kinilala ng Philippine Drug Enforcement Agency (PDEA) Pangasinan ang suspek na si Marvin Placido na nahulihan ng 55 gramo ng umano’y shabu sa Barangay Carmen East.
Maliban dito, nakuha rin mula kay Placido ang isang mobile phone at isang Mitsubishi L300 na hinihinalang ginagamit sa illegal drug trade ng suspek na ngayo’y nahaharap sa kasong paglabag sa dangerous drugs act.